2 Lal 1 - Bawm Common Language Bible Version

Elija Leh Lalchem Ahaziah

¹ Israel lalchem Ahab thih nûnah Moab ram chu Israel tlûnah an hel.

² Israel lalchem Ahaziah chu Samaria ah a lal in tlûn varanda chuanh kardang thawk hen a tlâ le, â liam zia a fâk thlo. Churawhchun, Ekron ah mi Philistia khuapi pathian Baal Zebub sinah krai khâi ding hen mi a fial le, dam kho ding asi awt ma awtlo ti theih ding a duh ruangah.

³ Sikhawmsele LALPA vânmifial nih Tishbe mi khuavâng Elija chu Lalchem Ahaziah nih mi a fial na mi tla hen va a tawng ding hen thu a pêk. “Ekron khua Baal Zebub pathian sinah zei rangah krai khâi ding hen nan kal awt? Israel ram ah Pathian umlo hen nan ruat ruangah ma?

⁴ LALPA thusim hi lalchem va simh u, ‘Na liam mi chu na dam ding asi lo; na thi lai,’ ” a ti. Elija nih LALPA thupêk hâwi hen a ti le,

⁵ a mifial tla khawm lalchem sinah an kîr. Lalchem nih mifial tla sinah, “Zei rangah nan hawng kîr?” a ti.

⁶ Annih nih an sâng le, “Minung pakhat kanna tawng mi nih, kîr hen LALPA thusim nangmah an simh ding hen hawng kan simh, “Zei rangah Ekron khua pathian Baal Zebub sinah krai khâi ding hen mi na fial na? Israel ram ah Pathian umlo hen na ruat ruangah ma? Na liam mi kha na dam lai loh; na thi lai!” ti hen.

⁷ Lalchem nih, “Chu minung chu zei hâwi mi me asi?” ti hen a deih na.

⁸ Annih nih an sâng le, “Amah chu savun kawrfual â ruk le, savun tâisâwm hen â sâwm,” an ti. Lalchem nih, “Elija ma chu a!” a ti.

⁹ Churawhchun, lalchem nih hotu pakhat minung sâwmnga Elija kawh ding hen a fial na. Hotu nih chun Elija tlângah a to mi hen a va a tawng le, “Pathian mi, lalchem nih a sinah kal ding hen an kawh,” a ti.

¹⁰ Elija nih a sâng le, “Kei, Pathian mi kasi chun vân thawk hen mei hawng tlâ sele, nang leh na mi tla hen an khangh hep na seh!” a ti. Churawhchun, lâkkhatko ah vân thawk hen mei a hawng tlâ le, hotu leh a mi tla chu a khangh hep na.

¹¹ Lalchem nih chun hotu dang pakhat leh minung sâwmnga a fial nawlh na, chu tla chu an va kal le, Elija sinah, “Pathian mi, lalchem nih tuko ah hawng reh ding hen an kawh!” an ti.

¹² Elija nih a sâng le, “Kei, Pathian mi kasi chun vân thawk hen mei tlâ sele, nang leh na mi tla an khangh hep na seh!” a ti. Mawhsareh hen mei a hawng tlâ le, hotu leh a mi tla a khangh hep na.

¹³ Lalchem nih chun hotu dang leh minung sâwmnga a fial nawlh fâwn. Hotu chu tlângah a va kâi le, Elija mâika ah siksidîr hen a kûn le, a ngiar, “Pathian mi, ka tlûnah leh ka mi leh tla tlûnah khuaruat le, kan nungnâk hi hawng kan zuah piak.

¹⁴ Hotu panih leh an mi tla chu vân thawk hen mei a hawng tlâ mi nih a thah na rawh, sikhawmsele, ka tlûnah lam chun zângfahtê hen khuaruat,” a ti.

¹⁵ LALPA vânmifial nih Elija sinah, “A sinah va kal le, ṭih lah,” a ti. Churawhchun, Elija chu hotupa chu a zûl le,

¹⁶ lalchem sinah a va kal le, a sinah, “Hi hi LALPA thusim chu asi; Israel ram ah krai khâi ding Pathian a um lo mi bang hen Ekron khua pathian Baal Zebub sinah krai khâi ding hen mi na fial na ruangah na dam lai loh, na thi lai!” a ti.

¹⁷ Elija mang hen LALPA nih thu a sim mi hâwi hen Ahaziah chu a thi rawh. Ahaziah nih fapa a nei lo le, Juda lalchem Jehosaphat fapa Jehoram nih lâi a rêl mi a kum nihnâk ah a unaupa Joram amah ruangrûl ah a lal.

¹⁸ Lalchem Ahaziah nih a thilti tla zawzawng chu Israel lal thâwngthâng rînnâk bu ah rîn asi.