2 KORIN 7 - Bawm Common Language Bible Version

¹ Chun, duhtak le tla, chubang thutiam chu kan nei ruangah taksa leh thlarau nâwmnâk zawzawng lakah kanna thiangtir lai, Pathian ṭih bû hen thenhlimhnâk rangtlingtir hen.

Pawl Lâwmnâk

² Nan thinlung ah mun hawng ka kianh u; âu tlûn khawm ah kan sual lo, âukhawm kan râwk lo, âukhawm kan sawhkhalh lo.

³ Chu chu a nan mawhtir na ding hen ka ti asi lo le, thih leh thih khat, dam leh dam khat ding hen kan thinlung ah ka nan kil na ti veikhat liau khan ka sim kha.

⁴ Nannih leikângah chun ka sim ngam tuktarâi, ka nan putso na zia hi a fâk asi; lungngamnâk hen ka khat le, kanna hamhnâk zawzawngah chun lâwmnâk hen ka khat.

⁵ Makedonia ram ka tlung khawm khan kan taksa nih lungngamnâk rerêng a nei lêm lo, khatlei khatlei ah chun hamhtir hen kan um dauh lehlam; leng leiah a sualnâk tla a um le, sung leiah ṭihnâk tla a um.

⁶ Sikhawmsele, â nâutir mi tla lungngamhtu Pathian nih chun Tita hawng fial hen hawng kan thlangamh rawh.

⁷ A hawng kalnâk cho nih chun asi lo le, nan lunglêng zia tla, nan ṭap zia tla, ka tlûnah ṭhanemsemsê nan ngâi zia tla hawng kan simh hen nanmah an lungngamh na nâk khawm nih chun hawng kan lungngamh rawh asi; chun ka lâwm khun asi.

⁸ Ka lasuikuat nih khan an ngaihsiattir na khawmsele ka sîr lo rawh; a tîr lam chun ka sîr asi, kha lasuikuat nih khan a nan ngaihsiattir na ti ka theih ruangah; sikhawmsele, sâwtlotê cho asi kha.

⁹ Tu chun kâ lâwm asi, ngaihsiattir hen nan um ruangah asi lo le, rimnâk ding hen nan ngaihsia ruangah asi dauh. Kanmah ruangah zeikhawm nan dawk lonâk ding hen Pathian duhzia hâwi hen ngaihsiattir hen nan um asi.

¹⁰ Pathian duhzia hâwi hen ngaihsiatnâk nih chun ruangsuahnâk ding hen sîrnâk cho silo hen rimnâk a siam tâwn; laikulh ngaihsiatnâk nih chun thihnâk a siam dauh tâwn.

¹¹ Chun, ngâinik u, Pathian duhzia hâwi a ngaihsiattir hen nan umnâk takah chun thiamthihnâk tla, mah a sim thiamnâk tla, thinthawknâk tla, ṭihnâk tla, lunglêngnâk tla, ṭhanemsemse ngâinâk tla, lehrûl samnâk tla nanmah lakah a siam zia a fâk a! Zeizawng ah chubang thu ah chun nan thiang ti nanna langh rawh.

¹² Chun nan sinah rîn khawmsele a sualtu ruangah khan ka rîn lo le, a sual tuartu ruangah ka rîn lêm lo, kan tlûnah ṭhanemsemsê nan ngâi zia Pathian mitmuh ah nan sinah theihtir hen a um khonâk ding hen ka rîn mi asi dauh.

¹³ Churuangah, lungngam hen kan um rawh. Kanmah lungngamnâk cho lo khawm ah, Tita lâwmnâk ruangah kanna lâwm khun le, nannih zawzawng nih a thinlung nan thartir piak ruangah.

¹⁴ A sinah zei leikâng khawm ah nanmah tla an putso na khawmsele ka mualpho lo; mualpho ngangâk hen zeizawng nan sinah thu tatak kan sim tâwn hâwi khan Tita mâika ah kan putso mi chu thu tatak a hawng si taktê.

¹⁵ Chun, nan ektê hen a thu nan ngâi zia lâu leh thir bû hen amah nan lawmh zia tla chu theih ko hen a thinlung chu nanmah leikângah a um khun asi.

¹⁶ Zei leikâng zawng ah nan tlûnah ka lungngam ruangah kâ lâwm asi.