1 SAMUEL 9 - Bawm Common Language Bible Version

Samuel Leh Saul Anna Tawng

¹ Minei leh krai thiam tak minung pakhat a min Kish a um le, amah chu Abiel fapa Benjamin chi asi. Bekorath dâwngsung lakah mi Aphiah chi ṭeng Zeror tupa asi.

² Kish nih chun fapa Saul a nei le, mi mêlṭha tak, dingdawng ṭha tak asi. Saul chu Israel lakah a sâng chem hen a mêl khawm a ṭha.

³ Kish sanatung tla chu anna rekrâwi ver le, churawhchun a fapa Saul sinah, “To-aw lakah mi pakhat put le, sanatung tla va hâwl na,” a ti.

⁴ Efraim tlâng ram tla leh Salisah tlâng ram tla ah an va kal le, sikhawmsele an tawng na lo. Churawhchun, Shaalim ram chu an pal le, sikhawmsele chunah khawm sanatung tla an um lo. Churawhchun, Benjamin ram tla an va kal le, chunah khawm an tawng na lo.

⁵ Zuph ram ah an va kal rawh chun Saul nih a to-aw sinah, “In leiah kan kîr ko lai, chu hâwi asi lo chun ka pa nih sanatung cho silo hen kanmah khawm hawng kan dawn tuk lai,” a ti.

⁶ A to-aw nih a sâng le, “Hei rih seh! Hi khua lakah hin mi thenhlimh pakhat a sim mi zawng a dik vima ruangah zahkâi tak mi a um. A sinah kan va kal lai le, sanatung khawm a umnâk hawng kan simh kho ko lai mawh,” a ti.

⁷ Saul nih, “A sinah kan va kal chun zei kan pêk lai?” a ti. “Kan sâwngkhâwi lakah ei ding buh khawm a um lo rawh, amah pêk ding zei thil khawm kan nei lo asi lo ma?” a ti.

⁸ To-aw nih a sâng le, “Tangka mêtê mi ka nei, chu chu ka pêk ko lai, chu tikah kan tawngnâk ding mun chu hawng kan simh kho lai,” a ti.

^9-11 Saul nih a sâng le, “Krai ṭha tak asi, kan kal ngâk lai,” a ti. Churawhchun, mi thenhlimh pa umnâk khua ah chun an va kal rawh. Chu khua umnâk tlâng leiah an kal liauah chun nungâk tla tî than an hawng mi tla an tawng na. An deih na le, “Hi khua ah hin muh khotu a um ma?” an ti. (Chu liau chun khuavâng hi muhtu an ti ruangah zeiliau zawng ah Pathian deih ding hen an duh chun “Muhtu sinah kan kal lai,” an ti tâwn.)

^12-13 Nungâk tla nih chun, “I, a um,” ti hen an sâng. “Nanmah lântê ah a hawng tlung sek. Nan va kal sawm asi chun nan phanh lai. Khua ah nan va lût kâ hen nan va muh lai. Tlângah mi tla nih bâwlnâk an ap ruangah tusûn ah a hawng tleng. Amah a tlung lânlo chu an sâwm mi tla âukhawm nih an ei ding asi lo, amah nih bâwlnâk chu mal a sâwm tâ ding asi ruangah. Tuah nan kal sawm mi asi chun tlâng leiah buh ei ding a kal lântê ah amah nan va tawng lai,” an ti.

¹⁴ Churawhchun, Saul leh a to-aw chu khua ah an va kal le, an kal liauah chun Pathian sawnhnâk leiah Samuel chu a kal mi an muh.

¹⁵ A lântê ah LALPA nih Samuel sinah thu a sim ving rawh le,

¹⁶ “Thâizîng ah tutik ding ah Benjamin phun lakah mi minung pakhat ka hawng fial awt, ka mi Israel tla lâirêltu ding ah sariak thuh le, amah nih Philistia mi tla lakah a hum na lai. Ka mi le nih an tuar fâk zia khawm ka muh, ṭangpi ding an hawng ka auh mi khawm ka theih,” a ti.

¹⁷ Samuel nih Saul a muh kâ hen LALPA nih a sinah, “A thu kan sim mi kha hi minung hi asi, amah nih ka minung tla lâirêl seh,” a ti.

¹⁸ Churawhchun, Saul chu Samuel sinah a va kal le, Samuel kawtkâ kiangah to mi sinah chun, “A zeiah me muhtu umnâk hawng ka simh?” ti hen a deih.

¹⁹ Samuel nih a sâng le, “Keimah hi kasi, Pathian sawnhnâk leiah ka mâi leiah kal rawh. Tusûn ah ka sinah nan panih hen buh nan ei lai. Thâizîng ah thu nan ka deih mi zawng kan sâng hep na lai le, kan kaltir na lai rawh.

²⁰ Nan sanatung ni thum a tlâu rawh mi thu ah chun lawksawng rîlmâl lah u, tawng chia asi rawh. Sikhawmsele, Israel tla nih an duh chem mi chu âu asi awt? Nang leh na pa dâwngsungkhur tla chu an si,” a ti.

²¹ Saul nih a sâng le, “Israel phun lakah phun mêchem Benjamin phun ah mi kasi, kannih dâwngsungkhur chu kan phun lakah a nâu chem mi kan si. Chu hâwi mi lakah zeitin zia ka sinah thu na sim?” a ti.

²² Churawhchun, Saul leh a to-aw chu in kardang kâu tak dawhkân masa chem khual sâwmthum tonâk mun ah tonâk a pêk na.

²³ Samuel nih buh suangtu sinah, “Ka nan pêk na mi meh a dangtê hen siah ding ka ti mi kha hawng put u,” a ti.

²⁴ Churawhchun, buh suangtu nih a kevâng meh chu Saul mâika ah a hunh rawh. Samuel nih, “Zauhnik, hi hi na rangah siah mi chu asi. Ei rawh. Sâwm mi minung tla sinah tutan ah na ei ding ah kan siah piak mi asi,” a ti. Chu ni ah chun Saul chu Samuel sinah a ei rawh.

²⁵ Pathian sawnhnâk mun thawk hen khua leiah an va kal rawh chun in tlûn chuanh leiah Saul rangah ihkhun an siam piak le,

²⁶ chunah chun a it rawh. Khua a dei nûnah Saul chu in tlûn chuanh ah mi chu Samuel nih a kawh le, “Thawk le, ka nan kaltir lai rawh,” a ti. Saul chu a thawk le, amah leh Samuel hen tualmâi ah an va suak rawh.

Samuel Nih Saul Chu Lâirêltu Hâwi Hen Sariak Thuhnâk

²⁷ Khuavâu an tleng rawh chun Samuel nih Saul sinah, “Kha to-awpa kha kan mâilei ah kaltir,” a ti. To-aw nih a kaltâk na le, Samuel nih, “Tâwm a dîn rih, Pathian thusim ka nan simh awt,” a ti.