1 SAMUEL 8 - Bawm Common Language Bible Version

Mi Zapi Nih Lal An Deihnâk

¹ Samuel chu a tar rawh chun a fapa tla chu Israel tla tlûnah lâirêltu ah a siam na.

² A fapa upa dauh mi min chu Joel, a ngâksia dauh mi chu Abijah; Bersheba ah lâirêltu an si.

³ Sikhawmsele, an pa umdân hâwi hen an um lo; tangka lei an sunhsak dauh le, nawhnâk an lâk le, zumhkâi tak hen thu an thlûk lo.

⁴ Churawhchun, Israel ruitu tla chu anna pûm le, Samuel sinah Ramah khua ah an va kal le,

⁵ a sinah, “Ngâiknik, nang tâ nih na tar thlo rawh, na fapa tla nih nangmah zia an châwng lo. Churuangah lal hawng kan ruat piak le, churawhchun ram dang hâwi hen lal kan nei bâk lai,” an ti.

⁶ Samuel nih lal an ngiar mi chu a duhzia asi lo le, churawhchun LALPA sinah thla a cham le,

⁷ LALPA nih, “Mi zapi nih na sinah an deih mi zawng chu ngâi piak na ko. Nangmah an duh lo mi lâwng asi lo le, keimah tiang an lal rangah an ka duh lo mi asi.

⁸ Aigupta ram ah mi ka suakpi na mi thawk hen kan sinah mi an pial le, pathian dang tla an sawnh. Ka sinah an ti kumza hâwi hen tuah na sinah an ti mi asi.

⁹ Churuangah chun êt piak na ko le, sikhawmsele simhkannâk fâk tak pêk na le, an lal neih tla nih an nâuneh na awt mi tla khawm simhfiang na,” a ti.

¹⁰ Samuel nih a sinah lal deihtu tla chu LALPA thusim zawzawng chu a simh na.

¹¹ “Hi hi nan lal nih a nan ti na ding dân chu asi,” ti hen a simhfiang na. “Nan fapa tla chu kawrsen ah a siam na lai le, a zeimaw mi chu a râltuknâk kari khalhtu ah a siam na lai le, a zeimaw mi chu a rang tlûnah chuantu ah, a dang tla chu a kari mâilei ah tek ding hen.

¹² A zeimaw mi chu sâng hotu ah a siam na lai le, a dang tla chu sâwmnga hotu ah a siam na lai. Nan fapa tla nih a phâisen an nâwn lai le, a fâng an ât piak lai, a riamnâm an siam lai le, a kari thuamthil tla an siam lai.

¹³ Nan fanu tla nih a rangah rimthâw an siam lai le, a buh-an suangtu leh a sang siamtu an si lai.

¹⁴ Nan phâisen ṭha chem tla, nan grep dûm ṭha chem tla, nan Oliv ṭha chem tla a lâk lai le, a rianṭuantu tla a pêk na lai.

¹⁵ Nan fâng leh grep lakah mi parâ lû pakhat a lâk lai le, hotu a siam na mi leh rianṭuantu tla a pêk na lai.

¹⁶ Nan to-aw tla leh nan ranrual ṭha chem tla, nan sanatung tla a lâk lai le, amah rianṭuantu ah a mang na lai.

¹⁷ Nan ranrual lakah mi parâ lû pakhat a lâk lai le, nanmah ngelchel khawm a sal nan si lai.

¹⁸ Chubang chu a hawng tlung tikah chun nanmah thîm mi lal ruangah chun thungâi nan chipchiar lai le, sikhawmsele nan phunchiarnâk chu LALPA nih a nan theihpi na ding asi lo,” a ti.

¹⁹ Mipi tla nih Samuel thusim chu tâwm khawm an ngâi piak duh lo le, “Sikhawmsele kan duh ko,

²⁰ phun dang tla hâwitê hen kan lal nih lâi hawng kan rêl piak hen, râltuknâk ah hawng kan ruai lai le, râl kan tuk lai,” an ti.

²¹ Samuel nih an sim mi zawng â âwi le, a kal le, LALPA a simh.

²² LALPA nih a sâng le, “An duh mi lal chu pêk na ko,” a ti. Churawhchun, Samuel nih Israel mi tla chu an in leiah lâwi ding hen a simh na.