1 SAMUEL 7 - Bawm Common Language Bible Version

¹ Churawhchun, Kiriath Jearim khua mi tla nih minung pakhat a min Abinadab tlâng tlûnah a um mi in ah an va siah rawh. A fapa Eleazar chu zauhkhenhtu rangah an ruat.

Samuel Nih Israel Tla Lâi A Rêl

² LALPA Thudântuk Bâwm chu Kiriath Jearim ah hun sâwt ual kum kul ding a um. Chu karah chun Israel tla nih LALPA chu anmah ṭangpi ding hen an auh.

³ Samuel nih Israel mipi tla sinah, “LALPA leiah nan kîr ding tak asi chun nan thinlung zawzawng hen ramdang pathian tla leh pathiannu Astarte lem tla lakah nanna thliar ding asi. Nanmah tak kha LALPA sinah a pumpêk tlak ule, chu tikah Philistia thiltikhonâk ah mi chu ruang an suah na lai,” a ti.

⁴ Churawhchun, Israel tla chu Baal leh Astarte lakah mi chu anna thliar le, LALPA cho an sawnh rawh.

⁵ Churawhchun, Samuel nih Israel mi tla chu Mizpah ah a tawng ding hen a chah na le, “Chunah chun LALPA kan ngiar piak na lai,” a ti.

⁶ Churawhchun, Israel tla chu Mizpah ah anna pûm hep rawh. Tî an tan le, LALPA sinah thil ap rang ding ah an thlêt le, nî tlâk an ulh. “LALPA lakah thilsual kan ti,” an ti. (Samuel nih Mizpah ah Israel tla remlonâk thu a chek.)

⁷ Philistia tla nih Israel tla Mizpah ah anna pûm ti an theih rawh chun anmah va do ding hen Philistia lal panga anna thawh rawh. Israel tla nih chu thu chu an theih rawh chun thungâi an ningṭih le,

⁸ Samuel sinah, “Philistia mi tla lakah ruang hawng kan suah ding hen LALPA sinah thlacham kumza ko,” an ti.

⁹ Samuel nih dawrâ fa chu pum duah bâwlnâk LALPA sinah a ap. Churawhchun, LALPA sinah Israel tla ṭangpi na ding hen a deih piak na le, LALPA nih a ngiarnâk chu a sâng.

¹⁰ Samuel nih bâwlnâk a ap liauah Philistia tla nih do ding hen an fûk na. Sikhawmsele, chu liau chirah chun LALPA nih vân thawk hen khua a hawng rîtir. An ektê hen ningṭihnâk a hawng tlung le, an lâu le, an tek phin.

¹¹ Israel tla nih Mizpah thawk hen Philistia tla chu an ṭhâwl na le, Bethkar tiang an ṭhâwl na le, lampi tluan hen an thah na.

¹² Churawhchun, Samuel nih lung a lâk le, Mizpah leh Shen karah a pawng le, “Lampi tluan hen LALPA nih hawng kan ṭangpi,” a ti. Churawhchun, a min ah “Ṭangpinâk Lung” (Eben-ezer) ti hen min a phuah.

¹³ Churawhchun, Philistia tla chu an neh na rawh le, chu ri rawh chun Samuel dam kar vial chu LALPA nih Israel ram tla chu a vêng thlir.

¹⁴ Khuapi tla, Ekron leh Gath karah mi Philistia tla nih an lâk mi chu Israel tla sinah an hawng khirh nawlh le, churawhchun Israel tla nih an ram zawzawng chu anna ting rawh. Israel leh Kanaan mi kar lak khawm remnâk a um rawh.

¹⁵ Samuel nih a dam kar zawng chu Israel tla lâi a rêl.

¹⁶ Kum siar hen Bethel, Gilgal, Mizpah ah a va kal tâwn le, thunawk tla a va remh tawn.

¹⁷ Chun, a kîr le, a in leiah Ramah khua ah a tlung le, chunah khawm lâirêltu asi. Ramah khua ah LALPA rangah mâichâm a siam.