1 SAMUEL 5 - Bawm Common Language Bible Version

Philistia Mi Tla Sinah Thudântuk Bâwm

¹ Philistia mi tla nih Thudântuk Bâwm an lâk rawh chun Ebenezer sinah mi chu Asdod khua ah an kalpi.

² An pathian Dagon in ah an lûtpi le, chu milem kiangah an siah.

³ A thâizîng ah Asdod khua mi tla nih chun Dagon milem chu LALPA Thudântuk Bâwm mâika ah a bawkbukhup hen a rîl thlo mi an muh rawh chun an tung nawlh le, a mahmun lîlâ ah an siah.

⁴ A thâituan nawlh khawm ah chun milem chu Thudântuk Bâwm mâika ah a tlû fâwn. Chu tan chun a lû leh a bân khawm a kiak le; kawtkâ kiang ah a pum hen a rîl thlo.

⁵ (Churuangah asi, tutiang hen Asdod khua ah Dagon sawnhtu bâwlpu tla nih chun chu mun chu an lamh ngam lo ruangah an kanh vima.)

⁶ LALPA nih Asdod khua mi tla chu fâk tak hen a rêp na le, ningṭihnâk a pêk na. A kiangkam ah mi minung tla chu a rêp na le, ngawrnâk a pêk na.

⁷ Chubang hâwi hen thil um tla chu an muh le, “Israel Pathian nih kan pathian Dagon hen hawng kan rêp mi asi. Hi Thudântuk Bâwm hi kan siah kho ding asi lai lo rawh,” an ti.

⁸ Churawhchun, mi an fial le, Philistia lal panga a pum ding hen an kawhtir na le, “Israel Pathian Thudântuk Bâwm hi zeitin kan ti lai rawh?” ti hen thu anna deih. “Gath leiah kalpi u,” ti hen an sâng. Churawhchun, Gath ah Philistia khuapi dang an ti mi ah chun an kalpi.

⁹ Sikhawmsele, chunah an tlungpi rawh chun chu khuapi khawm LALPA nih a rêp le, zerhnâk fâk tak a pêk na. Ngâksia hen tar hen chu khua mi tla chu Pathian nih ngawrnâk fâk tak a pêk na.

¹⁰ Churawhchun, Thudântuk Bâwm chu Ekron leiah an kalpi rawh, chu chu Philistia khuapi dang pakhat asi. Sikhawmsele chunah an va tlungpi rawh chun chunah mi tla chu an âu le, “Israel Pathian Thudântuk Bâwm kanmah hawng kan thah ding hen an hawng put rawh!” an ti.

¹¹ Churawhchun, Philistia lal zawzawng sinah chun, “Israel Pathian Thudântuk Bâwm hi a mahmuntê ah va siah nawlh u, kan dâwngsung leh kanmah hawng kan thah lonâk ding hen,” an ti. Pathian nih fâk tak hen a rêp na ruangah ram pumpi an ningṭih hep.

¹² A thi lo mi tla khawm an ngawr hep le, zapi tla chu an pathian ṭangpi ding hen an auh.