1 SAMUEL 4 - Bawm Common Language Bible Version

Thudântuk Bâwm Lâknâk

¹ Chu liau chun Philistia tla chu Israel tla do ding hen anna pûm le, churuangah Israel tla chu anmah do ding hen anna thawh rawh. Israel tla chu Ebenezer ah um mun an khuar le, Philistia mi tla chu Aphek ah mun an khuar.

² Philistia tla nih an do le, thungâi anna do nûnah Israel tla rangah an neh na le, râltuknâk mun ah sâng lî an thah na.

³ A thibang tla an mun ah an hawng kîr nawlh rawh chun Israel ruitu tla nih, “Zei rangah tusûn ni ah LALPA nih kanmah nehtu ding hen Philistia mi tla a siam na zia? Siloh ah mi LALPA Thudântuk Bâwm kan va lâk lai, chu tikah kan sinah a hawng bâk lai le, kan mêlma lakah hawng kan suah kho ding hen,” an ti.

⁴ Churawhchun, Siloh leiah chun mi an fial le, LALPA Thudântuk Bâwm, LALPA zeizawng tikho laltophah ruangrûl ah um mi chu an va lâk rawh. Eli fapa panih Hopni leh Phinehas khawm Thudântuk Bâwm an lâk mi rual hen an hawng bâk.

⁵ Thudântuk Bâwm an tlengpi rawh chun Israel tla anna lâwm ruangah an âu hâu nih tual a tlirh rê.

⁶ Philistia tla nih âu hâu chu an theih le, “Ngâinik u! Hebrai tla an riakmun ah an âu chiam mi chu zei zia mesi?” an ti. LALPA Thudântuk Bâwm Hebrai tla umnâk ah an hawng tlengpi mi asi ti an theih le,

⁷ thungâi an lâu rawh, “Pathian an umnâk ah a hawng ma chu! Kan vei rawh! A lânah hi hâwi kan lakah a um dah loh!

⁸ Chubang hâwi Pathian thiltikho tla lakah mi chu âunih ruang hawng kan suah lai rawh? Chubang tla Pathian chu Aigupta ramkaro ah thahtu tla an si!

⁹ Nan râl ṭhattir u, Philistia mi tla! Minung do hâwi hen do na ule, chu hâwi asi lo chun kan sal an si hâwi hen an sal ah kan um sual lai. Churuangah minung do hâwi hen do na u!” an ti.

¹⁰ Philistia tla nih chun an chelh rî hen Israel in leiah tek rawh mi tla chu an do chiam na le, an neh na rawh. Thahnâk rokual tak a um le, Israel kawrsen sing thum an thah na.

¹¹ Pathian Thudântuk Bâwm khawm an lâk piak ving na le, Eli fapa Hopni leh Phinehas khawm an panih hen an thah na.

Eli thihnâk

¹² Minung pakhat Benjamin phun ah mi chu tuknâk thawk hen Siloh khua leiah a hawng tek le, chu ni lîlâ ah a va tlung rawh. A ngaihsiat theihnâk ding hen a puan tla a thlêk le, a lû ah valei a phulh.

¹³ Eli, Thudântuk Bâwm lungkhamtu chu lamvâu ah a to ko le, a chuanh na ko. Chu minung nih thâwngthâng a hawng zanh le, mi tla chu ningṭih ruangah an ṭap rawh.

¹⁴ Eli nih chu rihâu tla chu a theih le, “Chu rihâu tla chu zei zia?” ti hen a deih na. Chu minung nih chun Eli chu mawhsareh hen thâwngthâng chu a simh.

¹⁵ (Eli chu kum sâwmkua leh kum riat asi rawh, khua khawm a muh chiam lo rawh.)

¹⁶ Chu minungpa nih chun, “Râltuknâk thawk hen hawng suak kasi le, tusûn ah hi mun tleng ko hen ka hawng tek mi asi,” a ti. Eli nih a sinah, “Ka fapa, zei hâwi hen asi ne?” ti hen a deih.

¹⁷ Thu thanhtu nih a sâng le, “Philistia tla lakah Israel tla an zâm le; hawng kan neh zia thungâi a fâk! Chu lo khawm na fapa Hopni leh Phinehas khawm an thah le, Pathian Thudântuk Bâwm khawm an lâk ving!” a ti.

¹⁸ Chu minungpa nih Thudântuk Bâwm a hawng sim kâ hen kulh kawtkâ kiangah Eli a to mi chu a dunglei ah â ân le, a tlû. Amah khawm thungâi atar le, a bit tuk le, a chelhlo rawh le, a tlûknâk ah a ngâwng a kiak le, a thi rawh. Israel tla lakah kum sâwmli kar chu ruitu ah a um.

Phinehas Nupi Roh Thihnâk

¹⁹ Eli monu, Phinehas nupi chu a râi, a fa ring thla a tling dêng rawh. LALPA Thudântuk Bâwm an lâk mi thu leh a ṭangpa leh a pasal thih thu a theih le, mawhsareh hen a ngânfâk le, fa a ring.

²⁰ A thi awt bâiah nau dawmhtu nih a sinah, “Lâu lah, fapa na ring hi!” a ti. Sikhawmsele, a thu chu a ngâi piak lo le, a sâng khawm a sâng lo.

²¹ Chu mipa ngâksia min chu Ikabod a sak le, “Pathian rokualnâk nih Israel a kaltâk,” tinâk asi. Thudântuk Bâwm an lâk mi leh a ṭangpa leh a pasal thih thu suangkhâng hen.

²² “Pathian rokualnâk nih Israel a kaltâk rawh,” a ti le, “Pathian Thudântuk Bâwm an lâk ving ruangah,” a ti mi asi.