1 SAMUEL 30 - Bawm Common Language Bible Version

Amalek Mi Tla Rangah Donâk

¹ Ni nih nûnah David leh a mi tla chu Ziklak ah hawng tlung, Amalek mi tla nih Juda ram simlei leh Ziklak khua an do. Khua an duah le,

² nunau tla an kalpi na, pakhat khawm an thah na lo.

³ David leh a mi tla an hawng tleng le, khua chu duah hep hen an muh, an nupi tla, an fapa leh fanu tla an kalpi hep na.

⁴ David leh a mi tla chu bâng lo hen uai tep rê hen an ṭap.

⁵ David nupi Abigail leh Ahinoam khawm an kalpi ving,

⁶ David chu thungâi a lawksawng, a mi le tla khawm an fa tla an thlâu ver na ruangah an lung a fâk thlo ruangah David rangah lung hen seh ding an awt; sikhawmsele LALPA a Pathian nih a râlṭhattir,

⁷ David nih Ahimalek fapa bâwlpu Abiathar sinah, “Bâwlpu kawrfual kha hawng ka pêk nik,” a ti. Abiathar nih a pêk,

⁸ David nih LALPA sinah, “Rûntu tla chu ka ṭhâwl na hen ka tleih na lai ma?” a ti. LALPA nih a sâng le, “Ṭhâwl na le; na tleih na lai le, an tleih mi khawm suh hep na,” a ti.

⁹ David leh a minung zaruk chu anna thawh rawh. Besor tiva an tlung rawh chun, a zeimaw mi chu chunah chun an um,

¹⁰ David chu a minung zali tla hen a kal vima rih, zanih chu tiva kanh ding an dî tuk le, dunglei ah an um ko,

¹¹ David minung tla nih Aigupta mi mipa ngâksia, ram ah an va tawng le, David sinah an hawng put. Buh leh tî leh

¹² theipi châr, grep rah châr sûr nih an pêk. A ei rawh chun a hawng a panh rawh, ni thum kar chu zeikhawm din leh ei lo hen a um mi asi.

¹³ David nih, “Nan hotu âu, zei thawk hen hawng mi me na si?” ti hen a deih. Anih nih a sâng le, “Aigupta minung Amalek to-aw kasi,” a ti. “Ka dam lo ruangah ka pu nih hawng ka mâk thlap le, a dunglei ah ni thum ka um rawh.

¹⁴ Keret, Judai ram simlei kângah um tla leh Kaleb thlâk tla ram kan rûn le, Ziklak khua tla kan duah,” a ti.

¹⁵ David nih, “Chu rûntu tla murui sinah na hawng ka kalpi kho lai ma?” ti hen a deih. Anih nih a sâng le, “Na ka thah lo ding hen leh ka pupa sinah na ka pêk lo ding hen Pathian sinah thu a tiam,” a ti.

¹⁶ David chu an sinah a kalpi rawh. Rûntu tla chu Philistia mi leh thil tam tak an lâk mi tla ruangah puai an tuah le, din leh ei hen mun kip ah anna rekrâwi ver.

¹⁷ David nih chun khuadei rianruan thawk hen a thâizing zânlei tiang hen annih chu a do na. Tlangvâl zali sangâwngsâu tlûnah anna chuan mi an tek mi cho lo chu pakhattê khawm an suak lo.

¹⁸ David nih Amalek mi tla nih an lâk mi leh a nupi panih khawm an suh nawlh hep na.

¹⁹ Zeikhawm a vei mi a um lo. David chu a mi tla, fanu fapa tla leh Amalek mi nih thil an lâk mi zawng a suh na le, an kîr rawh.

²⁰ David nih ran leh ranrual zawzawng a mahmuntê hen a tawng nawlh le, a mi tla nih ran tla chu an mâilei ah an khalh le, “Hi hi David tâ asi! ” an ti.

²¹ David chu a minung zanih tla an chelh lo le, dunglei ah Besor tiva ah an um mi tla sinah a va kîr nawlh rawh. Annih tla nih David leh a minung tla chu an dawng na le, David chu an sinah a va kal le, lâwm tak hen chibai a bûk na.

²² Sikhawmsele, David sinah kal mi tla lakah mi thinlung tling lo leh mi rualo tla nih, “Kan sinah mi kan thil lâk tla zeikhawm kan pêk na lai loh, an nupi leh an fa lam chu lâk na sele kal ko na seh,” an ti.

²³ Sikhawmsele, David nih, “Ka unau tla, LALPA nih hawng kan pêk mi lakah hi hâwi hen nan ti kho ding asi lo! Hawng kan hum hen rûntu tla lakah nehtu ah hawng kan siam asi.

²⁴ Nan sim mi chu âukhawm nih rem an ti lai loh! Bang khap hen kanna ting ding asi: dunglei ah thil ngâktu leh tuknâk ah kal mi tla kan vo bang hep kan tawng ding asi,” a ti.

²⁵ David nih hi dân a siam mi hi Israel mi tla nih an zûl kumza rih.

²⁶ David chu Ziklak a va tleng le, a thil zeimaw zat ding chu a hâwi Juda tla lakah ruitu rangah thuchah hen a kuat na le, “Hi hi LALPA mêlma tla lakah kan lâk mi thil nan rangah kan kuat na mi asi,” a ti.

²⁷ Bethel ah um mi tla sinah, Judai simlei kâng ram ah um mi tla leh Jatir khua ah um mi tla,

²⁸ Aroer, Sifmoth, Estemoa

²⁹ leh Rakal, Jerahmil thlâk tla sinah, Kenit mi tla sinah,

³⁰ Hormah khua mi tla sinah, Borasan, Athak,

³¹ Hebron leh amah leh a mi tla an va kalnâk ram ah a kuat na.