1 SAMUEL 3 - Bawm Common Language Bible Version

LALPA Chu Samuel Sinah A Langh

¹ Ngâksiatê Samuel nih Eli rui hen LALPA rian a ṭuan liauah chun LALPA thawk hen thu theih leh muhnâk tla a tam chiam lo.

² Eli a mit a muh kho lo rawh mi chu a in sung kardang ah a it le,

³ Samuel chu mun thenhlimh Thudântuk Bâwm umnâk ah a it; khuadei lântê ah meichêu khawm a chêu ko liauah LALPA nih Samuel chu a kawh.

⁴ Samuel nih a sâng le, “Zei me Pu?” a ti.

⁵ Eli sinah a va kal le, “Na ka kawh ma? Hinah ka um,” a ti. Eli nih a sâng le, “Ka nan kawh lo, na itnâk mun ah va kal rawh,” a ti. Churawhchun, Samuel chu a itnâk mun leiah a kal rawh.

^6-7 LALPA nih Samuel chu a kawh fâwn le, chu ngâksia nih chun LALPA asi ding hen a ruat lo, a lânah LALPA nih a sinah thu a sim dahlo rih ruangah. Churuangah a thawk le, Eli sinah, “Na ka kawh mu? Hinah ka um ko hi,” a ti. Sikhawmsele, Eli nih a sâng le, “Ka fapa, kan kawh lo, na ihkhun leiah kal ko,” a ti.

⁸ LALPA nih Samuel chu a vei thumnâk ah a kawh fâwn; a thawk le, Eli sinah a va kal fâwn le, a sinah, “Na ka kawh mu? Hinah ka um ko hi,” a ti. Churawhchun, Eli nih ngâksia kawhtu chu LALPA asi ti a theih rawh.

⁹ Churawhchun, a sinah, “Na ihkhun ah va kîr le, a nan kawh nawlh chun, ‘LALPA, thu sim rawh, na to-aw nih ka ngâi ko,’ ti rawh,” a ti. Churawhchun, Samuel chu a ihkhun leiah a kîr nawlh rawh.

¹⁰ LALPA a hawng kal le, chunah chun a va dîr; a lânah a kawh mi hâwi hen, “Samuel! Samuel!” a ti. Samuel nih a sâng le, “Thu sim rawh, na to-aw nih ka ngâi ko,” a ti.

¹¹ LALPA nih a sinah, “Zei tik ni ah mawh chun Israel mi tla lakah thil ṭihnungkâi ka ti awt, chu thu theihtu vial chu an nâ a dêng lai.

¹² Chu ni ah chun Eli dâwngsungkhur lakah thil ṭihnungkâi ka hawng suah awt, a bul thawk hen a dawngh tiang hen.

¹³ A fapa tla nih thilsual an ti ruangah leh keimah an hawng ka simsiat ruangah an dâwngsungkhur tla ka rêp na awt ti amah ka simh rawh hâwi hen. Eli nih chubang thil a fa le nih an ti mi chu a theih ko, khawmsele a khap na lo.

¹⁴ Fiang tak hen Eli dâwngsungkhur tla nih chun bâwlnâk leh thil ap hen chu thil ṭihnungkâi chu veih ding hen hawng ka pêk na khawmsele tikho asi lai loh,” a ti.

¹⁵ Samuel chu khuadei tiang ihkhun ah a it le, churawhchun a thawk le, LALPA in kawtkâ tla a awng. Chu muhnâk thil chu Eli simh ding a ṭih.

¹⁶ Eli nih a kawh le, “Ka fapa, Samuel!” a ti. Samuel nih a sâng le, “Zei me pu?” a ti.

¹⁷ “LALPA nih zei me an simh? ti hen Eli nih a deih. “Ka lakah zeikhawm pheh lah, LALPA nih thu a sim mi na pheh chun fâk tak hen a nan rêp lai,” a ti.

¹⁸ Churawhchun, thil zawzawng a simh hep, zeitê khawm a pheh loh. Eli nih, “LALPA asi mi chu, ṭha hen a ruat mi zawng a ti lai ta a!” a ti.

¹⁹ Samuel chu a hawng lian vima le, a thusim zawng chu a dik vima.

²⁰ Churawhchun, Israel mi zawzawng khatlei ram dawng thawk hen khatlei kâng dawngh tiang nih Samuel chu LALPA khuavâng asi ti an theih tatak rawh.

²¹ LALPA chu Siloh ah â langh vima le, Samuel sinah â langh kip ah thu a sim. Samuel nih chu thu chu a sim liauah Israel mi zawzawng nih an ngâi.