1 SAMUEL 26 - Bawm Common Language Bible Version

David Nih Saul Nungnâk A Zuah Nawlh

¹ Ziph khua mi tla Gibeah ah Saul sinah an hawng le, David chu Juda ram kiangah mi ramkaro Hakilah Tlângah â thup le, a um ko ti an simh.

² Saul nih Israel lakah a kawrsen a ṭha chem mi sâng thum a put na le, David hâwl ding hen Ziph ramkaro ah a kal.

³ Saul chu Hakilah tlângah mi lampi kiangah mun a khuar. David lam chu ramkaro ah a um ko rih. Saul nih a hâwl ti a theih rawh chun

⁴ David nih zauh thlingthlâktu a fial le, Saul chu chunah a hawng taktê.

⁵ David chu Saul leh Ner fapa Abner, a kawrsen hotu riaknâk mun takah a va kal. Saul chu riakmun lâi chirah a it le, a minung tla nih an kulh dak.

⁶ Churawhchun, David nih Hit mi Ahimelek sinah leh Joab unaupa Abisai sinah, (an nu chu Zeruiah asi) “Saul riakmun ah nan panih lakah zei mi nih nan hawng ka zûl lai?” a ti. Abisai nih a sâng le, “Keimah nih kan zûl lai,” a ti.

⁷ Churawhchun, chu zân ah David leh Abisai chu Saul riakmun ah an va lût le, Saul chu riakmun lâi ah a it le, a lû kiangah fei a phun mi an muh. Abner leh kawrsen dang zawzawng chu a kiangah an it riap.

⁸ Abisai nih David sinah, “Tuzân hin na mêlma chu Pathian nih na kut ah an pêk rawh. Tuah amah fei tak hen hawng ka sunhtir le, nawlh lo ding hen tual ah veikhat ah bêk tlak hen ka sunh lai,” a ti.

⁹ Sikhawmsele, David nih, “Nganfâk pêk rîlmâl lah! A lalchem thîm nganfâk pêktu chu Pathian nih a rêp ngelchel bâk lai,” a ti.

¹⁰ David nih a sim vima le, “LALPA a nung mi min sal hen ka sim asi, Saul chu amah thihnâk ni ding ah mawh râltuknâk ah LALPA nih a thah awt ti ka theih.

¹¹ LALPA nih a lalchem thîm nganfâk pêk lo ding hen hawng ka khap asi. A tî dûr leh a fei kha kan lâk lai le, kan kal ko lai,” a ti.

¹² Churawhchun, David nih Saul lû kiangah mi tî dûr leh fei chu a lâk le, Abisai hen chun an kal rawh. LALPA nih ihmu thâwtnâk a pêk na ruangah âukhawm nih an muh hen an theih na lo, ihmu thaw tak hen an it hep.

¹³ Churawhchun, David chu varâl leiah a kal le, râl lât ual tlâng tlûn khet ah a va kal le,

¹⁴ Saul kawrsen tla leh Abner rangah a auh na, “Abner! Na hawng ka theih ma?” a ti. Abner nih, “Zei minung me lalchem rangah âu leh ṭhanghtu chu?” a ti.

¹⁵ David nih a sâng le, “Abner, Israel lakah hotu chem na si lo ma? Zei rangah na pu lalchem rangah ṭhadek hen na vêng lo? Tuko khan âumawh na pupa thah ding hen riakmun ah a hawng lût.

¹⁶ Na rianṭuan ding mi na palh thlo, Abner! LALPA, a nung mi min sal hen ka sim asi, nan pu LALPA nih lalchem ah a thîm mi ṭhadek nan vêng lo ruangah nan ektê hen thi tlâk nan si. Zauh! Zeiah lalchem fei a um? A zeiah a lû kiang mi tî dûr a um?” a ti.

¹⁷ Saul nih David hâu chu a theih le, “Ka fapa, David na maw na si?” a ti. David nih a sâng le, “Mah ta a, Bâwipa,

¹⁸ zei rangah na to-aw hi na hawng ka ṭhâwl nget rih? Zei thil me ka ti? Zei thilsual me ka ti?

¹⁹ Churuangah Bâwipa, ka thu sim hawng ka ngâi piak. Keimah hawng ka dotu ding hen LALPA nih an ruat mi asi chun, a sinah thil ap nih a thinlung dangtir seh; sikhawmsele minung nih a ruat mi asi chun LALPA nih an lakah siat tlungtir seh. LALPA ram ah mi chu an hawng ka nar le, pathian dang cho sawnhnâk mun ah um ding hen an ka tuah ruangah.

²⁰ LALPA ram ah mi tek hen ram dang ah thah hen hawng ka umtir rîlmâl lah seh. Kei, uirik tluk cho mi thah ding hen Israel lalchem chu zei rangah a hawng zia? Mâng ah mi vâ an râl hâwi hen zei rangah hawng ka râl?” a ti.

²¹ Saul nih, “Ka palh thlo asi. Ka fapa David, hawng kîr! Nganfâk kan pêk lai lo rawh, tuzân ah ka nungnâk na zuah ruangah. Ka â ngâk! Thil ṭihnungkâi tak ka ti rawh asi,” a ti.

²² David nih, “Bâwipa, hinah na fei a um ko, na minung pakhat hawng fial le, hawng lâk seh.

²³ LALPA nih chun mirep leh mi zumhkâi tla rangah lâwmman a pêk na, tusûn ah ka kut ah a nan pêk le, sikhawmsele, LALPA nih lalchem ah a nan siam mi chu riam kan banh duh loh.

²⁴ Tusûn ni ah na nungnâk ka zuah mi hâwi hen, LALPA nih ka lawksawngnâk zawzawng lakah mi hawng ka hum seh!” a ti.

²⁵ Saul nih David sinah, “Ka fapa, LALPA nih mal an sâwm seh! Thil na ti mi zawzawng lakah dingchangnâk na tawng lai,” a ti. Chun, David chu a kalnâk ding leiah a kal le, Saul khawm in leiah a kîr rawh.