1 SAMUEL 25 - Bawm Common Language Bible Version

Samuel Thih Thu

¹ Samuel chu a thi le, Israel mi zawzawng anna pûm le, an ulh. Ramah a umnâk khua ah an vûi. Chu nûnah chun David chu Paran ramkaro ah a va kal.

David leh Abigail

^2-3 Minung pakhat Kaleb thlâk ah mi a min Nabal a um le, amah chu Maon khua mi asi le, Karmel khua kiangah mun a nei. Amah chu mi nei tak asi, dawrâ sâng thum leh kêl sâng khat a nei, a nupi Abigail chu mêlṭha tak leh fing tak asi, sikhawmsele a pasal lam chu mi thin ṭhalo tak asi.

⁴ David nih ramkaro thawk hen Nabal nih Karmel ah a dawrâ mul a mêt ti thu a theih le,

⁵ Churawhchun, David nih tlangvâl parâ Nabal sinah a chibai bûk mi thu va simh ding hen a fial na.

⁶ Nabal sinah thusim ding a chah na le: “David nih ka hâwipa, a dâwngsung tla leh a sinah um mi zawzawng chibai ka bûk a nan ti,” an ti.

⁷ “David nih dawrâ mul na mêt ti a theih le, hinah na dawrâ vêngtu tla khawm zeitin khawm kan ti na lo zia na theih ding kan duh. Karmel ah an um kar vial chu an lakah mi zeikhawm a tlâu lo.

⁸ Ka hawng fial na mi tlangvâl tla hi deih na nik, an simh ko lai,” a ti. “Na puaituah ni takah kan hawng tleng le, na kâwi duhtak David nih kan lakah vêl na nei hen na to-aw tla leh na kâwipa rangah zângfahtê hen na ti kho rirî hawng kan pêk ding hen a nan ngiar a ti,” an ti.

⁹ David nih Nabal rangah thu a chah mi chu an va simh, chunah chun an ngâk ko le,

¹⁰ Nabal nih a nehnûnah a sâng le, “David chu âu mesi? Chu minung chu ka theih dah loh! Tu liauah ram lakah sal a tek mi thungâi an tam.

¹¹ Ka dawrâ mul mêttu tla rangah ran ka thah mi leh ka buh leh tî tla hi a zei ram thawk hen an hawng kal ti khawm theih dahlo mi minung tla rangah ka pêk na awt rîlmâl lo!” a ti.

¹² David mi tla chu a sinah an va kîr nawlh le, Nabal thusim tla a sinah an va simh.

¹³ Chun David nih a mi tla sinah, “Nan nâmsâu tla pâi chiau u,” a ti le, an pâi chiau. David khawm nih a nâmsâu a pâi bâk le, minung zali hen anna thawh le, ei bâr, thil-le-rî mi zanih dunglei ah an mâk na.

¹⁴ Nabal to-aw pakhat nih Nabal nupi Abigail sinah, “David nih ramkaro thawk hen kan pupa rangah chibai buk ding hen mi a hawng fial na mi a siarlo thlo mi na theih ma?

¹⁵ Annih tla chu thungâi kan lakah an ṭha le, zeitin khawm hawng kan ti lo, chu phâisen ah an sinah kan um kar vial chu kan neih âukhawm nih an fîr lo.

¹⁶ A sûn a zân hen kan ran tla zauhkhenh hen hawng kan vêng rêt.

¹⁷ Hi thu hi zei hâwi ti ding asi awt, zângfahtê hen ruat. Hi hi kan pupa leh a dâwngsung tla rangah ṭihnung kâi tak khawm asi kho, kan pu chu mi lungkhung tak asi le, âu thu khawm ngâi duh lo mi asi!” a ti.

¹⁸ Abigail nih mawhsareh hen sang tlang zanih, savun uain dûr nih, dawrâ sa em mi panga, sang rêu mi kilogramme leisarih, grep châr sûr zâ leh cake zanih theipi rah châr hen siam mi chu sanatung a phurhtir.

¹⁹ A to-aw tla sinah, nannih mâilei ah kal masa ule, nan dung leiah kan zûl na lai,” a ti na, a pasal sinah zei thu khawm a sim lo.

²⁰ Abigail chu sanatung tlûnah â chuan le, tlângah a kal liau chirah David leh a mi tla amah leikângah an hawng mi hen anna tawng sut rawh.

²¹ David nih a thinlung hen ruat dân chun, “Hi bang hâwi minung neih le siah hi ramkaro ah ka vêng piak êu me, hi tluk ka ṭangpi mi lakah hi hâwi hen hawng ka ti!

²² Thâizîng khuadei lânah pakhat khawm âk lo hen chu minung tla chu ka thah na lo bâk chun Pathian nih hawng ka vuak seh!” a ti.

²³ Abigail nih David a muh kâ hen, sanatung tlûnah mi chu a ṭum sawm le, David kebul ah

²⁴ a kûn le, a sinah, “Pu, zângfahtê hen ka thu hawng ka ngâi piak, thangsiat phurhnâk chu keimah tlûnah um seh.

²⁵ Zângfahtê hen Nabal thu rerêng ngâi piak lah, zeikhawm a ṭhatnâk a um lo! A min put dawdawh hen mi â asi! Pu, na to-aw na hawng fial liau khan ka um lo hen â dêng.

²⁶ Na mêlma tla na thah liauah an humtu chu LALPA asi, tuah LALPA nung mi min sal hen thu ka tiam asi. Nang rangah nganfâk pêk ding an tumtu chu Nabal hâwi hen rêp an si lai.

²⁷ Zângfahtê hen Pu, lâwmman ka nan put piak mi hi hawng ka lâk piak le, na mi tla rangah pêk na.

²⁸ Pu, thil ka palh mi tla chu zângfahtê hen hawng ka ngaihdam. Na damsung zawzawng thilsual tilo hen LALPA rangah râl dotu na si ruangah nang leh na thlâk tla chu lal ah an siam na lai.

²⁹ Mi nih thah ding hen an do khawmsele LALPA na Pathian nih ro sung tak mi nih a vêng hâwi hen a nan kil lai. Na mêlma lam chu zei ti khawm hen lung sehnâk hen lung tlang an seh ving mi hâwi an si lai.

³⁰ LALPA nih thil ṭha zawzawng leh Israel lal siding hen a nan tiamh mi a ti tikah chun

³¹ lehrûl sam hen a san umlo hen mi na thah lo ruangah lawksawng leh ngaihsiatnâk lam chu na nei lai lo rawh. Pu, zângfahtê hen LALPA nih mal an sâwm tikah chun hawng ka philh rîlmâl lah,” a ti.

³² David nih a sinah, “LALPA, Israel Pathian, tusûn ah ka sinah a nan fialtu chu sawr hen um seh!

³³ Na ruatdân thiam hen tusûn ah thil na ti mi nih hin lehrûl samnâk leh mi ka thah ding mi hawng ka lêttir ruangah Pathian sinah lâwmthu um seh.

³⁴ Nangnih mawhsareh hen hawng ka dawng lah le chu Nabal minung zawzawng chu zînglei ah thah hep na ding hen Israel Pathian nung min hen thu ka tiam ving rawh. Sikhawmsele, LALPA nih nganfâk an pêk na lo ding hen hawng ka khap asi.

³⁵ Churawhchun, David nih chun a put piak mi zawng chu a lâk piak le, a sinah, “Na in leiah kîr le, zeikhawm lawksawng lah, na duh mi chu kan ti piak lai,” a ti.

³⁶ Abigail chu Nabal sinah a kîr le, Nabal lam chu lal hâwi hen puai a tuah le, zû a rî le, nuam but hen a um. Churuang chun a thâizîng khua a dei lânlo chu zeikhawm a simh lo.

³⁷ Churawhchun, a hawng fîm nûnah thil zeizawng a simh rawh. Nabal chu veikhat ko ah a mawlh thlo le, châng khawm a châng kho lo.

³⁸ Ni râ nûnah chun Nabal chu LALPA nih a vuak le, a thi rawh.

³⁹ David nih Nabal thih thu a theih rawh chun, “Nabal hawng ka siarlotu lakah lehrûl sam ding mi leh thil diklo ti ding mi lakah a to-aw hawng ka humtu LALPA chu sawr hen um seh!” a ti. Chun, David nih Abigail hen umh ding mi thu ah mi a fial.

⁴⁰ David to-aw tla chu Karmel ah an va kal le, Abigail sinah, “David nih a nupi siding hen a sinah an put ding hen hawng kan fial,” an ti.

⁴¹ Abigail chu tual ah a kûn le, “Kei a to-awnu kasi, to-aw kê tla ṭâwl ding ka tîm kumza,” a ti.

⁴² A thawk sawm le, a sanatung tlûnah â chuan rawh. A to-awnu panga tla nih an zûl le, David to-aw tla chu a zûl na le, a nupi ah a va um rawh.

⁴³ David nih Ahinoam Jezreel ah mi chu a umpi rawh le, tuah Abigail khawm chu a nupi asi rawh.

⁴⁴ Chu liau chun Saul nih Mikal, David nupi chu Galim khua mi Lais fapa Palti rangah a pêk tâk ving.