1 SAMUEL 23 - Bawm Common Language Bible Version

David Nih Keilah Khua A Hum

¹ David nih chun Philistia mi tla nih Keilah khua an do le, an fâng thar ât mi tla an lâk piak hep na ti a theih.

² Churawhchun, LALPA sinah, “Philistia tla chu kal hen ka va do na lai ma?” ti hen a deih. LALPA nih a sâng le, “Kal le, Keilah khua chu va hum rawh,” a ti.

³ Sikhawmsele David mi tla nih a sinah, “Hi Juda ram ah kan um mi men hi kan rangah ṭihnung a kâi mi, Keilah khua ah Philistia tla va do ding châng chu kan rangah ṭihnung a kâi khun awt! ” an ti.

⁴ Churawhchun, David nih LALPA rangah a deih nawlh le, LALPA nih a sinah, “Keilah khua tuknâk ah va kal le, Philistia nehtu ah kan siam lai,” a ti.

⁵ Churawhchun, David leh a mi tla chu Keilah ah an va kal le, Philistia tla rangah an do na rawh, tam tak an thah na le, an ran tla an lâk piak na. Chu khua chu David nih ruang a suah rawh.

⁶ Ahimelek fapa Abiathar chu David sinah a hawng tek liauah khan bâwlpu kawrfual a hawng put.

⁷ David chu Keilah khua ah a kal ti chu Saul rangah an simh le, Saul nih, “Pathian nih ka kut ah a pêk rawh mi ma chu, David chu kulhnei leh kawtkâ nei mi khua ah khumh hen â awh rêng rawh dangâiah,” a ti.

⁸ Churawhchun, Saul chu a kawrsen rual chu David leh Keilah khua mi chu hual na hen va tuk na ding hen a kawh na.

⁹ David nih chu hâwi hen Saul nih thilti a tum mi a theih rawh chun, David nih bâwlpu Abiathar sinah “Kawrfual kha hinah hawng put nik,” a ti.

¹⁰ Churawhchun, David nih “LALPA, Israel Pathian, Saul chu na to-aw keimah ruangah Keilah râwk ding a tum tih ka theih.

¹¹ Keilah khua mi tla nih hin Saul kut ah an hawng ka pêk lai ma? Ka theih mi hâwi hen Saul a hawng awt tatak ma? LALPA, Israel Pathian, hawng ka sâng ding hen kan ngiar!” a ti. LALPA nih a sâng le, “Saul a hawng kal awt,” a ti.

¹² David nih, “Keilah khua mi tla nih kei leh ka mi tla hi Saul kut ah an hawng kan pêk lai ma?” ti hen a deih nawlh. LALPA nih a sâng le, “An pêk lai,” a ti.

¹³ Churawhchun, David leh a mi tla zaruk nih chun Keilah chu an kaltâk le, mun dangah anna ṭhial rawh. Saul nih David chu Keilah khua mi a suak rawh ti a theih rawh chun a thiltum chu a lêt ving.

David Chu Tlâng Ram Ah

¹⁴ David chu tlâng ram Ziph ramkaro kiangah â thup le, a um ko. Saul nih a hâwl kumza le, sikhawmsele Pathian nih a kut lakah a pêk lo.

¹⁵ David nih Saul chu amah thah ding hen a muh le, David chu Ziph ramkaro kiangah mi Hores ah a um.

¹⁶ Jonathan chu chunah a va kal le, Pathian vêng a sizia ti hen thla a ngamh le,

¹⁷ a sinah, “ṭih rîlmâl lah. Ka pa Saul nih nganfâk an pêk kho rîlmâl lai lo, Israel lalchem na siding khawm fiang tak hen a theih asi. Nangmah sangtu chu kei kasi awt ti khawm a theih ko,” a ti.

¹⁸ Chu panih nih chun hâwikawmh siding hen thutiamnâk thenhlimh an nei. David chu Hores ah a um le, Jonathan chu in leiah a tlung.

¹⁹ Mi zeimaw mi Ziph thawk hen Saul Gibeah ah a um mi sinah an va kal le, a sinah “David chu Juda ram simlei kângah mi mun pakhat Hakilah tlângah kan ram ah Hores khua ah â thup ko.

²⁰ Pu, amah chu thungâi tleih ding na duh ti kan theih, churuang chun kan ram ah hawng le, kan tleihtir ko lai,” a ti.

²¹ Saul nih a sâng le, “Thungâi ka lakah vêl nan nei ruangah Pathian nih mal an sâwm na seh.

²² Va kal ule, fiang tak hen va zauh u, fiang tak hen zeiah a um, âunih a muh va theih u, thungâi hen a fing ti ka theih.

²³ A thupnâk mun tak hâwl ule, a thâwngthâng hawng ka simh phêt u. Churawhchun, nan sinah ka hawng lai le, chu mun ah a um nget rih asi chun, Juda ram pumpi va hâwl lo hen ka thah ko lai,” a ti.

²⁴ Churawhchun, anna thawh le, Saul lânah Ziph khua leiah chun an kîr rawh. David leh a mi tla chu Maon ramkaro ah Juda ram simlei kâng tivakuam âukhawm an umlonâk ah an um ko.

²⁵ Saul leh a mi tla chu David hâwl hen an kal le, khawmsele, David nih thâwng a theih le, Maon ramkaro lung mun tlângah a kal le, chunah a va um. Saul nih chu thu chu a theih le, David rangah a ṭhâwl rawh.

²⁶ Saul leh a mi tla chu khatlei râl tlângah an um le, David leh a mi tla khatlei râl ah an um mi hen chun anna lât ving. Saul kiangah naih tek an um le, tleih sek ding an um mi chu anna lât ving rawh.

²⁷ Chu liau tak chun mifial pakhat Saul sinah a hawng le, a sinah, “Hawng kîr rih! Philistia tla nih kan ram an rûn!” a ti.

²⁸ Churawhchun, Saul chu David a ṭhâwl mi chu a mâk le, Philistia do ding hen a kîr rawh. Churuangah asi chu mun chu Thleinâk Tlâng (sela hamalekot) an ti mi chu.

²⁹ David chu chu thawk hen a kal le, Engedi thupnâk mun ah a um rawh.