1 SAMUEL 22 - Bawm Common Language Bible Version

Bâwlpu Tla Thahnâk

¹ David chu Gath khuapi thawk hen a suak le, Adulam khua kiangah mi pûk ah a kal. Chunah a um mi chu a dâwngsung leh a unau tla nih an theih le, an va kal bâk.

² Minung nehsawh hen an um mi leh lei a nei mi mawh buh ei ding nei lo tla chu a sinah an va kal bâk le, an ektê hen zali ding an si, chubang tla lakah David chu hotu ah a um.

³ David chu, chu thawk hen Moab ram ah mi Mizpah khua ah a va kal le, Moab lalchem sinah, “Zângfahtê hen ka nu leh ka pa hi Pathian nih ti ding hen hawng ka duh mi ka tawng lânlo chu na sinah umtir na râu rawh,” a ti.

⁴ Churawhchun, David nih a nu leh a pa chu Moab lalchem sinah a siah na le, David chu pûk ah â thup kar vial chu chunah an um.

⁵ Khuavâng Gad chu David sinah a hawng le, a sinah “Hinah um ko lah, Juda ram ah kal sawm,” a ti. Churawhchun, David chu a thawk le Hereth tûmun ah a va kal.

⁶ Ni khat chu Saul chu Gibeah khua ah a um liauah tlângah mi Tamari thing tangah fei put bû hen a to le, hotu a siam na mi tla chu a kiangkam ah an dîr pung.

⁷ David leh a mi tla chu an tawng na rawh ti hen Saul an simh le, anih nih hotu a siam na mi tla sinah, “Benjamin mi tla, Ngâi u! David nih grep dûm leh phâisen a nan pêk na hen, a kawrsen hotu ah a nan siam na ding hen ma nan ruat?

⁸ Churuangah asi lo ma, nan ka phiar mi? Ka fapa leh David anna kêp mi khawm pakhat khawm nih nan hawng ka simh lo. Kei rangah âukhawm nih siherhnâk nan nei lo, ka minung lakah David nih keimah thah ding hen tik dêngkhâwng karo a hâwl le, ka fapa khawm nih a fawrh!” a ti.

⁹ Doeg chu hotu tla murui kiangah a dîr bâk le, a sinah, “David chu Nob ram ah Ahitub fapa Ahimelek sinah a kal mi ka muh.

¹⁰ Ahimelek nih David chu zei a ti lai ti hen LALPA a ngiar piak le, churawhchun David rangah buh a pêk le, Philistia mi Goliath nâmsâu khawm a pêk,” a ti.

¹¹ Churawhchun, lalchem Saul nih Bâwlpu Ahimelek leh a rualsia zawzawng Nob ram ah bâwlpu si bâk mi tla chu a kawh na le, a sinah an hawng.

¹² Lalchem Saul nih Ahimelek sinah, “Ahimelek, ngâi rawh,” a ti. Ahimelek nih a sâng le, “Pu, na to-aw hinah ka um,” a ti.

¹³ Saul nih, “Nang leh David nih zei rangah nan ka phiar? Zei rangah buh na pêk hen nâmsâu tla na pêk le, amah rangah Pathian na ngiar piak zia? Tuah anih nih chun hawng ka do le, hawng ka thah ding tik dêngkhâwng karo a hâwl!” a ti.

¹⁴ Ahimelek nih a sâng le, “David chu hotu zumhkâi tak na nei mi asi. Na samâkpa khawm asi, nangmah a nan vêngtu khawm asi, a nan vêngtu lakah kawrsen hotu khawm asi, na mun rokual ah mikip nih an zah chem mi asi.

¹⁵ Asi, Pathian ka ngiar piak ta a, chu chu ka ngiar piaknâk masa chem asi lem lo. Nang leh âuzawng nih ka dâwngsung tla hêktu ah hawng kan puh lah u, hi bang thunawk tla hi kei ka theih loh!” a ti.

¹⁶ Lalchem nih, “Ahimelek, nang leh na rualsia zawzawng nan thi ding asi,” a ti.

¹⁷ Churawhchun, amah vêngtu a kiangah dîr mi sinah, “Kha LALPA bâwlpu tla kha thah na! David leiah ṭângṭawm hen, a tek mi an theih ko na hen sâwt tak an hawng ka simh duh loh ruangah,” a ti. Sikhawmsele, vêngtu tla nih LALPA bâwlpu tla thah ding an duh lo.

¹⁸ Saul nih Doeg sinah, “Nangmah nih thah na,” a ti le, Doeg nih a thah hep na. Chu ni ah chun ephod hen â thuam mi bâwlpu sâwmriat leh panga a thah na.

¹⁹ Saul nih Nob khua mi bâwlpu um mi zawzawng mipa leh nunau, ngâksia leh fasêm, ranrual, sanatung leh dawrâ rual tla thah ver ding asi,” a ti le, an thah hep na.

²⁰ Sikhawmsele, Abiathar, Ahimelek fapa lakah mi pakhat chu ruang a suak le, David sinah a tek.

²¹ Saul nih bâwlpu tla a thah na mi thu a simh.

²² David nih a sinah, “Doeg ka muh liau khan Saul rangah a simh ngelchel lai ti ka ruat rêng asi. Churuangah na rualsia tla an thi mi chu keimah ruangah asi.

²³ Nang chu ka sinah um le, zeikhawm ṭih lah. Saul nih kan panih hen thah ding hawng kan duh, sikhawmsele ka sinah chun na him lai,” a ti.