1 SAMUEL 21 - Bawm Common Language Bible Version

Saul Sinah Mi David A Tek Rawh

¹ David chu Nob khua ah Ahimelek bâwlpu sinah a tek rawh. Ahimelek chu thir bû hen a suak le, David hen anna tawng le, a sinah, “Zeitin nangmah lâwng hen na hawng kal zia?” a ti.

² David nih, ‘Lalchem pâwiherh thu ah ka hawng mi asi, thil ti ding hawng ka fiah mi hi âukhawm simh ding asi lo hawng ka ti, ka mi tla rangah lam chun mun zeimawh ah hawng ka tawng ding hen ka simh na.

³ Tuah zei me pêk ding na nei? Sang tlang nga hawng ka pêk, asi lo leh thildang na nei mi zawng,” a ti.

⁴ Bâwlpu nih, “Sang rarâu chu ka nei lo, sang thenhlimh cho ka nei, na hâwi le nih nunau pungnâk an nei lo rih mi asi chun nan ei kho lai,” a ti.

⁵ David nih, “Nunau an pung rîlmâl lo, ka mi le tla chu kan hawng suaknâk thawk hen thenhlimh tak hen anna kilkâwi kumza, tutan ah kan hawng mi châng chu kan a “thenhlimh khun!” ti hen a sâng.

⁶ Churawhchun, Bâwlpu nih sang thenhlimh a pêk rawh, Pathian sinah ap ding mi sang cho a nei ruangah, chu chu dawhkan ah siah mi asi le, a li mi chu a lâk le, a thar mi chu a ruangrûl ah a siah rawh.

⁷ (Saul ranrual zauhtu lakah an hotu, Edom thawk hen a hawng mi Doeg chu a thutiam zawh ding hen chu ni ah a um hen â dêng sek.)

⁸ David nih Ahimelek sinah, “Fei leh nâmsâu hawng ka pêk ding na nei ma? Lalchem nih thu hawng ka pêk mi a mawhsareh tuk le, ka nâmsâu leh fei khawm ka lâk manh loh,” a ti.

⁹ Ahimelek nih a sâng le, Elah kuam ah Philistia mi Goliath na thah mi nâmsâu lam chu ka nei, puan hen tuam mi ephod lanh ah a um. Na duh asi chun lâk ko, chu cho chu hinah râlthuam a um mi asi,” a ti. David nih, “Nâmsâu ṭha dauh dang a um lêm lo mi chu hawng ka pêk ko!” a ti.

¹⁰ Churawhchun, David chu a thawk le, Saul sin thawk hen a tek le, Gath khua lalchem Akis sinah a kal.

¹¹ A rianṭuantu tla nih chun lalchem Akis sinah, “Hi David hi a ram ah mi lalchem asi lo ma? Hi minung hi asi lo ma nunau tla nih lâm bû hen la an sak le, “Saul nih sâng tam tak a thah, David nih sîng tam tak a thah, an ti mi kha,’ ” an ti.

¹² Chu an thusim nih David thinlung a purh khit le, David nih lalchem Akis chu a ṭih thlo rawh.

¹³ Churuangah a kiangah a va kal chun David chu mi â hen a tuah telê le, tleih ding an awt khawmsele zeikhawm theih lo hâwi hen â siam le, khua kulh kawtkâ ah â van lemang le, a khamul lakah chil luang buk hen a tuah.

¹⁴ Akis nih a rianṭuantu tla sinah, “Zauhnik u! Mi â zei rangah ka sinah nan hawng put.

¹⁵ Mi â dang ka nei lo mi hâwi hen zei rangah mi â, a ât thilti hen ka in sung nawktir ding hen nan hawng put?” a ti.