1 SAMUEL 20 - Bawm Common Language Bible Version

Jonathan Nih David A Ṭangpi

¹ David chu Ramah ah mi Naioth thawk hen a tek le, Jonathan sinah a va kal le, “Zei thil me ka ti? Zei me ka sualnâk? Zei me ka palhnâk? Keimah thah ding duh rê hen na pa lakah zei thil me ka ti?” a ti.

² Jonathan nih “Pathian nih an thihtir rîlmâl lah seh, ka pa nih thil a ti mi zawzawng a herh mi khawm a herh lo mi khawm hawng ka simh hep, hi bang thu lak khawm hin kei sinah chun zeikhawm a pheh lai loh, chu hâwi hen a ti rêng lai loh,” a ti.

³ Sikhawmsele David nih a sâng le, “Na pa nih na ka kawmh zia hi a theih hep, nang khawm na lung a fâk awt thlo ruangah thilti a tum mi chu a nan theihtir ding asi lo. LALPA nung mi min sal hen thu ka sim asi, kei lam chu thih pâng chuan hen ka um mi ko rawh!” a ti.

⁴ Jonathan nih, “Na duh mi zawng ka nan ti piak lai,” a ti.

⁵ David nih, “Thâi chu Thla Thar Kût ni asi, kei khawm hi lalchem sinah buh ei bâk ding kasi. Sikhawmsele phâisen ah ka va kal lai le, kip zânlei tiang ka va a thup lai.

⁶ Na pa nih buh khêng dûmnâk ah ka um lo ti a theih chun kumsiar hen kan dâwngsung apnâk cham Bethlehem ah va nei ding hen keimah sinah hawng ka deih ti hen simh,” a ti.

⁷ ‘Asi ma chu,’ a ti chun ka him mi asi lai, sikhawmsele a thinthawk mi asi chun keimah nganfâk pêk ding a tum asi ti na theih ding asi.

⁸ Na ka sunhsaknâk hi zângfahtê hen ti le, thuthup thenhlimh kan nei mi kha theihkumza. Sikhawmsele ka sual mi asi ngâk leh nangmah tak nih hawng ka thah ko! Zei rangah na pa nih hawng ka thah ding hen na ka kalpi êu lai?” a ti.

⁹ Chun, Jonathan nih a sâng le, “Kha bang hâwi thil kha ruat khawm ruat lah, ka pa nih thah ding a nan tum tak chun ka nan simh lai lo ma?” a ti.

¹⁰ David nih, “Na pa nih a thinthawk bû hen a nan sâng chun âunih hawng ka simh lai?” a ti.

¹¹ Jonathan nih, “Phâisen leiah kan kal lai,” a ti le, an kal rawh.

¹² Jonathan nih David sinah, “LALPA, Israel Pathian chu theihpitu si seh! Thâi ah tu tik ding ah leh chu ni ah ka pa rangah thu ka deih lai. Na tlûnah a thiltum a ṭha chun thu ka nan thanh lai.

¹³ Nganfâk pêk ding a nan tum mi lakah ka nan theihtir hen ka nan hum lo asi chun, LALPA nih hawng ka thah thlo seh. LALPA chu ka pa sinah a um hâwi hen na sin khawm ah um seh!

¹⁴ Ka dam mi asi chun, na thutiam kha theihkumza le, ka lakah zumhkâi rawh, sikhawmsele ka thi mi asi lam chun,

¹⁵ ka dâwngsung tla rangah zumhkâinâk langhtir kumza. LALPA nih na mêlma tla a veih hep na tikah chun

¹⁶ kan thutiam chu râwk lo hen um kumza seh. A râwk mi asi chun LALPA nih a nan rêp lai,” a ti.

¹⁷ Jonathan nih David chu a dâwt ruangah thu a tiamh nawlh. Jonathan nih mah â dâwt mi hâwi hen David rangah a dâwt.

¹⁸ Churawhchun, Jonathan nih a sinah, “Thâi chu Thla Thar Kût asi ruangah buh einâk ah na tel lo chun na umlo mi a lang awt.

¹⁹ Kip ah na umlo ti theih asi khun awt. Ni dangah na thupnâk ngêt ah va kal le, va a thup, chunah mi lung pawng lanh leiah va a thup.

²⁰ Churawhchun, chanhtiang veithum ka kah lai, muidik sêl hâwi hen.

²¹ Ka to-aw chu va hâwl ding hen ka simh lai, ‘Zauh, lîthal zum tla chu na sîr leiah an um, sar na’ ka ti chun, na hawng suak kho tinâk asi lai. LALPA a nung mi min sâl hen na vânduai lai lo ti ka sim asi.

²² Sikhawmsele, ‘Chu lîthal zum chu khatlei varâl ah a um, kal sawm,’ ti hen ka simh chun, Churawhchun, kal ving. LALPA nih a nan fial ving mi asi ruangah.

²³ Khatlei khatlei thu kanna tiam rawh ruangah LALPA nih khatlei khatlei tleih thlir ding hen hawng kan siam ngelchel lai.

²⁴ Churawhchun, David chu phâisen ah chun â thup rawh. Thla Thar Kût ah buh ei ding hen lalchem Saul chu a hawng le,

²⁵ amah to mun nget ah vâm kiangah a to, amah sangtu ah Abner a to le, amah zâwn chirah Jonathan chu a to, David mun chu a lâwng ko.

²⁶ Sikhawmsele chu ni ah chun Saul nih zei thu khawm a sim lo, zeimawh a herh mi leh a thianglo mi a um dahmawh ti a ruat ruangah.

²⁷ A thâituan Thla Thar Kût a ni nihnâk ah David mun chu a lâwng kumza le, Saul nih Jonathan sinah, “Zei rangah mazân khawm tusûn khawm David buh ei a hawng lo zia?” a ti.

²⁸ Jonathan nih a sâng le, “Bethlehem ah kal ding hawng ka deih.

²⁹ Zângfahtê hen hawng ka kaltir le, ka dâwngsung tla nih khua ah ap ding an ti le, ka unaupa khawm nih chunah tel ding hen hawng ka chah, nang chu ka hâwipa na si ruangah hawng ka kaltir le, ka unau tla muh ding hen, churuangah asi buhkhêng dûmnâk ah a umlo mi,” a ti.

³⁰ Churawhchun, Saul chu Jonathan tlûnah thungâi a thin a thawk le, “Nang lakfa! Tuah David hen nanna kêp mi, na nufa na mualphoh asi ti kan theih!

³¹ David a dam kar vial chu hi ram ah lal na si dah awtlo ti na theih lo ma? Tuah va kal le, hinah hawng ruai, a thi ding asi!” a ti.

³² Jonathan nih a sâng le, “Zei rangah a thi êu lai? zei thil a ti?” a ti.

³³ Chu liau tak chun Jonathan rangah fei hen a khawh le, Jonathan nih David hi a pa nih thah a tum tatak ti a theih rawh.

³⁴ Jonathan chu dawhkân ah mi chu thinthawk bu hen a thawk le, chu Thla Thar Kût a ni khat ni ah chun zeikhawm a ei lo. David ruangah thungâi a lawksawng. Saul nih a râl thlo ruangah.

³⁵ A thâituan zîng ah Jonathan chu David tawng ding hen anna tiam hâwi hen phâisen ah a va kal rawh. Mipa ngâksiatê a put le, a sinah,

³⁶ “Lîthal ka kah awt mi hi hâwl,” a ti. Jonathan nih a lîthal chu mipa ngâksia lanh leiah a kah le, mipa ngâksia chu chu leiah a tek.

³⁷ Chu mipa ngâksia nih lîthal tlâknâk a tleng rawh chun, Jonathan nih a sinah, “Thalzum chu a lanh dauh ah a um!

³⁸ Kha ram khan dîr ko lah, ti rereh,” a ti. Ngâksia nih lîthal chu a lâk le, a pu sinah a kalpi le,

³⁹ zei tinâk mesi ti lam chu a theih loh, Jonathan leh David cho nih an theih.

⁴⁰ Jonathan nih ngâksia rangah a râlthuam chu a pêk le, “Khua leiah tlungpi,” a ti.

⁴¹ Ngâksia a kal rawh chun, lung pawng lanh lei mi David chu a hawng thawk le, a khûp tual a deh le, tual leiah veithum a buk, Jonathan leh David chu châwchawk bû hen thungâi an ṭap le, David lawksawngnâk chu Jonathan ngâk hen a fâk dauh.

⁴² Jonathan nih David sinah, “Pathian na sinah um seh. LALPA nih kei leh nang; ka thlâk tla leh na thlâk tla thutiamnâk thenhlimh hen kanna nei tawnh mi hi theih seh,” a ti. David khawm a kal le, Jonathan khawm khua leiah a kîr.