1 SAMUEL 2 - Bawm Common Language Bible Version

HanahThlachamnâk

¹ Hanah nih thla a cham: “LALPA nih ka thinlung lâwmnâk hen a khattir, thil a ti ruangah thungâi ka lâwm! Ka mêlma tla chu ka nihsanh na; LALPA nih hawng ka ṭangpi ruangah thungâi ka lâwm!

² LALPA hâwi hen mi thenhlimh âukhawm an um lo; amah banghtu leh kan Pathian hâwi hum khotu âukhawm an um lo.

³ Na puarsanhnâk kha bâng le, puar thâu tak hen thu na sim mi khawm bâng rawh. LALPA chu mi zawzawng thilti lakah lâirêltu leh theihtu Pathian asi ruangah.

⁴ Kawrsen chak lîthal kûk tla an kiak, sikhawmsele mi chaklo chu a hawng chak rawh.

⁵ Mi khim tak hen um mi tla chu buh hâwl hen lawh an kal. Sikhawmsele a sungvâng mi chu a vâng lai lo rawh. Fa nei lo nu nih fapa pasarih a ring. Fa tam tak neitu chu pakhat khawm an um lo rawh.

⁶ LALPA nih a thah le, a nunh nawlh rawh. Mi tla chu laikulh thihnâk ah a kaltir le, a hawng kîrtir nawlh na.

⁷ Mi zeimaw mi chu pâm tak hen a siam le, a zeimaw mi chu nei tak hen a siam. A zeimaw mi chu nâu tak hen a siam le, a dang tla chu rokual tak hen a siam.

⁸ Mipâm tla chu valeidip ah mi a châwi le, ṭangpi herh tla chu anna hamhnâk lakah mi a thawh na. Lal fa tla chu hawikawmh ah a siam na le, mi zahkâi dîrmun ah a umtir na. Tual hi Lalpa tâ asi; chunahchun laikulh hi a dirh.

⁹ A mi zahkâi tla chu a hum na le, sikhawmsele misual chu mûi lakah an vâi. Mi nih amah chaknâk cho hen zeikhawm a neh kho lo.

¹⁰ LALPA mêlma tla chu veih an si lai le, vân thawk hen khuarît hen a do na lai. LALPA nih laikulh pumpi lâi a rêl lai le; a lal sinah thiltikhonâk a pêk lai, a lal thîm ruangah nehnâk a pêk lai,” a ti.

¹¹ Churawhchun, Elkanah chu Ramah khua ah an in leiah a tlung rawh. Sikhawmsele, mipa ngâksia Samuel chu Siloh khua ah Eli sinah LALPA rianṭuan hen a um rawh.

Eli Fapa Tla

¹² Eli fapa tla chu mi rualo tak an si, LALPA thu khawm an ngâilo.

¹³ Mipi tla rangah bâwlpu nih an ti ding mi dân khawm an zûl lo, zûl ngâk hen mi nih bâwlnâk an hawng ap mi sa an suang liauah an to-aw tla chu thîrkut zum pathum a um mi chu an hawng put le,

¹⁴ an suang liau mi chu thîrkut hen meh an thur, thîrkut nih a sunh mi chu bâwlpu vo an ti vima. Israel mi zawzawng Siloh khua ah bâwlnâk ap hen hawngtu vial, chu hâwi hen an ti ver na.

¹⁵ Chu lo khawm ah a thâu tla an lâk hen an duah lânah bâwlpu to-aw tla chu an hawng kal le, bâwlnâk pêktupa sinah, “Bâwlpu rangah em ding meh hawng ka pêk, na suang mi meh chu a duh lo, em mi meh cho a duh,” an ti na.

¹⁶ Mi tla nih an sâng le, “A dântê hen a thâu tla kan duah ta lai rih ta a! Chu tikah na duh mi zawng na lâk lai ma chu!” an ti. Bâwlpu to-aw tla nih, “Silo, tuah hawng ka pêk ko! Na ka pêk lo chun zângran hen ka lâk awt!” an ti.

¹⁷ Hi Eli fapa tla sualnâk hi LALPA mitmuh ah a ti tuktarâi rawh. LALPA sinah thil ap tla chu an zah lo tuktarâi ruangah.

Siloh Khua Ah Samuel

¹⁸ Chu liau chun mipa ngâksiatê Samuel nih chun LALPA rian chu a ṭuan vima le, bâwlpu kawrfual â ruk.

¹⁹ A nu nih kum siar hen bâwlnâk an ap zâwnah a pasal a zûl le, kawrfual a siam piak mi chu a pêk tâwn.

²⁰ Eli nih Elkanah leh a nupi chu mal a sâwm na le, Elkanah sinah, “LALPA nih amah rangah nan pêk mi rûlah fa dang tla hi nunau rangah hin pêk nawlh seh,” a ti. Churawhchun, in leiah an tlung rawh.

²¹ LALPA nih Hanah chu mal a sâwm le, fapa dang tla pathum leh fanu panih a nei nawlh. Mipa ngâksia Samuel chu LALPA rianṭuan hen a ṭhanglian vima.

Eli Leh A Fapa Tla

²² Eli chu thungâi a tar rawh. A fapa le nih Israel tla tlûnah an thilti dân zawng tla a theih le, LALPA umnâk Puanin tualmâi ah nunau rianṭuantu tla an itpi na mi thu tla khawm.

²³ Churuangah an sinah, “Zei rangah hi bang hâwi thil hi nan ti? Nan thilsual ti thu mikip nih an hawng ka simh.

²⁴ Ka fa le, lêt u! Pathian mipi tla nih thilsual ah an ruat mi chu hi bang hi asi!

²⁵ Mi nih midang lakah thilsual a ti chun Pathian nih a hum kho, sikhawmsele LALPA lakah thilsual titu chu âunih a hum kho lai!” a ti. Sikhawmsele, an pa thu chu an ngâi duh lo le, churuangah LALPA nih anmah chu thah a tum na rawh.

²⁶ Ngâksia Samuel chu a ṭhang vima le, LALPA leh minung sunhsaknâk â ting.

Eli Dâwngsung Rangah Simhkannâk

²⁷ LALPA fial mi khuavâng, hi thusim ding hen Eli sinah a hawng le, “Aigupta lalchem ram ah an thlâk natu Aron leh dâwngsung sal ah an tâng liauah keimah tak Aron sinah ka langh.

²⁸ Israel phun zawzawng lakah mi a dâwngsung chu bâwlpu rang ding ah ka thîm le, mâichâm ah rianṭuan hen rimthâw tla duah hen, kawrfual ruk hen ka sinah thu hawng ka deih ding hen. Mâichâm lakah duahphung bâwlnâk lakah mi vo ka neihtir na.

²⁹ Chu hâwi mi lakah zei rangah ka mi le tla lakah bâwlnâk leh thil ap ka ngiar mi lakah nan duhlei? Eli, zei rangah na fapa tla chu kei ngâk hen na sunhsak dauh le, ka mi tla nih bâwlnâk zawzawng an ka pêk mi a vo ṭha ṭha chu anmah châwm thâu ding kei ngâk hen na duhpi na zia?

³⁰ Kei, LALPA, Israel Pathian nih a lân thawk hen na dâwngsung tla leh na thlâk tla nih chun zeiliau zawng ah bâwlpu rian ka lakah an ṭuan lai ti hen kan tiamh rawh mi asi. Sikhawmsele, tuah chu chu ka ti awtlo rawh ti ka sim asi! Chu hâwi ngangâk hen keimah zahtu chu ka zah bâk lai le, keimah zauhnawmhtu chu ka zauhnawmh bâk awt.

³¹ Ngâi rawh, na dâwngsung lakah mi tlangvâl tla leh na chi-le-kuang tar tiang damlo hen thahnâk ni a hawng tlung awt.

³² Nang chu na lawksawng lai le, Israel midang tla mal ka sâwm mi ngarh hen na zauh kur lai. Sikhawmsele, na dâwngsung lakah tar tiang dam ding pakhat khawm an um lai lo.

³³ Sikhawmsele, na thlâk tla lakah pakhat chu ka zuah lai le, ka bâwlpu rian a ṭuan lai. Sikhawmsele, a mit a châw lai le, lungum ding zeikhawm a nei lai lo; na thlâk tla dang zawng chu thih ṭhalo tak hen an thi lai.

³⁴ Na fapa Hopni leh Phinehas chu ni khat ah an thi vevê lai. Chu chu ka thusim zawzawng a dik ti theihnâk asi lai.

³⁵ Bâwlpu ka lakah zumhkâi mi leh ka duhzia hen thil titu ka thîm awt, thlâk tla ka pêk lai le, chu tla nih ka thîm mi lalchem mâika ah rian an ṭuan kumza lai.

³⁶ Na thlâk tla an thibang tla nih chu bâwlpu sinah chun; tangka leh buh an deih lai le, bâwlpu ṭangpitu siding hen an deih lai, thil zei zeimawh ei ding an tawng khonâk ding hen,” a ti.