1 SAMUEL 19 - Bawm Common Language Bible Version

Saul Nih David A Nehsawh

¹ Saul nih a fapa Jonathan leh a rianṭuantu tla zawzawng chu David thah a tum mi thu a simh na. Sikhawmsele Saul fapa Jonathan nih David chu thungâi a kawmh le, a sinah,

² “Ka pa nih thah ding hen a nan tum. Thâi chu a râlring rawh, mun ken dauh ah va a thup le, chunah um ko.

³ Chun, kei chu ka pa kiangah phâisen ah ka dîr lai le, a sinah nangmah thâwngthâng ka sim lai. Thil zeital ka theih mi chu ka nan simh lai,” a ti.

⁴ Jonathan nih David chu Saul mâika ah a sawr, “Pa, na to-aw David tlûnah thil diklo ti rîlmâl lah. Na lakah zeikhawm thil a sual lo, na lakah zeikhawm palh-le-rahnâk a nei lo, palh ngâk hen a ti mi zawng chu nangmah rangah ṭangpinâk rokual tak asi ver.

⁵ Goliath lakah khawm thi ding â siang siar le, LALPA nih Israel rangah rokual tak hen a neh piak. Nang khawm nih na muh le, na lâwm. Chu hâwi mi lakah tuah thilsual tilo mi David chu a san zeikhawm um lo hen a lakah thil diklo ti ding na duh êu?” a ti.

⁶ Saul nih Jonathan thusim thawk hen theihthiamnâk a nei le, David thah lo rawh ding hen LALPA min hen thu a tiam.

⁷ Churawhchun, David rangah a kawh le, Saul sinah an kalpi le, David nih a lân hâwitê hen Saul rangah a rian a ṭuan piak nawlh.

⁸ Philistia mi tla hen tuknâk a um nawlh le, David nih a do na le, a neh na le, an tek phin.

⁹ Nikhat chu thlarau sual Saul sinah a hawng fial le a luah rawh. A in ah a fei put bû hen a to le, David khawm ṭingṭang tum hen chunah chun a um.

¹⁰ Saul nih David chu vâm lakah bêk tlak khawh ding a tum le, sikhawmsele David chu â phêt le, fei chu vâm ah â phun char. David chu a tek le a suak rawh.

¹¹ Chu zân ah chun Saul nih a thâituan ah David chu thah ding hen a in ah bawh hen a fial na. A nupi Mikal nih David rangah a simh le, “Tuzân ah hin na tek lo vêk chun thâizîng chu na thi ding nget,” a ti.

¹² A nupi nih chun langawtkawt ah a ṭumtir le, a tek le, a suak rawh.

¹³ Churawhchun, milem chu ihkhun ah a ittir le, a sanhtling rangah kêl mul a tlinhtir le, puan hen a khuh.

¹⁴ Saul minung tla chu David tleih ding hen an hawng le, Mikal nih, “A dam lo” ti hen a simh na.

¹⁵ Sikhawmsele, Saul nih anmah ngelchel nih tawng ngelchel ding hen mi a fial nawlh na, “A ihkhun hen hawng put ule, ka thah ko lai,” a ti.

¹⁶ In sungah an va kal le, milem ihkhun ah kêl mul sanhtling tlinh hen a ittir mi an va muh.

¹⁷ Saul nih a fanu Mikal sinah, “Zei rangah hi hâwi hen na ka perpet le, ka mêlma chu na suah ving?” a ti. Anih nih a sâng le, “Na ka ṭangpi lo chun kan thah lai a ti mi chu,” a ti.

¹⁸ David chu a suak le, Ramah khua ah Samuel sinah a va kal le, Saul nih a tlûnah thil a ti mi zawzawng chu a simh. Churawhchun, Samuel hen Naioth ah an va kal le, chunah chun an va um.

¹⁹ David chu Naioth, Ramah khua ah a um ti Saul an simh.

²⁰ Churawhchun, amah tleih ding hen mi a fial na. Chu mi a fial mi tla nih, khuavâng murui an hotu Samuel sinah lâm hen âu mi an va muh na. Churawhchun, Saul minung tla chu Pathian Thlarau nih a hawng luah na le, annih khawm an lâm le, an âu bâk.

²¹ Saul nih chu chu a theih rawh chun minung tam dauh a fial le, annih khawm chu an va lâm le, an âu bâk fâwn. A veithumnâk ah midang a fial fâwn le, chu tla khawm chu a lânah mi hâwi ber hen an um bâk.

²² Churawhchun, amah tak Ramah khua leiah â thawh rawh. Seku tichawh kâu tak umnâk mun a va tleng le, “Samuel leh David hi zeiah an um,?” ti hen a deih na. Annih nih, “Naioth ah an um,” ti hen an simh.

²³ Chunah a kal liau tak chun, a tlûnah Pathian Thlarau a hawng tlung bâk, Naioth lei kalnâk lampi tluan hen a âu le, a lâm bâk.

²⁴ Churawhchun, a nipuan a lît hep le, Samuel mâika ah a lâm le, a âu, chu ni, ni khat leh chu zân, zân khat chu takkaro hen a um ko. (churuang chun “Saul khawm khuavâng asi bâk rawh na maw?” an ti tâwn.)