1 SAMUEL 17 - Bawm Common Language Bible Version

Goliath Nih Israel Tla A Zuamnâk

¹ Philistia mi tla chu râl do ding hen Judai ram ah mi Sokoh an ti mi khua ah anna pûm; Sokoh leh Azekah karah mi Ephes Damim ah riakmun an khuar.

² Saul leh Israel tla chu anna pûm le, Elah Kuam ah mun an khuar, chunah chun Philistia do ding hen râlring zet hen an um.

³ Philistia tla chu tlâng pakhat tlûnah an um le, Israel tla khawm khatlei râl mi tlângah an um bâk, anna kar chu tivakuam asi.

⁴ Gath khuapi ah mi a min Goliath chu Philistia lakah mi a hawng suak le, Israel tla a hauh na. Amah chu feet kua ngâk a sâng,

⁵ Dâr râlthuam a rit dân kilogramme sâwmnga leh pasarih hen â thuam, chun dâr lukhuh â khuh.

⁶ A kê khawm dâr hen a tuam, a liang ah dâr fei a put.

⁷ A liang ah dâr liangbat a pâi, a fei ngul chu puan tahnâk tâkaw tluk hen a sah, a fei zum chu kilogramme sarih tluk hen a rit. Tlangvâl pakhat nih a mâi ah a phaw a put piak le, a kal.

⁸ Goliath chu a dîr le, Israel tla a auh na, “Khanah zei nan ti, Râltuk ding hen nanna tlar mu? Kei chu Philistia mi kasi, nannih Saul sal tla nan si. Keimah do ding hen nan lakah mi pakhat thîm u.

⁹ Anih nih hawng ka neh hen hawng ka thah chun nan sal ah kan um lai le, sikhawmsele kei nih ka neh hen ka thah chun kan sal nan si lai.

¹⁰ Hinah tuah Israel kawrsen chu ka zuam asi. Hawng ka sualpi ding hen nan thîm mi chu ka ngamh rerêng,” a ti.

¹¹ Saul leh a minung tla nih an theih rawh chun thungâi an lâu.

David Chu Saul Riaknâk Mun Ah A Va Kal

¹² David chu Jese fapa, Judai ram Bethlehem khua mi, Ephrat thlâk asi. Jese nih fapa pariat a nei le, Saul a lal liauah chun a tar ual rawh.

¹³ A fapa upa dauh mi pathum chu Saul sinah tuknâk ah an kal. A fapa upachem chu Eliab asi, a sangtu chu Abinadab, a pathumnâk chu Samah asi.

¹⁴ David hi a fapa lakah ngâksia chem asi, chun a u le pathum Saul sinah an um liauah

¹⁵ a zeimaw zâwn ah Bethlehem leiah a va kal le, a pa dawrâ a va vêng tâwn.

¹⁶ Goliath nih Israel tla chu zînglei zânlei kip hen ni sâwmli kar a hauh na.

¹⁷ Nikhat chu Jese nih David sinah, “Hi sangvut kilogramme râ rêu mi tlêp râ leh sang tlang râ put le, na u le riakmun leiah va kal rawh.

¹⁸ An hotu rangah chaw nûk khal parâ put piak. Na u le tla zei hâwi an um an dam ma, an thâwngthâng na theih mi leh na muh mi chu sim ding hen hawng kîr nawlh.

¹⁹ Lalchem Saul, na u tla leh Israel midang tla zawzawng Philistia tla do hen Elah Kuam ah an um asi,” a ti.

²⁰ David chu a thâizing zîngtê ah a thawk le, midang sinah dawrâ zauh ding hen thu a mâk le, a pa Jese nih a simh mi hâwi hen buh a put le, a kal rawh. Riakmun ah Isarel tla chu râltuk ding hen an âu liau chirah a va tleng rawh.

²¹ Philistia leh Israel tla chu mâi leh mâi a hawih hen do sek ding hen um mun remh zet hen an um.

²² David nih ei ding leikâng pêktu sinah a buh chu a siah thlap le, tuknâk mun leiah a unau sinah a va kal le, zei hâwi an thâwng a um ti a deih na.

²³ Chu hâwi a sawnh na liau tak chun Goliath chu an mâilei ah a hawng le, a lân hâwitê hen Israel tla a hauh na. Chu chu David nih a theih rawh.

²⁴ Israel tla nih Goliath chu an muh rawh chun lâu bû hen an tek.

²⁵ “Zauhnik u! Lalchem Saul nih a thah khotu chu lâwmman lian tak pêk ding a tiam, a fanu khawm pêk hen a man khawm a lâk awtlo a ti,” anna ti.

²⁶ David nih a kiangah mi tla sinah, “Hi bang hâwi Israel ningzak saihtu Philistia mi thahtu nih zei a tawng awt? Chu lo khawm ah hi Pathian nung kawrsen tla zuamtu Philistia minung lunglotu hi âu mesi?” ti hen a deih na.

²⁷ Goliath thahtu rangah ti piak ding mi tla chu an simh.

²⁸ David unau lakah a upachem mi Eliab chu David nih mi a sawnh na mi chu a theih rawh. A thinthawk le, David sinah, “Hinah zei na hawng ti? Mâng ah dawrâ tla âunih a zauh rawh? Nang ngâksia â thet hen! Râl anna tuk mi zauh ding hen na maw na hawng,” a ti.

²⁹ David nih, “tuah zei ka ti? Thu deih kho asi lo ma?” a ti.

³⁰ Midang leiah â her le, chu hâwitê hen a deih na; a deih lemang na le, bang ver hen an sâng.

³¹ Zeimaw mi nih David thusim an theih le, Saul nih a kawh rawh.

³² David nih Saul sinah, “Bâwipa, hi Philistia minung hi âukhawm nih ṭih lah na seh, keimah ka va kal lai le, ka do lai,” a ti.

³³ Saul nih, “Silo, nangnih zeitin anih na do kho lai? Mipa ngâksiatê cho na si rih, anih chu kawrsen a sinâk a sâwt thlo rawh mi!” a ti.

³⁴ David nih, “Bâwipa, ka pa dawrâ zauhtu kasi. Dawrâ seh ding hen chakeibaknei mawh vawm mawh an hawng le,

³⁵ ka ṭhâwl le, ka do le, dawrâ fa tla ka hum na tâwn. Chakeibaknei leh vawm an hawng ka seh awt khawmsele an rawm ka dît le, ka thah thlo na.

³⁶ Chakeibaknei khawm vawm khawm ka thah, chu hâwitê hen hi Philistia lunglo mi lak khawm ka ti awt. Pathian nung kawrsen tla zuamtu hi.

³⁷ LALPA nih chun Chakeibaknei leh vawm lakah a ka hum mi hâwi hen hi Philistia mi lak khawm hawng ka hum nget lai,” a ti. Saul nih, “Asi ma chu, kal rawh ne, LALPA na sinah um seh,” a ti.

³⁸ David rangah a râlthuam dâr lukhuh chu David lû ah a khuh, kawrdawh khawm a ruk.

³⁹ David nih Saul nâmsâu chu â thlaih le, kal ding a tum le, a neh pal lo, â ruk dahlo mi asi ruangah. Saul sinah, “Hi râlthuam hen chun ka do kho lai loh, ka mang dahlo,” a ti.

⁴⁰ Churawhchun, a lît hep le, a dawrâ vêngnâk ṭhianṭhunh a lâk le, tiva mi lungtê a mil deden mi panga a sar le, a sawngkhâwi ah a sanh, lung sehnak lakah a timhtuah zet le, Goliath chu a fûk rawh.

David Nih Goliath A Neh

⁴¹ Philistia mi Goliath chu a phaw puttu hen David chu an hawng fûk. Tâwm a hawng fûk le,

⁴² David rang fiang kar a muh rawh chun thungâi a zauhnawmh, mipa ngâksiatê mêlṭhadek cho asi ruangah.

⁴³ David sinah, “Ṭhianṭhunh kha zeirang ding ah, ui ma na ka ruat?” a ti le, a pathian min sal hen David rangah siat a barh.

⁴⁴ David chu a hauh le, “Hawng nik, na sa kha vâ leh ramsa tla ei ding ah ka pêk lai,” a ti.

⁴⁵ David nih a sâng le, “Nang chu, nâmsâu, sunhnâk fei leh khawhnâk fei hen do na ka tum le, sikhawmsele kei lam chu LALPA, zeizawng tikho, Israel tla kawrsen Pathian, na zauhnawmh mi min hen ka hawng asi.

⁴⁶ Tusûn ni ah LALPA nih ka kut ah an pêk le, ka nan neh lai le, na ngâwng ka tan lai. Philistia kawrsen sa chu vâ leh ramsa ei ding ah ka pêk lai. Laikulh pumpi nih Israel tla nih Pathian an nei ti an theih lai le,

⁴⁷ hinah mi mikip nih a mi Israel tla hum ding hen LALPA nih nâmsâu leh fei mang ding a herh lo ti an theih lai. Amah chu râltuknâk ah nehtu asi, kanmah neh ding hen an siam hep na lai,” a ti.

⁴⁸ Goliath nih David chu a hawng fûk le, David khawm nih Philistia do ding hen a fûk bâk.

⁴⁹ David nih a kut hen a sâwngkhawi a purh le, lung pakhat a thuak le, Goliath chu a seh le, a chal takah a dingh le, a luruh a kuai phut le, Goliath chu bawkbukhup hen tual ah a tlû ro.

⁵⁰ Churawhchun, David nih nâmsâu lo hen lung sehnâk hen a neh rawh.

⁵¹ A va fûk phêt le, a tak tlûnah a kâi le, Goliath nâmsâu a kâwng lakah mi a nûk le, a ngâwng a tan le, a thah rawh. Philistia tla chu an mi râlṭha pa a thi rawh chun an tek hep.

⁵² Israel leh Juda tla nih chun âu bu hen an ṭhâwl na le, Gath lei mi lampi tluan hen an ṭhâwl na le, Ekron kulh kawtkâ tiang an ṭhâwl na. Saaraim lei lampi tluan hen anna liam mi tla an tlû phut.

⁵³ Israel tla, Philistia an ṭhâwl na mi chu an hawng kîr le, an riakmun tla an rawk.

⁵⁴ David nih Goliath lû chu a lâk le, Jerusalem leiah a kalpi, a râlthuam lam chu amah puanin ah a kil.

David Chu Saul Sinah â Pêk

⁵⁵ Saul nih Goliath do ding hen David a kal mi a muh le, a kawrsen hotu Abner rangah thu a deih le, “Abner, âu fapa mesi?” a ti. Abner nih a sâng le, “Bâwipa, ka theih loh asi,” a ti.

⁵⁶ Saul nih, “Kal le, va hâwl nik,” a ti.

⁵⁷ Churawhchun, David chu Goliath a thah mi a hawng kîr mi chu Abner nih Saul sinah a kalpi rawh. David nih Goliath lû chu a put vima.

⁵⁸ Saul nih David sinah, “Tlangvâl, âu fapa me na si?” ti hen a deih. David nih a sâng le, “Na to-aw Jese, Bethlehem ah mi fapa kasi,” a ti.