1 SAMUEL 16 - Bawm Common Language Bible Version

David Chu Lalchem Si Ding Hen Sariak Thuh Asi

¹ LALPA nih Samuel sinah, “Saul ruangah zei tiang riamruam me na ngaih a sia awt? Israel lalchem asi mi chu ka nawng rawh. Sikhawmsele tuah oliv sariak lak le, Bethlehem khua ah minung pakhat Jese sinah va kal le, a fapa lakah mi pakhat chu lalchem ah ka ruat rawh,” a ti.

² Samuel nih, “Zeitin ka ti kho lai? Saul nih a theih chun hawng ka thah ding ko,” a ti. LALPA nih a sâng le, “Chawlâ put le, LALPA sinah bâwlnâk ka va ap awt ti rawh.

³ Bâwlnâk ah chun Jese chu sâwm le, ti ding dân chu keimah nih ka nan simh lai. Ka nan simh mi minung chu lalchem rang ding ah sariak na thuh ding asi,” a ti.

⁴ Samuel chu LALPA nih a simh mi hâwi hen Bethlehem khua leiah a va kal rawh. Chu khuapi ah ruitu tla chu thir bû hen an va tawng le, Samuel sinah, “Muhtupa, na kan pal mi hi thlangamnâk thu masi?” ti hen an deih.

⁵ Anih nih a sâng le, “Si ta a, LALPA sinah bâwlnâk ap ding ka hawng mi asi. A thiangtir ule, ka sinah hawng bâk u,” a ti. Jese leh a fapa tla khawm anna thenhlimh ding hen a simh na le, bâwlnâk ah chun a sâwm bâk na.

⁶ An va tlung rawh chun, Samuel nih Jese fapa Eliab a muh le, “A thinlung hen hinah LALPA mâika ah a dîr mi hi thîm mi asi ngelchel lai,” ti a ruat.

⁷ Sikhawmsele LALPA nih a sinah, “A sâng mi leh â dawh mi leiah zauh lah. Chu hâwi chu ka duh lo, minung lâirêl hâwi hen ka rêl lo ruangah. Minung nih chun lênglei a zauh le, kei lam nih chun thinlung lei ka zauh dauh,” a ti.

⁸ Jese nih a fapa Abinadab a kawh le, Samuel sinah a kalpi. Sikhawmsele Samuel nih, “Silo, LALPA nih a thîm mi asi lo,” a ti.

⁹ Jese nih Samah a kalpi nawlh. Samuel nih, “Hi khawm hi LALPA nih a thîm mi asi lo,” a ti.

¹⁰ Chu hâwi hen Jese nih a fapa pasarih tla chu Samuel sinah a kalpi na. Churawhchun, Samuel nih Jese sinah, “Hi tla lakah LALPA nih a thîm mi pakhat khawm a um loh,” a ti.

¹¹ Churawhchun, “Fapa dang na nei lo rawh ma?” ti hen a deih. Jese nih a sâng le, “A ngâksia chem mi a um rih, sikhawmsele dawrâ rual vêng hen mâng ah a um,” a ti. Samuel nih, “Hinah hawng ding hen simh. A hawng lânlo chu bâwlnâk kan ap ding asi lo,” a ti.

¹² Jese nih amah chu kawh ding hen mi a fial. Mi mêlṭha tak, mi ṭhisel tak, mitmeng dawh tak asi. LALPA nih Samuel sinah, “Hi hi sariak thuh ding mi chu asi,” a ti.

¹³ Samuel nih oliv sariak a lâk le, a unau tla mâika ah David chu sariak a thuh rawh. Lâkkhatko ah LALPA thlarau nih David chu a luah le, chu ni thawk hen chun a sinah a um vima rawh. Churawhchun, Samuel chu Ramah khua leiah a kîr rawh.

David Chu Saul In ah a um

¹⁴ LALPA thlarau nih Saul chu a kaltâk le, thlarau sual amah hamhtirtu ding hen LALPA nih a fial.

¹⁵ A to-aw tla nih a sinah, “Pathian nih thlarau sual nangmah hamhtirtu ah a hawng fial ti kan theih.

¹⁶ Pu, na rangah ṭingṭang tum thiam mi kawh ding hen thu hawng kan pêk. Chun, thlarau nâwmtâm na sinah a hawng tlung kip ah chu minung nih ṭingṭang a tum lai le, na hawng ṭha nawlh ding hen,” an ti.

¹⁷ Saul nih, “A tum thiam mi hawng ka hâwl piak ule, hinah ka sinah hawngpi u,” a ti.

¹⁸ An lakah mi pakhat nih, “Bethlehem mi Jese nih tumphung thiam tak mi fapa a nei, amah chu mi râlṭha tak leh mêlṭha tak, kawrsen ṭha tak leh thusim kho mi tak asi. Chu minung sinah LALPA a um,” a ti.

¹⁹ Saul nih Jese sinah mi a fial le, “Dawrâ vêngtu na fapa kha ka sinah hawng fial,” a ti.

²⁰ Jese nih David chu Saul sinah a fial le, kêl lâ pakhat leh savun uain dûr khat sang hen sanatung a phurhtir le, a put.

²¹ David chu Saul sinah a va kal le, Saul sinah a rianṭuantu ah a um rawh. Saul nih thungâi a lawmh le, a riamnâm puttu ah a ruat.

²² Churawhchun, Saul nih a sinah thu a thanh le, “David hi thungâi ka lawmh, ka sinah umtir,” a ti.

²³ Chu thawk hen chun thlarau sual Pathian nih Saul sinah a hawng fial kip ah David nih a ṭingṭang a lâk le, a tum piak. Churawhchun, thlarau sual nih a kaltâk le, a mahmuntê hen a hawng ṭha nawlh.