1 SAMUEL 14 - Bawm Common Language Bible Version

Jonathan Nih Thilti A Ngamhnâk

¹ Nikhat chu Jonathan nih a riamnam puttu tlangvâl sinah, “Philistia umnâk varâl leiah khin kan va kal lai,” a ti. Sikhawmsele Jonathan nih a pa rangah zeikhawm a simh lo.

² Saul chu Gibeah thawk hen lât chiam lo ah Mikron ah Pomegranate tangah um mun a khuar le; a sinah minung zaruk ding an um.

³ (Bâwlpu ephod puttu chu Ahijah, chu chu Ikabod unaupa Ahitub fapa asi. Ahitub chu Eli tupa Phinehas fapa asi. Eli chu Siloh khua mi bâwlpu asi.) Jonathan a kal ving mi chu âukhawm nih an theih loh.

⁴ Mikmas lei liam ding ah chun Jonathan nih Philistia umnâk mun chu pal ding a suak, lungpi a fawng vut mi panih chu liamnâk khat leikângah pakhat, khat leikângah pakhat an um vevê, pakhat chu Bozez, pakhat dang chu Seneh an ti.

⁵ Pakhat chu liamnâk marlei kângah Mikmas lei hawi hen a um, a dang pakhat chu simlei kângah Geba lei ah hawi hen a um.

⁶ Jonathan nih tlangvâl sinah, “Khinah varâl lei Philistia lunglo tla umnâk ah kan va kal lai. Pathian nih hawng kan ṭangpi lai ba a; hawng kan ṭangpi mi asi chun, nehnâk hawng kan pêk ding mi chu zeikhawm a kham kho lai loh, kan tawm ruangah zeikhawm pawinâk a um lo,” a ti.

⁷ Tlangvâl nih a sâng le, “Zei thilti ding tal na duh mi asi chun, na sinah ka um ko ma hi a,” a ti.

⁸ Jonathan nih, “Asi ma chu,” a ti. “Philistia mi tla sinah kan va a langh lai.

⁹ Kan sinah hawng ding hen hawng kan ngâk ko u, an kan ti chun, kan um muntê ah kan um ko lai.

¹⁰ Sikhawmsele anmah sinah va kal ding hen hawng kan kawh chun, kan kal lai le, chu chu LALPA nih anmah tla neh ding hen singsiahnâk hawng kan pêk mi asi lai,” a ti.

¹¹ Churawhchun, Philistia mi tla anna muhtir le, Philistia mi tla nih, “Zauhnik u! Hebrai tla anna thupnâk pûk thawk hen an hawng suak le, an hawng khi!” an ti.

¹² Churawhchun, Jonathan leh tlangvâl chu an kawh na le, “Hinah hawng kâi u! Thu zeimawh an simh na ding kan nei,” an ti. Jonathan nih tlangvâl sinah, “Hawng ka zûl, LALPA nih anmah nehnâk Israel rangah a pêk rawh,” a ti.

¹³ Jonathan chu liamnâk mun thawk hen a khûp leh a kut hen a kâi le, tlangvâl khawm nih a zûl bâk. Jonathan nih Philistia mi tla chu tlu ving hen a chumh na le, tlangvâl khawm nih a thah na bâk.

¹⁴ Tan khat lakah Jonathan leh tlangvâl nih minung kul ding chu, chu Ekawr chanve mun ah chun an thah na.

¹⁵ Ram lakah Philistia tla chu an lâu le, rûntu tla leh riaknâk mun ah mi kawrsen tla chu an thir le, tual khawm â nîn, ningṭihnâk fâk tak a hawng um.

Philistia Tla Rangah Nehnâk

¹⁶ Saul minung vêngtu tla nih chun Benjamin ram Gibeah ah Philistia tla an tek mi chu an muh na rawh.

¹⁷ Churawhchun, Saul nih a mi tla sinah, “Kawrsen tla kha rêl nik u,” a tling lo mi an um ma? âu me kim lo,” a ti. Chun, an rêl le, Jonathan leh a riamnâm puttu tlangvâlpa chu an um lo.

¹⁸ Saul nih bâwlpu Ahijah sinah, “Ephod kha hinah hawng put,” a ti. (Chu ni ah chun Ahijah nih Israel mâilei kângah Ephod a put tâwn.)

¹⁹ Saul nih bâwlpu a sawnh liau chun Philistia umnâk mun chu a nawk dadauh, Saul nih Ahijah sinah, “LALPA sinah krai khâinâk hun a um lo rawh.” a ti.

²⁰ Churawhchun, a minung tla hen Philistia do ding hen an kal rawh, chu chu nawknâk a zual liau chir asi.

²¹ Hebrai zeimaw mi Philistia leiah ṭawm hen an riakmun ah va um mi tla khawm chu anna lêt nawlh le, Saul leh Jonathan leiah anna ṭângṭawm rawh.

²² A dang tla, Efraim tlâng ram ah anna thup mi tla nih chun Philistia tla an tek phin ti an theih le, Philistia an do mi chu an va bawp na bâk.

²³ Bethaven lanh tiang lampi tluan hen anna do le, chu ni ah chun LALPA nih Israel tla a hum na.

Tuknâk Lîm Nûnah Mi Thu

²⁴ Israel tla chu an sungvâng tuk le, an uai thlo. Saul nih Pathian sinah thutiamnâk nei hen, “âuzawng ka mêlma lakah phû ka lam lânah buh eitu chu siatbarh hen um seh,” ti hen thu a tiamh ruangah. Churuangah âukhawm nih nî tlâk hen zeikhawm an ei loh.

²⁵ Churawhchun, an ektê hen thing mun ah khuaitizû an tawng.

²⁶ Chu thing mun chu khuaitizû hen a khat, sikhawmsele, Saul siatsirh ruangah âukhawm nih an ei ngam lo.

²⁷ Sikhawmsele, Jonathan nih a pa nih siatsirh hen mipi a ṭhih mi a theih lo le, a ṭhianhṭhunh put hen a tawh le, khuai thlâr lakah a tawh le, tâwm a ei, a mit a fiang pum.

²⁸ Sikhawmsele, an lakah mi pakhat nih, “Sungvâng hen kan uai thlo, sikhawmsele na pa nih âuzawng tusûn ah buh eitu chu siatbarh hen um seh, ti hen hawng kan ṭhih ruangah,” an ti.

²⁹ Jonathan nih, “Ka pa nih mi tla lakah thil ṭihnungkâi tak a ti ma chu a! Churuang asi lai khuaitizû ka ei le, panh vur hen ka theih!

³⁰ Mi nih tuknâk ah a lâk mi thil a duh duh hen ei sele, a ṭha khun lai le, Philistia mi tla khawm kan thah tam kho dauh lai ti ruat a kâi,” a ti.

³¹ Chu ni ah chun Israel tla nih Philistia mi tla an neh na le, Mikmas thawk hen Aijalon tiang lampi tluan hen anna do. Israel tla chu an sungvâng le, an uai.

³² Churuang chun mipi tla nih an mêlma thil lâk chu a chuh hen anna chuh le, dawrâ tla, ranrual tla, a mun ah an thah chawlh le, a sâ chu a thî a nâi hen an ei rawh.

³³ Saul sinah chun, “Zauhnik, mi tla nih sâ a thî ei hen LALPA lakah thilsual an ti rawh,” ti hen an simh. Saul nih, “Thil râwktu nan si, keimah leiah lung lianpi hawng rilh u,” ti hen a âu.

³⁴ Chun, thupêk dang a hawng suah nawlh le, “Mi zapi tla nâwngah kal ule, an dawrâ rual leh an ranrual tla hinah hawng put na seh, hinah thah na hen ei na seh, chu tikah sa leh a thisen ei hen LALPA tlûnah thilsual an ti lonâk ding hen,” a ti. Chu zân chun an ranrual zawzawng an kalpi le, an thah na.

³⁵ Saul nih LALPA rangah mâichâm a siam le, chu chu a mâichâm siam masa chem asi.

³⁶ Saul nih a mi tla sinah, “Zân ah kan kal lai le, Philistia tla kan do na lai, khuadei tiang kan do na lai le, kan thah hep na lai,” a ti. A mi tla nih an sâng le, “ṭha na ti zia zawng hen ti,” an ti. Sikhawmsele Bâwlpu nih, “Pathian sinah thu kan deih masa lai rih,” a ti.

³⁷ Churawhchun, Saul nih Pathian sinah thu a deih, “Philistia mi tla ka do lai ma? Nehnâk na hawng kan pêk lai ma?” a ti. Sikhawmsele chu ni chun Pathian nih zeikhawm a sang lo.

³⁸ Churawhchun, Saul nih zapi ruitu tla sinah, “Hinah hawng u, tusûn ni ah hin zei sual me kan ti, hâwl nik u.

³⁹ Tusûn ni ah hin LALPA nung kumza mi Israel nehnâk pêktu min sal hen thu ka tiam, âuzawng thilsual titu chu ka fapa Jonathan khawm siseh thah asi lai,” a ti. Sikhawmsele, âukhawm nih zei thu khawm an sim lo.

⁴⁰ Churawhchun, Saul nih an sinah, “Khinah khin dîr hep nik u, Jonathan leh kei hinah kan dîr lai,” a ti. “Ṭha na ti zia zawng hen ti ko,” ti hen an sâng.

⁴¹ Saul nih LALPA Israel Pathian sinah, “LALPA, zei rangah tusûn ni ah na ka sâng lo? LALPA, Israel Pathian, hi lung thenhlimh hen hawng ka sâng rawh. Sualnâk chu Jonathan mawh kei mawh asi chun Urim hen hawng sâng, sikhawmsele Israel mipi lakah asi chun Thummim hen hawng sâng. Sualnâk chu Jonathan leh Saul tlûnah asi, mipi lam chu an thiang. Churawhchun,

⁴² Saul nih, “Kei leh ka fapa Jonathan karah hin hawng thlûk nawlh rih,” a ti. Jonathan lakah a tlû.

⁴³ Saul nih Jonathan rangah, “Zei thil me na ti?” ti hen a deih. Jonathan nih a sâng le, “Khuaitizû tâwm ka ei. Hinah ka um ko, thi ding khawm ka tîm ko” a ti.

⁴⁴ Saul nih a sinah, “Pathian nih thi thlo an vuak lo chun keimah hawng ka vuak seh!” a ti.

⁴⁵ Sikhawmsele mipi zapi tla nih Saul sinah, “Israel rangah nehnâk rokual tak pêktu Jonathan hi thah ding ma asi awt? Silo! LALPA nung min hen thu kan tiamh, a sam zâi pakhattê khawm a tlâu ding asi lo. Tusûn ni ah a thilti hi Pathian ṭangpi hen a ti mi asi,” an ti. Churawhchun, mipi zapi tla nih Jonathan thi ding chu an hum rawh.

⁴⁶ Chu nûnah chun Saul nih Philistia ṭhâwl ding chu â dîn rawh, anmah ram ah an kîr nawlh rawh.

Saul Lâirêlnâk Leh Dâwngsungkhur

⁴⁷ Saul chu Israel lalchem a hawng si rawh chun, mun kip ah mi a mêlma tla hen anna do le; Moab mi tla, Amon mi tla leh Edom mi tla, Zobah lalchem tla leh Philistia lalchem tla hen anna tuknâk kip ah nehtu asi vima.

⁴⁸ Râlṭha tak hen a do na le, Amalek mi tla men a neh na. Tuknâk kip ah Israel tla chu a hum vima na.

⁴⁹ Saul fapa tla chu Jonathan, Isvi leh Malkisua an si. A fanu upa dauh mi min chu Merab, a ngâksia dauh mi chu Mikal.

⁵⁰ A nupi chu Ahinoam asi, Ahimaz fanu asi; a kawrsen hotu chem chu amah taksa tlâi Abner, a patê Ner fapa asi.

⁵¹ Saul pa Kish leh Abner pa Ner chu Abiel fapa vevê an si.

⁵² Saul nih a damsung zawzawng ah Philistia tla chu râlṭha tak hen a do na. Churawhchun, a kalnâk ah mi chak leh râlṭha a muh na mi zawng chu a kawrsen rangah a lâk hep na.