1 SAMUEL 12 - Bawm Common Language Bible Version

Samuel Thlahnâk Thu

¹ Churawhchun, Samuel nih Israel mi tla sinah, “Ti ding hen nan deih mi chu kan ti piak na rawh. Nan lakah lâirêltu ding lal khawm kan pêk na rawh.

² Tuah a nan rui natu ding hen nan mang lai rawh. Kei lam chu ka tar le, ka sam khawm a pâr rawh, ka fapa tla khawm nan sinah an um. Ka ngâksia liau thawk hen tu tiang nan ruitu ah ka um.

³ Hi mun ah ka um hi. Nan lakah ka palhnâk thil a um chun, LALPA leh a thîm mi lalchem mâika ah tuah hawng ka phiar u. Mi chawpe ma ka fîr? Asi lo leh, mi sanatung ma ka fîr? Mi âutal ka perpet hen ka nehsawh ma? Midang thawk hen nawhnâk tla ka lâk tâwn ma? Hi ka ti mi asi chun ka rulh lai,” a ti.

⁴ Mi zapi nih an sâng le, “Na ti dah loh, na kan perpet lo, na kan nehsawh lo, âu sin khawm ah zeikhawm na lâk lo,” an ti.

⁵ Samuel nih a sâng le, “Zeikhawm ka palh-le-rahnâk nan tawng lo mi lakah hin tusûn ah LALPA leh a lal thîm hi theihpitu si seh,” a ti. Annih nih, “Asi, LALPA chu hawng kan theihpitu asi,” ti hen an sâng.

⁶ Samuel nih a sim vima le, “LALPA chu Mosi leh Aron thîmtu leh an thlâk natu tla Aigupta ram ah mi suakpitu asi.

⁷ Tuah nan umnâk mun chiauah dîr chiau ule, LALPA nih a chaknâk hen nanmah leh nan thlâktu tla ruang a nan suah na mi an theihtir nawlh na ding hen LALPA mâika ah nan thu ka phuang awt.

⁸ Jakob leh a dâwngsung tla Aigupta ram ah an va kal liau khan Aigupta mi tla nih thungâi an nehsawh na le, an thlâk natu nih LALPA sinah ṭangpi an ngiar le, Mosi leh Aron, Aigupta ram thawk hen an suakpi natu chu, chu ram ah a fial na le, hi ram ah a umtir na.

⁹ Sikhawmsele mi nih LALPA an Pathian chu an philh le, churawhchun LALPA nih Philistia mi Moab lalchem Sisera, Hazor khuapi ah kawrsen hotu tla chu an thlâk natu tla a dotir na le, an neh na.

¹⁰ Churawhchun, LALPA rangah ṭangpitu ah an ngiar le, a sinah, ‘LALPA na sinah mi kan pial tâk ruangah kan sual asi. Baal leh Astarte lem tla kan sawnh. Kan mêlma lakah mi ruang hawng kan suah le, nangmah kan sawnh awt rawh,’ an ti.

¹¹ LALPA nih Gideon a fial le, chu nûnah Barak, chu nûnah chun Jepthah a fial, a dawnghnâk ah kei. Kan ektê hen nan mêlma thawk hen ruang hawng kan suah le, him ziar hen nan um.

¹² Sikhawmsele, Nahas, Amon lalchem nih an do na awt mi nan muh le, LALPA chu nan lalchem rangah nan duh lo le, ka sinah, ‘Lalchem lâi hawng kan rêl piaktu ding hen lalchem kan duh,’ nan ti.

¹³ Tuah nan thîm mi lalchem leh nan ka deih mi chu hi hi asi, tuah LALPA nih amah chu an pêk na asi.

¹⁴ Nan lalchem leh nanmah nih LALPA, Pathian chu nan zûl hen nan zah hen a duhzia nan ti hen a thu nan ngâi hen a thupêk tla nan zûl chun zeizawng tluang tak hen a kal lai.

¹⁵ Sikhawmsele LALPA thu chu nan ngâi duh lo hen a thupêk tla nan zûl lo chun nan lalchem leh nanmah tlûnah Pathian a lungsi lai lo.

¹⁶ Churuangah nan dîrmun ah dîr ule, LALPA nih thil rokual a ti ding ni chu zauh ziar u.

¹⁷ Khua rumro liau asi, asi lo mazei? Sikhawmsele, thla ka cham lai le, LALPA nih khuarît leh ruah a hawng fial lai. Chu hâwi hen a hawng tlung tikah chun LALPA rangah lalchem nan deih mi hi sualnâk rokual tak LALPA lakah nan ti mi asi ti nan theih lai,” a ti.

¹⁸ Churawhchun, Samuel nih thla a cham le, chu ni lîlâ ah chun LALPA nih khuarît leh ruah a hawng fial. Churawhchun, LALPA leh Samuel chu mi tla nih an ṭih le, Samuel sinah,

¹⁹ “Pu, zângfahtê hen kan thi lonâk ding hen LALPA na Pathian sinah hawng kan deih piak. Tuah kan sualnâk zawzawng dang chu siah rih hen lalchem kan deih mi thu ah hin kan palh rawh ti kan theihfiang,” an ti.

²⁰ “Ṭih lah u ” ti hen Samuel nih a sâng. “Chu hâwi hen thilsual ti menza khawm ule, LALPA lakah mi kâng dang ah hawitâk lo hen, nan thinlung zawzawng hen a nâwl zulh lehlam u.

²¹ Pathian diklo tla zûl lah u; an ṭangpi hen an hum kho na ding asi lo, a tak an silo ruangah.

²² LALPA nih thutiam bir tak a siam le, a nan kaltâk na ding asi lo, amah mi tak siding hen a nan thîm na rawh ruangah.

²³ Kei lam nih chun nan rangah thlacham ka dâithlanh ruangah LALPA lakah ka mawh ding asi lo rerêng. Chu hâwi ding ngâk hen, nan rangah zei me a ṭha hen a dik mi zawng chu kan sîntir na awt.

²⁴ LALPA lakah ê-aw ngâi ule, nan thinlung zawzawng hen a rianṭuan u. Nan rangah thil rokual tak an ti piak na mi chu theihkumza u.

²⁵ Sikhawmsele, sualnâk nan ti kumza chun nan lalchem leh nanmah hen nan vei lai,” a ti.