1 SAMUEL 11 - Bawm Common Language Bible Version

Saul nih Amon Mi Tla A Neh Na

¹ Thla khat nûnah Amon lalchem Nahas nih Gilead ram ah mi Jabes ramri leiah a kawrsen tla a kalpi na le, khua chu an hual. Jabes mi tla nih Nahas sinah, “Kanmah hen remnâk siam le, kan lâirêltu ah kan mang lai,” an ti.

² Nahas nih a sâng le, “Nanmah hen remnâk leh a san dang pakhat ka siam lai: mikip an mit vawrhlei ka chawih zek lai le, Israel mi zawzawng ningzak ka saih awt,” a ti.

³ Jabes khua mi ruitu tla nih, “Israel ram pumpi ah thâwng thanh ding hen ni sarih hun hawng kan pêk. Chunah mi âukhawm ṭangpitu an umlo chun na sinah kan hawng a pêk lai,” an ti.

⁴ Mi an fial mi tla chu Saul umnâk Gibeah an va tleng le, thu an theih rawh chun lungdawng hen an ṭap.

⁵ Saul chu phâisen ah a châwchal hen a hawng tlung le, “Zei thupawi me? Zei rangah ti ti mi an ṭap,” a ti. Jabes thawk hen thâwng an hawng tlunh mi an simh.

⁶ Saul nih chu chu a theih rawh chun LALPA thlarau nih a luah le, a thin a thawk rawh.

⁷ Chawchal panih a put le, a chan dip le, minung a fial na le, sâ a chan dip mi an put le, Israel ram pumpi ah thu an thanh. “Âuzawng Saul leh Samuel râltuknâk ah zûl duh lo mi vial an chaw tla hi hâwi hen ti piak an si lai!” ti hen. Israel mi tla nih LALPA thilti ding chu an ṭih le, pakhat khawm âklo hen an kal hep.

⁸ Saul nih Bezek ah a pumh hep na le: Israel lakah mi nuai thum, Juda lakah mi sîng thum an si.

⁹ Jabes thawk hen thu thanhtu tla sinah, “Thâizîng nî a sûn lânah ruangsuah hen an um ding mi thu simh na,” an ti na. Jabes mi tla nih chu thu an theih rawh chun thungâi anna lâwm le,

¹⁰ Nahas sinah, “Thâi ah na sinah kanna pêk lai, na duhzia zia hen na hawng kan ti kho lai rawh,” an ti.

¹¹ A thâizîng ah a mi tla chu Saul nih murui thum ah a ṭhen na le, khuadei rianruan ah an mêlma Amon tla riaknâk chu an va nam. Nî sûn tiang an thah na, an thah bang chu an duhnâk chiau ah an tek.

¹² Churawhchun, Israel mipi tla nih Samuel sinah, “Saul kan lal asi lai loh titu tla kha zeiah an um? Hawng kan ap u kan thah na awt,” an ti.

¹³ Sikhawmsele, Saul nih, “Tusûn ni ah âukhawm nan thah ding asi lo, tusûn hi Israel ruangsuahnâk ni asi ruangah,” a ti.

¹⁴ Churawhchun, Samuel nih an sinah, “Gilgal ah kan ektê hen kan va kal lai le, Saul kan lal asi ti hen veikhat kan phuang lai rih,” a ti.

¹⁵ Churawhchun, an ektê hen Gilgal ah an va kal le, chu mun thenhlimh ah chun Saul chu lal ti hen an phuang. Chunah chun kawmhnâk bâwlnâk an pêk le, Saul leh Israel mi tla nih chu thu chu an lawmh.