1 SAMUEL 10 - Bawm Common Language Bible Version

¹ Samuel nih oliv sariak dûr a lâk le, Saul lû lakah a tawih le, a châwchawk le, “LALPA nih Israel mi tla lâirêltu ah sariak a nan thuh. A mi tla lakah lâi na rêl lai le, an mêlma tla lakah na hum na ding asi. Hi nih hin a mi le tla lâirêltu ding ah LALPA nih a nan thîm mi na si ti a theihtir:

² Tusûn ni ah na ka kaltâk rawh chun Benjamin ram ah Rakel thlân kiangah mi Zelzah ah minung panih hen nanna tawng lai. Chu tla nih chun na sanatung na hâwl mi an tawng rawh ti thu a nan simh lai. Churawhchun, na pa chu sanatung ruangah a lawksawng lai lo rawh le, nangmah ruangah a lawksawng dauh lai. ‘Ka fapa hi zeitin me ka ti awt le?’ ti hen a deih lemang na lai.

³ Chu thawk hen chun Tabor ah mi thing thenhlimh tiang na va kal lai le, chunah chun minung pathum Bethel ah Pathian sinah bâwlnâk pêk ding hen kal mi tla hen nanna tawng lai. Minung pakhat nih kêl fa pathum a ruai lai le, a dang pakhat nih sangvut tlang thum a put lai, a pathumnâk nih uain dûr khat dil hen a put lai.

⁴ Sang tlang panih a nan pêk lai le, chu chu na lâk lai.

⁵ Churawhchun, Gibeah mi Pathian Tlângah na va kal lai le, chunah chun Philistia tla riakmun a um. Khuapi kiangah khuavâng murui tlângah mi mâichâm thawk hen an hawng tum mi hen nanna tawng lai. Ṭingṭang rî tam tak mi, khuang, theikhang, ṭingṭangtê tum bû hen an hawng ṭum lai. An lâm hen an âu lai.

⁶ LALPA thlarau nih a nan luah lai le, Pathian sawnhnâk leikângah âunâk leh lâmnâk ah na va a ṭâwm bâk lai le, thinlung dang ving hen na um lai.

⁷ Chubang hâwi thil a hawng um rawh chun Pathian nih a nan ruinâk zawng ah chun ti vima ko.

⁸ Gilgal ah ka mâilei ah kal le, chunah chun kanna tawng lai le, bâwlnâk duah mi leh kawmhnâk bâwlnâk ka pêk lai. Chunah chun zei ti ding ka nan simh lânlo chu ni sarih tiang ngâk,” a ti.

⁹ Saul nih Samuel a kaltâk rawh chun Pathian nih nunchan thar tak a pêk. Samuel nih a simh mi zawzawng chu ni ah chun a tlung hep.

¹⁰ Saul leh a to-awpa chu Gibeah an va tlung rawh chun khuavâng rual tla hen anna tawng rawh. Mawhsareh hen Pathian thlarau nih Saul chu a hawng luah le, an lâm hen an âunâk ah chun a va ṭâwm ving bâk.

¹¹ A lânah theihtu tla nih chu hâwi hen a um mi an muh le, “Kish fapa lakah hin zei thil me a hawng um? Saul khawm hi khuavâng a hawng si bâk rawh na maw?” an ti.

¹² Chunah um mi tla nih chun, “Hi bang khuavâng tla hi an pa âu me siding hen nan ruat?” ti hen an deih na. Chu hâwi simnâk a umnâk chu hi hâwi asi, “Saul khawm khuavâng asi bâk na maw?” an ti.

¹³ Saul chu lâm leh a âu mi a lîm rawh chun tlângah mi mâichâm leiah chun a kal rawh.

¹⁴ Saul patê nih amah leh a to-aw chu a muh le, “Zeiah nan um ving?” ti hen a deih na. Saul nih, “Sanatung kan hâwl mi ta a,” ti hen a sâng. “Kan tawng kho lo rawh le, Samuel sinah kan va kal,” ti hen Saul nih a sâng.

¹⁵ “Asi chun, zei an simh na ne?” ti hen Saul patê nih a deih na.

¹⁶ “Ran tla chu tawng an si rawh ti hen hawng kan simh,” ti hen a sâng. Sikhawmsele Samuel nih lal na si rawh ti hen a simh mi chu a patê rangah a simh lo.

Saul Chu Lal Asi Mi Phuangnâk

¹⁷ Samuel nih mi zapi tla chu Mizpah ah Pathian sawnh ding hen a pumh na le, an sinah,

¹⁸ “LALPA, Israel Pathian nih chun, ‘Aigupta ram ah Aigupta mi tla leh nanmah an nehsawh natu dang tla lakah mi ruang ka nan suah na rawh asi.

¹⁹ Kei, nan lawksawngnâk zawzawng leh nan harsatnâk lakah mi ruang a nan suahnatu Pathian kasi, sikhawmsele tusûn ni ah hin nan ka nawng le, lal an pêk na ding hen nan ka deih. A ṭha ma chu, asi chun LALPA mâika ah a phun phun leh a chi chi hen hawng khap u,’ ” a ti na.

²⁰ Samuel nih a phun phun hen a kawh na le, LALPA nih Benjamin phun a thîm.

²¹ Churawhchun, Benjamin chi tla chu an dâwngsungkhur vima hen a kawh na le, Matri dâwngsungkhur chu thîm an si. Matri dâwngsungkhur ah mipa tla chu mâilei ah an va kal le, Kish fapa Saul chu thîm hen a um. An hâwl le, khawmsele an tawng kho lo.

²² “Midang an um rih ma?” ti hen LALPA an deih. LALPA nih, “Saul chu tlûn leiah thil siahnâk nâwngah â thup ko,” ti hen a sâng.

²³ Churawhchun, an va kal le, Saul chu mi zapi nâwngah midang zawzawng ngâk hen a sâng chem zia a muh.

²⁴ Samuel nih mi zapi tla sinah, “Hi minung hi LALPA nih a thîm mi asi! Amah hâwi hi kan lakah âukhawm an um lo,” a ti. Zapi zawng tla nih, “Lal chu dam sâwt seh,” ti hen an âu.

²⁵ Samuel nih zapi tla chu lal rianṭuan ding mi leh thuneihnâk tla rangah a simhfiang na le, lasuibu ah an rîn le, mun thenhlimh ah an siah. Churawhchun, in leiah a lâwitir na rawh.

²⁶ Saul khawm Gibeah khua ah in leiah a tlung bâk rawh. Mi thiltikho, zeimaw mi tla, Pathian nih an thinlung a tawngh na mi a sinah an va kal.

²⁷ Sikhawmsele, mi rualo tla zeimaw mi nih, “Hi minung nih kan rangah zei thil ṭha me a ti kho lai,” an ti. Saul rangah an siarlo le, zei thilpêk khawm an pêk lo.