1 SAMUEL 1 - Bawm Common Language Bible Version

Elkanah Leh A Dâwngsung Tla Siloh Ah

¹ Efraim tlâng ram ah Ramah khua ah a um mi, minung pakhat a min Elkanah, Efraim phun lakah mi a um. Amah chu Jeroham fapa, Elihu tupa, Tohu dâwngsung, Zuph chi asi.

² Elkanah nih nupi panih a nei le, Hanah leh Peninah an si. Peninah nih chun fa a nei le, Hanah nih chun fa rêng a nei lo.

³ Elkanah chu kum siar hen Ramah khua thawk hen Siloh khua ah LALPA zeizawng tikho sinah bâwlnâk ap ding leh va sawnh ding hen a kal tâwn le, chunah chun Hopni leh Phinehas Eli fapa panih chu LALPA bâwlpu an si.

⁴ Elkanah nih a kal kip ah bâwlnâk Peninah rangah anrang khat, a fa tla rangah anrang khat chiau a ap.

⁵ Hanah chu dâwt ngâi khawmsele anrang khat cho ap ding a suak, LALPA nih fa a neitir lo ruangah.

⁶ Hanah chu LALPA nih fa ring lo hen a siam mi ruangah Peninah zuamnâk nih a thinlung a fâktir khun.

⁷ Hi hâwi hen kum siar hen a um vima le, LALPA in ah a kal kip ah Peninah nih buh kâ thâw lo rê hen a ṭaptir.

⁸ A pasal Elkanah nih, “Hanah, zei rangah na ṭap? Zei rangah buh na ei lo? Zei rangah na ngaihsia kumza? Fapa parâ neitu ngâk hen kan duh lo ma?” a ti.

Hanah Leh Eli

^9-10 Ni khat chu Siloh khua ah LALPA in ah buh ei an lîm rawh chun Hanah chu a thawk le, thungâi a lawksawng a fâk rawh. Ngaihsia tak hen ṭap bû hen LALPA sinah thla a cham. Chu liau chirah chun Eli bâwlpu chu a tonâk mun inkhâr kiangah a to ko.

¹¹ Hanah nih thutiamnâk bir tak hen a siam, “LALPA, zeizawng tikho, na to-aw hi hawng ka zauhnik, ka lawksawng zia hi hawng ka zauh le, theihkumza, hawng ka philh rîlmâl lah! Fapa na ka pêk chun a dam sung zawzawng na sinah pêk ding hen leh a sam mêt lo thlo ding hen thu ka tiam,” a ti.

¹² Hanah nih LALPA sinah thla a cham vima le, Eli nih a mûr a châng mi chu a zauh ko.

¹³ Dâisip hen thla a cham mi asi le, a mûr cho a changh le, a hâu chu a suah lo. Churuangah Eli nih zû a ri mi siding hen a ruat.

¹⁴ A sinah, “Na zurît kha bâng le, a fîmkhur! Na zû din kha bâng le, din lah rawh,” a ti.

¹⁵ Hanah nih, “Ka ri lo, zû ka din lo Pu,” ti hen a sâng. “Zû ka din rerêng lo, ka thinlung a fâk le, LALPA sinah thlacham hen ka lawksawng thu ka sim mi asi.

¹⁶ Nunau rualo ah hawng ka ruat lah, ka lawksawng tuk ruangah hi hâwi hen thla ka cham mi asi,” a ti.

¹⁷ “Thlangam tak hen um rawh, Israel Pathian nih na deih mi chu a nan pêk seh,” Eli nih a ti.

¹⁸ Hanah nih a sâng le, “Zângfahtê hen ka tlûnah vêlnei kumza rawh,” a ti. Churawhchun, a kal le, buh tâwm a ei le, a lawksawng a reh rawh.

Samuel Suaknâk Leh Apnâk

¹⁹ A thâituan zîngtê ah Elkanah leh a dâwngsung tla chu an thawk le, LALPA an sawnh thluh rawh chun an khua Ramah ah an tlung rawh. Elkanah nih a nupi Hanah chu a itpi le, Hanah thlachamnâk chu LALPA nih a sâng.

²⁰ Churawhchun, a râi le, fapa a ring. A min ah Samuel a sak. “Amah ruangah LALPA ka ngiar mi asi,” a ti le, a simhfiang.

²¹ Elkanah leh a dâwngsung tla rangah kum siar bâwlnâk leh a bîk hen thu a tiamh mi rangah bâwlnâk tla LALPA sinah ap ding hen Siloh khua ah kal ding cham a tlung nawlh rawh.

²² Chu tan ah chun Hanah chu a va kal lo, a pasal sinah, “Hi ngâksia hi a tlei dauh tikah LALPA in ah ka kalpi lai le, chunah chun a san tlum hen a um lai rawh,” a ti.

²³ Elkanah nih a sâng le, “A dik asi, ṭha na ti chem mi hâwi hen ti ko amah na tleitir lânlo chu in ah umpi ko, LALPA nih na thutiam ziatê hen umtir seh,” a ti. Hanah chu a in leiah a fa zauhkhenh hen a um rawh.

²⁴ Chun, a tlei dauh rawh chun Siloh khua ah a kalpi le, kum thum mi chawchal a put le, sangvut kilogramme râ leh uain savun dûr khat a put. Samuel chu a kalpi le, a ngâksia ual rih; Siloh khua ah LALPA in ah a kalpi rawh.

²⁵ Chawchal chu an thah rawh chun ngâksia chu Eli sinah an kalpi.

²⁶ Hanah nih Eli sinah, “Pu, zângfahtê hen hawng ka ngaihdam, na ka theih ko rih ma? Hinah nunau a dîr hen LALPA sinah thlachamtu na ka muh mi kha kasi.

²⁷ Hi ngâksia hi ka deih le, ka deih mi chu hawng ka pêk taktê.

²⁸ Churuangah LALPA sinah amah chu ka pêk, a dam sung zawng LALPA tâ siding hen,” a ti.