1 Lal 5 - Bawm Common Language Bible Version

Solomon nih Biakin Sak Ding a Timhtuah

¹ Tura Lalchem Hiram chu David hâwikawmh asi kumza. Solomon chu a pa ruangrûl ah a lal ti a theih le, a sinah thu lanhtu mi a fial.

² Solomon nih Hiram sinah thu a thanh nawlh,

³ “Ka pa David chu bânglo hen mêlma tla ram ah râltuktu asi ruangah a mêlma zawzawng tla nehnâk LALPA nih a pêk lânlo chu LALPA sawnhnâk ding hen Biakin a sak kho lo ti na theih.

⁴ Sikhawmsele, tu lam chun LALPA Pathian nih ramri zawzawngah thlangamnâk leh remnâk hawng ka pêk rawh. Tuk leh thahnâk ding hen âukhawm mêlma ka nei lo rawh.

⁵ LALPA nih ka pa David sinah, ‘Na fapa, a nehnûnah Lalchem ah ka siam ding mi nih ka rangah Biakin hawng ka sak piak lai,’ ti hen thu a tiamh. Tuah LALPA ka Pathian sawnhnâk ding hen Biakin chu sak ding ka tum rawh asi.

⁶ Churuangah chun na mi tla sidar thing hâu ding hen Lebanon ah fial na. Ka mi tla khawm an sinah an ṭuan bâk lai le, na mi tla rianṭuan man chu nangmah nih na ti zia zia ka pêk lai. Kei minung tla chu nangmah mi tla hâwi hen thing hâu an thiamlo ti na theih ko kha,” a ti.

⁷ Hiram nih Solomon thuthanh a theih rawh chun thungâi â lâwm le, Hiram nih, “Tusûn ni ah phun rokual tak lakah mi amah ruangrûl ah lalchem siding hen fapa fing tak David rangah pêktu LALPA chu sawr hen um seh!” a ti.

⁸ Churawhchun, Hiram nih hi bang thu tla hi Solomon sinah a thanh, “Na thuthanh chu ka theih le, na ka ngiar mi hâwi hen ti ding ka tîm asi, sidar thing leh far thing tla chu kan ṭhenh lai.

⁹ Ka mi tla nih thing tan chu Lebanon tlâng thawk hen tipi tiang an hawng put lai le, chunah mi chu an têl lai le, nangmah nih na ruat mi mun ah an hawng lawngh lai. Chun, ka mi tla nih an têl mi chu an sût lai le, na mi tla nih mawhphurhnâk chu an lâk lai rawh. Nangnih na ti ding mi chu ka mi tla rangah eibâr na pêk na ding asi,” a ti.

¹⁰ Hiram nih Solomon rangah sidar leh far thing tan tla a duh mi tla chu a pêk le,

¹¹ Solomon nih Hiram rangah a mi tla ei ding ah fâng metrik ton sâng nih leh oliv sariak litre nuai li kum siar hen a pêk na.

¹² LALPA nih a thutiam ziatê hen Solomon chu finghnâk a pêk. Solomon leh Hiram karah remnâk a um le, churawhchun khatlei khatlei kamnâk an siam.

¹³ Lalchem Solomon nih Israel tla lakah rianṭuantu rang ding ah sîng thum a ruat le,

¹⁴ Adoniram chu an hotu rangah a siah. Minung sîng khat vima hen murui thum a suah na, murui kip nih Lebanon ah thla khat, in leiah thla nih an mang.

¹⁵ Solomon nih lung chawhtu minung sîng riat, a thiartu sîng sarih a nei.

¹⁶ Chu lakah minung sâng thum leh zathum chu zauhdiktu rangah a siah.

¹⁷ Solomon lalchem thupêk hen Biakin lungphûm rangah lung ṭha ṭha a lian pipi mi an chawh.

¹⁸ Solomon leh Hiram rianṭuantu tla leh Biblos khuapi mi tla nih Biakin saknâk ding ah lung leh thing an timhtuah.