1 Lal 4 - Bawm Common Language Bible Version

Solomon Rianṭuantu Tla

¹ Israel mi zawzawng lakah Solomon chu lalchem asi.

² Hi bang tla hi a rianṭuantu milian tla an si: Bâwlpu: Zadok fapa Azariah.

³ Lâirêlnâk ah lasui rîntu tla: Elihoreph leh Ahijah, Shisa fapa tla an si. Lasui rîn mi lakah thuneitu chu: Ahilud fapa Jehosaphat asi.

⁴ Kawrsen hotu chu: Jehoiada fapa Benaiah Bâwlpu tla chu: Zadok leh Abiathar

⁵ Ram ṭhen mi bial khat lakah hotu tla chu: Azariah fapa Nathan Lal krai pêktu lian chu: Nathan fapa Zabud bâwlpu

⁶ Lal in ah to-aw tla hotu chu: Ahishar Rianṭuantu tla hotu chu: Abda fapa Adoniram

⁷ Solomon nih Israel ram lakah bial lâirêltu leinih a ruat na. Chu tla nih chun an bial thawk hen lal leh a dâwngsung tla rangah eibâr an hawng pêk; minung pakhat chu kum khat sungah thla khat vima mawhphurhtu an si.

⁸ Ram khat lakah hotu chiau leinih ruat mi chu hi tla hi an si: Benhur: Efraim tlâng ram hotu asi.

⁹ Bendeker: Makaz khuapi tla, Saalbim, Beth Semes, Elon leh Beth Hanan

¹⁰ Benhesed: Aruboth khuapi tla, Sokoh leh Hepher ram zawzawng hotu asi.

¹¹ Benabinadab chu: Solomon fanu Taphath umpitu asi le, Dor ram zawzawng hotu asi.

¹² Ahilud fapa Baana: Taanak leh Megido khuapi tla, leh Beth Shean leh Zarethan khuapi kiang leh ram zawzawng, Jezreel khuapi simlei kâng tla, Abel Meholah leh Jokmeam khuapi tiang hen hotu asi.

¹³ Bengeber: Gilead ram ah Ramoth leh Jair phun tla tâ, Gilead ram ah mi khua tênâu tla, Manaseh ram leh Basan ram ah Argob ram, a ektê hen khua sâwmruk an si, kulhnei hen a kulh kawtkâ tla chu dâr hen renh mi tla lakah hotu asi.

¹⁴ Iddo fapa Ahinadab: Mahanaim ram hotu asi.

¹⁵ Ahimaz chu Solomon fanu dang Basemath umpitu asi: Naphtali ram hotu asi.

¹⁶ Baana fapa Husai: Aser ram ah Bealoth khua hotu asi.

¹⁷ Paruah fapa Jehosaphat chu: Isakar ram hotu asi.

¹⁸ Ela fapa Shimei chu: Benjamin ram hotu asi.

¹⁹ Uri fapa Geber chu: Gilead ram, Amor lalchem Sihon leh Basan lalchem Og nih a lânah lâi an rêlnâk ram hotu asi. Hi bang leinih silo hen ram pumpi ah lâirêltu pakhat a um rih.

Solomon Lâirêl Tluang Zia

²⁰ Juda leh Israel tla chu tipi kapah sep rêl châwklo hâwi hen an hawng pung le; an din hen an ei le, lâwptlo tak hen an um.

²¹ Solomon lalram chu Eufretis tiva thawk hen Philistia ram leh Aigupta ramri tiang asi. A damsung zawzawng chu a sinah siah an pêk le, amah tangah an um hep.

²² Solomon nih ni khat ah eibâr a herh zat chu sangvut a ṭha mi zât kilogram sângnga leh buh kilogram sîng khat;

²³ chawpê châwm mi parâ, ram lakah râwl tlattir mi chawpê a bit mi kul, dawrâ zâ, sazuk, sakhi leh sazuk chal tla leh âr vulh mi tla rêlsih lo hen.

²⁴ Solomon ram chu Eufretis Tiva thlanglei ram zawzawng, Eufretis mi Tipsah thawk hen Gaza khuapi thlanglei tiang a uap asi. Eufretis thlanglei ram ah mi lal tla chu amah tangah an um hep. Ram zawzawng tlâi dut hen thlangam tak hen a um.

²⁵ A damsung zawzawng chu Israel leh Juda tla chu him tak hen an um le, dâwngsungkhur kip nih grep zûn leh theipi mah tâ chiau an nei.

²⁶ Solomon nih kari nûktu rang sîng li leh minung chuanhnâk rang sîng khat leh sâng nih a nei.

²⁷ A lâirêltu leinih lakah minung pakhat vima nih lalchem Solomon leh a dâwngsung tla rangah eibâr pêk ding hen ruat asi, a herh mi thil zeizawng khawm a pêk kumza.

²⁸ Lâirêltu kip nih fapawn leh fâng lal vo an pêk tâwn. Rang kari nûktu rang leh rang tek chak tla rangah a herhnâk kip ah an pêk.

²⁹ Pathian nih Solomon rangah finghnâk leh theihthiamnâk tla theih phanh lo rê a pêk.

³⁰ Solomon chu Aigupta ram ah mifing tla leh saklei ah mifing tla ngâk hen a fing dauh.

³¹ Mi zawzawng lakah a fing chem: Ezrahit mi Ethan leh Heman, Kalkol leh Darda, Mahol fapa tla ngâk hen khawm a fing dauh. A finghnâk chu amah hen anna tlâi mi ram zawzawngah a thang rawh.

³² Thufing sâng thum leh La sâng khat ngâk a tam a phuah.

³³ Thing leh thlâi chîng mi tla, Lebanon tlângah Sidar thing kulh vâm lakah husop a chawrh mi tla; ran tla, va tla, tual ah vâkrît tla, ngâ thâwngthâng tla a sim tâwn.

³⁴ Laikulh zawzawngah lal tla nih a finghnâk va ngâi ding hen mi an fial tâwn.