1 Lal 3 - Bawm Common Language Bible Version

Solomon Nih Finghnâk Deih Hen Thla A Cham

¹ Solomon nih Aigupta lalchem fanu chu an karah tlâinâk um ding hen a umpi. Amah in leh Biakin leh a kulh tla a dih lânlo chu David khuapi ah a kalpi.

² LALPA Biakin sak asi lo rih le, churuangah chun mi zapi tla nih mâichâm dang chereh ah bâwlnâk an ap.

³ Solomon nih LALPA chu a dâwt le, a pa sîntirnâk khawm a zûl, ran tla a thah le, mâichâm dang dangah bâwlnâk tla a ap.

⁴ Veikhat chu Gibeon ah bâwlnâk ap ding hen a va kal le, chunah mi mâichâm chu minthang chem asi ruangah. A lânah chu lakah chun bâwlnâk duahphung zat tam tak a ap rawh.

⁵ Chu zân ah chun a mang ah LALPA â langh le, a sinah, “Zei me a nan pêk sele na duh?” a ti.

⁶ Solomon nih a sâng le, “Ka pa David na to-aw lakah na dâwtnâk rokual tak na langhtir kumza le, nang hen nanna tlâinâk thu ah a ṭha hen zumh a kâi le, na dâwtnâk rokual tak tla chu langh vima hen tusûn ni ah a mahmun luah hen lâirêltu ding fapa tla pêk mi keimah lakah hin na dâwtnâk a dawnglo.

⁷ LALPA, Pathian, ngâksiatê si hen lâirêl thiamlo khawmsele ka pa ruangrûl ah lalchem ah na hawng ka siam.

⁸ Kei hi na tâ siding hen na mi tla lakah na hawng ka thîm mi asi le, zapi minung chu rêl châwklo rê hen an tam.

⁹ Churuangah chun na mi tla chu dik tak hen lâi ka rêl kho ding hen leh a sia a ṭha lakah a dangnâk ka theih khonâk ding hen finghnâk ka herh mi hawng ka pêk rawh. Chu lo chun zeitin hi na mipi tla zeiliau zawng ah lâi ka rêl lai,” a ti.

¹⁰ Hi hâwi hen Solomon nih a deih ruangah LALPA chu thungâi â lâwm le,

¹¹ churuangah chun a sinah, “Na rangah san sâunâk mawh neihnâk mawh, na mêlma tla rangah thihnâk mawh deih lo hen, dik tak hen lâirêl khonâk finghnâk na ka deih ruangah,

¹² na deih mi chu ka nan pêk lai. Mi âukhawm nih an nei dahlo mi finghnâk leh theihthiamnâk tam tak ka nan pêk lai.

¹³ Na ka deih lo mi thil na damsung zawzawngah neih-le-siahnâk leh zahkâinâk lal dang dang nih an nei mi ngâk hen tam dauh ka nan pêk lai.

¹⁴ Na pa David nih a ti mi hâwi hen ka thu na ngâi hen ka dân thu na zâwt chun san sâunâk khawm ka nan pêk lai,” a ti.

¹⁵ Solomon chu a hawng thawk le, Pathian nih a mang ah thu a sim ti a theih. Churawhchun, Jerusalem ah a va kal le, LALPA Thudântuk Bâwm mâika ah a va dîr le, duahphung bâwlnâk tla leh kawmhnâk bâwlnâk tla LALPA sinah a ap. Chu nûnah chun a rianṭuantu zawzawng tla sinah puai a tuah piak na.

Solomon Nih Thunawk Har Tak A Rêl

¹⁶ Ni khat chu nunau â zuar mi panih an hawng le,

¹⁷ pakhat dauh nih, “Bâwipa, hi nunau hen in pakhat ah kan um le, munkhat kan um liauah fapa ka ring.

¹⁸ Fa ka ringnâk hen a ni nih nûnah anih khawm fapa a ring bâk. Chu in ah chun âukhawm an um lo, kanmah panih cho kan um.

¹⁹ Zân ah a fa chu a denh le, a thi ving.

²⁰ Chu zân ah chun a hawng a ṭhang le, ka fapa ka kiangah mi chu a lâk le, a ihkhun leiah a kalpi ving; a fa thi mi chu ka ihkhun ah a hawng siah.

²¹ A thâizîng ah ka hawng a ṭhang le, nûk ka dinh awt le, a thi chia hen ka muh. Nâi tek hen ka zauh set le, ka fa asi lo thlo,” a ti.

²² Sikhawmsele, nunau pakhat nih a thawh le, “Si lai le! A nung mi kha ka fa asi, a thi mi kha amah fa asi!” a ti. A tîrah mi nu nih a sâng le, “Silo, a thi mi kha na fa asi, a nung mi kha ka fa asi,” a ti. Churawhchun, lalchem mâika ah thu anna êl rawh.

²³ Lalchem Solomon nih, “Nan panih hen a nung mi chu ka fa, a thi mi chu midang fa nan ti vevê,” a ti.

²⁴ Nâmsâu a lâktir na le, a sinah an hawng put rawh chun,

²⁵ “Kha ngâksia a nung mi kha tan phak ule, a tan vevê pêk na u,” a ti.

²⁶ A nu tak asi mi nih a fapa zângfahnâk hen a khat le, lalchem sinah, “Bâwipa, zângfahtê hen thah rîlmâl lah! Amah rangah pêk ko!” a ti. Pakhat nih chun, “Kan panih hen a zei mi khawm hawng kan tingtir lah, kal le, tan nih hen suah ko,” a ti.

²⁷ Churawhchun, Solomon nih, “Kha ngâksia kha thah lah! A masa dauh mi kha a nu tak asi, amah rangah pêk,” a ti.

²⁸ Churawhchun, Israel mi tla nih Solomon nih thu a thlûk zia an theih le, thungâi an zah, êlnâk ding mi thu lakah ṭha tak hen thlûk ding hen finghnâk Pathian nih a pêk ti an theih ruangah.