1 Lal 1 - Bawm Common Language Bible Version

La1chem David Tar Liau Hun

¹ Lalchem David chu thungâi hen a tar rawh le, a to-aw nih puan vurh khawmsele a lum kho lo rawh.

² Churawhchun, a rianṭuantu tla nih, “Bâwipa, nangmah an zauhkhenhtu leh na sinah um ding hen nungâk kan hâwl piak lai. Nangmah naih tekah a zâu lai le, an lumtir lai,” an ti.

³ Churawhchun, Israel ram zawzawngah nungâk mêlṭha chu an hâwl le, Shunem ah nungâk mêlṭha tak a min Abishak an tawng le, lal sinah an hawngpi rawh.

⁴ Amah chu thungâi a mêlṭha le, lal chu a ngâk le, a zauhkhenh rawh; sikhawmsele, a ihpi lo.

Adonijah Nih Lal Ding A Tum

^5-6 Absalom chu a thi rawh le, David leh Haggith fapa Adonijah chu an fapa upa thibang asi. Amah chu thungâi a mêlṭha. David nih zei lak khawm ah nun a simhnâk a um lo, lal siding hen a tum thlo; rang kari tla a timhtuah le, a mâilei ah kaltu mi sâwmga a ruat.

⁷ Joab (a nu chu Zeruiah) leh Abiathar bâwlpu hen anna sâwn le, amah ṭangpi ding hen rem an ti.

⁸ Bâwlpu Zadok; Jehoiada fapa Benaiah, Khuavâng Nathan, Shimei, Rei leh David vêngtu tla chu Adonijah leiah anna kawplo.

⁹ Ni khat chu Adonijah nih Enrogel tinung kiangah Rûl lungpi (zebelet) lakah bâwlnâk dawrâ tla, chawchal tla leh chawlâ bit tak tla a ap. Lalchem David fapa tla leh lal rianṭuantu tla Juda ram ah um mi tla chu bâwlnâk puai lakah a tel ding hen a sâwm na.

¹⁰ Sikhawmsele, a unau dang a nu-ei fapa pakhat Solomon, khuavâng Nathan, Benaiah leh lal vêngtu tla chu a sâwm na lo.

Solomon Lalchem Ah Siam Asi Nâk.

¹¹ Nathan chu Solomon nu Bathsheba sinah a va kal le, “Haggith fapa Adonijah chu amah lal ah â siam ti mi hi na theih lo ma?” ti hen a deih. Chu thu chu lalchem David khawm nih a theih loh!

¹² “Na nungnâk leh Solomon nungnâk him ding na duh asi chun

¹³ lalchem David sinah va lût sawm le, ka fapa Solomon hi nangmah ruangrûl ah lalchem siding hen thu na tiamh mi si lo ma? Zeitin Adonijah chu lalchem asi kho zia lai?” va ti.

¹⁴ Nathan khawm nih, “Lalchem David hen nanna sâwn liauah na thusim ka nan bawp bâk lai,” a ti.

¹⁵ Churawhchun, lalchem hen a tawng ding hen a ihkhun sungah a va lût rawh. David chu a tar thlo rawh le, Shunem ah mi nungâk Abishak nih a zauhkhenh.

¹⁶ Bathsheba chu lalchem mâika ah a va kûn le, lalchem nih, “Zei na duh?” a ti.

¹⁷ Anih nih a sâng le, “Bâwipa, nangnih, LALPA na Pathian min hen ka fapa Solomon hi na nehnûnah lalchem ah siam ding hen thu na ka tiamh.

¹⁸ Sikhawmsele, Adonijah lalchem ah â siam ving, chu thu chu na theih lo thlo.

¹⁹ Chawchal tam tak leh dawrâ tla, chawlâ bit tak tla bâwlnâk ah a ap le, na fapa tla, Abiathar bâwlpu, na kawrsen hotu Joab chu puai ei ding hen a sâwm na le, sikhawmsele na fapa Solomon chu an sâwm lo.

²⁰ Bâwipa, Israel mi zawzawng nih nangmah ruangrûl ah lalchem ah âu na siam awt ti theih ding duh hen an bawh ko.

²¹ Chu hâwi hen na ti lo hen na thi beibang chun kei leh na fapa Solomon chu perpettu ah ngaih kan si awt,” a ti.

²² Thu a sim liau chirah chun khuavâng Nathan chu a hawng bâk.

²³ Lalchem sinah khuavâng khawm chunah a um ko ti hen an simh. Churawhchun, Nathan chu a va lût le, lalchem mâika ah a kûn le, a sinah,

²⁴ “Bâwipa, Adonijah hi nangmah ruangrûl ah lalchem siding hen na phuang ma?

²⁵ Tusûn ni takah hin chawchal tam tak leh dawrâ tla leh chawlâ bit tak thah hen bâwlnâk a ap le, na fapa zawzawng tla, na kawrsen hotu Joab leh bâwlpu Abiathar a sâwm na le, tu tak hin puai ei hen, ‘Lalchem Adonijah san sâu seh!’ ti hen an âu.

²⁶ Sikhawmsele, kei, nang, bâwlpu Zadok, Benaiah leh Solomon lam chu hawng kan sâwm lo.

²⁷ Hi zawzawng hi nang lalchem nih rem na ti hen na ruangrûl ah âu lalchem siding hen na rianṭuantu tla na simh na mazei?” a ti.

²⁸ Lalchem David nih “Bathsheba hawng lût nawlh ding hen simh u,”a ti le, churawhchun a hawng le, a mâika ah a dîr.

²⁹ Churawhchun, a sinah, “LALPA a nung mi, ka lawksawngnâk ah ruang hawng ka suahtu min hen thu ka nan tiamh,

³⁰ tusûn ni hin LALPA Israel tla Pathian min hen na sinah thu kan tiamh mi ziatê hen ka ruangrûl ah na fapa Solomon chu a lalchem ding asi,” a ti.

³¹ Bathsheba chu a kûn le, a sinah, lalchem ka Bâwipa chu a san sâu seh!” a ti.

³² Churawhchun, lalchem David nih Zadok, Nathan, Benaiah a kawhtir na. An hawng lût rawh chun

³³ an sinah, “Ka rianṭuantu tla zawzawng hi kalpi na ule, ka fapa Solomon hi ka sanatung tlûnah chuantir ule, Gihon Tinung va ah kalpi u.

³⁴ Chunah chun Zadok leh Nathan nih Israel lalchem siding hen sariak thuh na seh. Churawhchun, tâwtawrâwt tum ule, “Lalchem Solomon san sâu seh,” ti hen âu u.

³⁵ Hinah hin hawng zûl ule, ka lalnâk tophah ah to seh. Ka ruangrûl ah Israel leh Juda tla lakah lalchem ka thîm mi hâwi hen lal seh,” a ti.

³⁶ Benaiah nih, “Kan ti lai, LALPA na Pathian nih birhtir seh.

³⁷ Nang lalchem sinah LALPA a um mi hâwi hen Solomon sin khawm ah um bâk seh; nangmah liau ngâk hen amah sanah a lâirêlnâk tluang seh,” a ti.

³⁸ Churawhchun, Zadok, Nathan, Benaiah leh lalchem vêngtu tla nih Solomon chu lalchem sanatung tlûnah an chuanh le, Gihon Tinung va ah an kalpi rawh.

³⁹ Zadok nih oliv sariak dûr LALPA umnâk puanin ah mi a lâk le, Solomon chu a thuh rawh. Tâwtawrâwt an tum le, mi zawzawng nih, “Lalchem Solomon san sâu seh!” ti hen an âu.

⁴⁰ An ektê hen an kîr leiah lâwm leh âu bû hen theikhang tla an tum le, an hâu nih tual a tlirh.

⁴¹ Adonijah leh a khual tla chu puai ei anna lîm rawh chun rihâu chu an theih rawh. Joab nih tâwtawrâwt hâu a theih rawh chun, “Khuapi ah hâu tla chu zei zia mesi?” ti hen a deih na.

⁴² A hawlh dawng manh lo hen, Jonathan, Abiathar fapa chu a hawng tleng rawh. Adonijah nih, “Hawng lût nik, nang chu mi ṭha na si le, thâwng ṭha na hawng put ba a!” a ti.

⁴³ Jonathan nih a sâng le, “A pawi thlo, ka put lo, lalchem David nih Solomon chu lalchem ah a siam.

⁴⁴ Zadok, Nathan, Benaiah leh lalchem vêngtu tla nih an kalpi le, lalchem sanatung tlûnah an chuanh le,

⁴⁵ Zadok leh Nathan nih Gihon Tinung va ah lalchem siding hen sariak an thuh rawh. Churawhchun, khuapi leiah an kîr le, lâwm ruangah âu hen zapi tla nih an hâu an suah mi asi. Chu hâu na theih mi asi.

⁴⁶ Solomon chu tuah lalchem asi ving rawh.

⁴⁷ Chu lâwng khawm asi lo, lal rianṭuantu tla zawzawng nih lalchem David rangah zahnâk langh hen, ‘LALPA na Pathian nih Solomon chu nangmah ngâk hen a min thangtir dauh sele, na lâirêl liau ngâk hen a lâirêlnâk chu tluangtir dauh seh,’ an ti. Churawhchun, David chu a kûn le, a ihkhun tlûnah thla a cham,

⁴⁸ ‘LALPA Israel Pathian chu kan sawr lai, ka thlâk tla lakah pakhat chu tusûn ni ah lalchem ah a siam le, chu chu muh tâ ding hen ka nungnâk a zuah ruangah,’ ” a ti.

⁴⁹ Churawhchun, Adonijah khual tla chu an lâu le, an ektê hen an thawk le, an kalnâk ding lei chiauah an kal hep.

⁵⁰ Adonijah nih Solomon chu thungâi a ṭih le, LALPA umnâk Puanin ah a va kal le, mâichâm ki a va tleih.

⁵¹ Adonijah nih a nan ṭih le, mâichâm ki a tleih le, “A masa chem hen lalchem Solomon nih hawng ka thah lo ding hen thutiamnâk nei sele ka duh,” ti hen Solomon an va simh.

⁵² Solomon nih a sâng le, “Zahkâi tak hen a um asi chun a lû ah mi a samzâi khawm tawngh asi lai loh; sikhawmsele, zumh a kâilo lam chun a thi ding asi,” a ti.

⁵³ Lalchem Solomon nih Adonijah a kawhtir na le, mâichâm ah mi chu an kalpi. Adonijah chu lalchem mâika ah a va kal le, a kûn le, lalchem nih a sinah, “In leiah na lâwi kho lai rawh,” a ti.