1 KORIN 3 - Bawm Common Language Bible Version

Pathian To-aw Tla Chu

¹ Chun, unau le tla, thlarau mi tla sinah sim hâwi hen nan sinah thu ka sim kho lo, taksa mi tla sinah sim hâwi khan ka sim kha, Krist ah fasêm tla sinah sim hâwi cho hen.

² Buh silo hen nûk hen ka nan châwm na kha, buh nan ei kho lo ruangah khan: tu khawm ah nan ei kho lo nget rih asi,

³ taksa mi nan si kumza rih ruangah. Nan lakah nahsuahnâk leh êlnâk a um tâwn ruangah hin taksa mi si hen minung hâwi hen nan um asi lo mazei?

⁴ Mi pakhat nih, ‘Pawl murui kasi, midang nih, “Kei lam chu Apolo murui kasi” nan ti sung zawng chu minung nan silo mazei?

⁵ Apolo chu zei me asi? Pawl khawm chu zei me asi? Rianṭuantu nanmah tla a nan lungtir natu cho an si, chu khawm chu Lalpa nih a pêk na vevê mi hâwi vima asi.

⁶ Kei nih ka phun le, Apolo nih tî hen a châwm, sikhawmsele, Pathian nih a ṭhangtir asi.

⁷ Chun, a ṭhangtirtu Pathian cho lo chu a phuntu chu zeikhawm asi lo, tî hen châwmtu khawm chu zeikhawm asi bâk lo.

⁸ Chun, a phuntu leh tî hen châwmtu chu pumkhat an si, sikhawmsele anmah rianṭuan hamh zia hâwi vima hen lâwmman an tawng vevê lai.

⁹ Kannih lam chu Pathian rianṭuantu kan si; nannih Pathian lo munma chu nan si. Pathian in sak chu nan si ber.

¹⁰ Pathian nih zângfahnâk hawng ka pêk mi mang hen in sak thiam mi rian ka ṭuan le, lungphûm ka phûm, midang nih a tlûnah in an sak. Sikhawmsele, mikip a tlûnah an sak zia ding mi lakah a thiamthih chiau na seh.

¹¹ Lungphûm chia lo chu lungphûm dang âukhawm nih an phûm kho lai loh, chu lungphûm chu Jisu Krist chu asi.

¹² Chun, lungphûm tlûnah chun âuzawng nih ngûn hen mawh, tangka hen mawh, lung sung hen mawh, thing hen mawh, belh hen mawh, fapawn hen mawh in sak sele, mikip rianṭuan chu a lang rawh lai.

¹³ Krist a hawng langh Ni ah chun a langtir awt ruangah; chu Ni ah chun mei ngelchel nih mikip rianṭuan chu zei hâwi me asi a nik lai rawh.

¹⁴ Âu rianṭuan zawng a tlûnah a sak mi chu a um kumza chun, chu nih chun lâwmman a tawng lai.

¹⁵ Âu rianṭuan zawng a kâng chun, chu nih chun a dawk lai: amah lam chu ruangsuah hen a um lai, sikhawmsele mei ah a lan mi hâwi hen.

¹⁶ Pathian in nan si ti leh Pathian Thlarau nanmah lakah a um kumza ti nan theih lo mazei?

¹⁷ Âuzawng nih Pathian in chu a râwk chun chu minung chu Pathian nih a râwk lai Pathian in chu a thenhlimh ruangah; chu in chu nanmah nan si.

¹⁸ Âukhawm mah a â tir lah seh. Nan lakah âuzawng hi laikulh ah hin fing hen â ruat chun a fing khonâk ding hen mi â ah a chang seh.

¹⁹ Hi laikulh finghnâk hi Pathian ngaih hen âtnâk asi, “Pathian nih mi fing tla chu an fing perpetnâk lakah a awhtir na tâwn,” ti hen Pathian lasui thu nih a sim hâwi khan.

²⁰ Chun, Pathian lasui thu dang nih, “Lalpa nih chun mi fing tla dawnruatnâk tla chu a thawt asi ti a theih,” ti hen, a sim.

²¹ Churuangah, âukhawm nih minung tla putso lah seh. Zeizawng hi nan tâ asi ver asi.

²² Pawl mawh, Apolo mawh, Kipha mawh, laikulh mawh, nungnâk mawh, thihnâk mawh, thil um chia mawh, thil hawng um ding mi mawh, a ektê hen nan tâ ver asi; nannih khawm Krist tâ nan si;

²³ Krist khawm chu Pathian tâ asi.