1 KORIN 13 - Bawm Common Language Bible Version

Dâwtnâk

¹ Minung hawlh leh vânmifial hawlh hen thu sim khawmsele dâwtnâk ka nei ṭung lo chun dâr ri hâu salam mawh, chêngchêng ri hâu salam mawh ka hawng si lai.

² Chun, thusim khonâk nei hen, thu thup zawzawng leh theih khonâk zawzawng theih ver khawmsele, tlâng ṭhinh khawp rê hen lungnâk nei khawmsele dâwtnâk ka nei ṭung lo chun zeikhawm kasi lai loh.

³ Chun, mipâm tla châwmnâk ding ah ka neih zawzawng pêk ver khawmsele, ka taksa khawm kâng ding hen pêk khawmsele dâwtnâk ka nei ṭung lo chun a ṭhavak lai loh.

⁴ Dâwtnâk nih â dawnh kho, vêl a nei tâwn; dâwtnâk nih a nahsuah lo;

⁵ dâwtnâk chu â sawr lo, â zûm lo, dawh lo hen a châng lo, mah rang cho a ruat lo, a thinthawk duh lo,

⁶ sual leikâng a dawn lo, replonâk ah â lâwm lo, thutak lam chu a lawmhpi tâwn.

⁷ Zeizawng a tuar rarâm le, zeizawng a lung le, zeizawng a lungum le, zeizawng ah tlawlhnâk a nei lo.

⁸ Dâwtnâk hi zeitik khawm ah a reh lai loh; sikhawmsele, thusimnâk tla hi a bâng teh lai; hawlh theih lo tla hi um khawmsele a bâng teh lai; theihnâk hi um khawmsele a bâng teh lai.

⁹ A kim lo hen kan theih le, a kim lo hen thu kan sim tâwn asi.

¹⁰ A rangtlingnâk a hawng tlung tikah chun a kim lo mi hi bângtir asi lai rawh.

¹¹ Ka ngâksia liauah ngâksia hawlh hen ka hawlh le, ngâksia theih hen ka theih le, ngâksia ruatdân hen ka ruat tâwn. Tuah ka upat nûnah hin ngâksia ti dân chu ka thlah rawh.

¹² Tu lam chun thlalang ah ka muh rianruan asi, chu tikah lam chun mâitawnh hen asi lai rawh; tuah lam chun a kim lo hen ka theih, chu tikah lam chun Pathian nih a hawng ka theih kim hâwi hen ka theih kim lai rawh.

¹³ Chun, hi pathum, lungnâk, lungumnâk leh dâwtnâk tla hi a um kumza lai; chun hi bang tla lakah hin a rokual chem mi chu dâwtnâk hi asi.