1 JOHAN 5 - Bawm Common Language Bible Version

¹ Âuzawng “Jisu chu Mesia asi” ti lungtu chu Pathian fa asi, âuzawng a pa zângfahtu nih chun a fa khawm a zângfah asi.

² Hi hi Pathian fa tla kan zângfah ti kan theihnâk chu asi, Pathian kan zângfah le, a thupêk tla kan zâwt mi lak hin.

³ Pathian kan zângfahnâk chu hi hi asi, a thupêk tla kan zûl mi hi. A thupêk tla chu kan rangah a har lo.

⁴ Pathian fa vial nih chun laikulh a neh kho vima le, hi laikulh kan nehnâk chu kan lungnâk hen asi.

⁵ “Jisu chu Pathian Fapa asi” titu cho lo nih chun âunih me laikulh a neh kho?

Jisu Krist Theihpitu

⁶ Jisu Krist chu â baptisnâk tî leh a thihnâk thisen hen a hawng kal asi, tî cho hen a hawng mi silo le, tî leh thisen hen asi dauh. Thlarau chu thutak asi ruangah chun, Thlarau nih chun thudik asi ti a theihtir asi.

⁷ Theihpitu chu pathum an um,

⁸ Thlarau, tî leh thisen chu, chu pathum tla chu thu anna rual asi.

⁹ Minung nih theihpitu an pêk mi ngâk chun Pathian nih theihpitu a pêk mi chu a ṭha dauh ti kan lung asi. Pathian nih theihpitu hawng kan pêk mi chu a Fapa thâwngthâng hi asi.

¹⁰ Âuzawng Pathian Fapa lungtu nih chun a thinlung ah theihpitu a nei asi, Pathian lunglotu lam nih chun amah chu âwkrâwl ah â siam le, Pathian nih a Fapa thâwngthâng a theihtir mi chu a lung lo ruangah.

¹¹ Theihtirnâk chu hi hi asi, Pathian nih zungzâl nungnâk hawng kan pêk le, chu nungnâk chu a Fapa ah kan nei asi.

¹² Âuzawng Fapa neitu nih chun chu nungnâk chu a nei, Pathian neilotu nih chun chu nungnâk chu a nei lo.

Zungzâl Nungnâk

¹³ Zungzâl nungnâk nan nei ti nan theih khonâk ding hen, nannih Pathian Fapa min lungtu tla sinah hi bang thu hi ka rîn asi.

¹⁴ Hi hi Pathian lakah kan râlṭhatnâk chu asi, zeizawng amah duhzia hâwi hen kan deih chun anih nih a hawng kan ngâi piak lai ti kan theih.

¹⁵ Zeizawng kan deih mi chu a hawng kan ngâi piak ti kan theih chun, a sinah kan thil deih chu kan tawng rawh ti kan theih asi.

¹⁶ Âuzawng a unaupa nih thihnâk khawp rê hen a tling lo mi sual ti hen muh sele, nungnâk pêk awttu Pathian chu a deih lai le, a deihnâk chu a siang piak lai. Sikhawmsele, thihnâk khawp rê sual a um le, chu hâwi mi rang chun deih piak ding ka ti mi si lo.

¹⁷ Diklonâk zawzawng hi sual asi. Sikhawnsele, thihnâk khawp rê a tling lo mi sual khawm a um.

¹⁸ Âuzawng Pathian fa nih chun thilsual a ti lo ti kan theih, Pathian Fapa nih chun a vêng kumza le, Misual nih a râwk kho lo asi.

¹⁹ Chun Pathian lakah mi kan si ti leh, laikulh pumpi hi Misual thu thu hen a um ti kan theih.

²⁰ Chun, Pathian Fapa chu a hawng kal le, Pathian dik tak chu theih khonâk hawng kan pêk ti kan theih. A Fapa Jisu Krist hen tlâinâk kan nei mi lakah Pathian dik tak hen tlâinâk kan nei asi. Hi hi Pathian dik tak leh zungzâl nungnâk chu asi.

²¹ Ka fa le tla, pathian diklo tla lakah a dang hen a thlei u.