1 JOHAN 4 - Bawm Common Language Bible Version

¹ Duhtak tla, Thlarau nei ding ti thusimtu zawzawng chu lung ver lah u, thlarau chu Pathian lakah mi asi leh silo nik u. Khuavâng telê tam tak mun kip ah an suak rawh ruangah.

² Hi lakah hin Pathian Thlarau chu nan theih lai: âuzawng Jisu Krist chu taksa ah a hawng a chang asi titu chu Pathian lakah mi Thlarau neitu asi.

³ Sikhawmsele, âuzawng Jisu taksa ah a hawng a chang ti êltu chu Pathian lakah mi Thlarau neitu asi lo, chu chu Krist mêlma thlarau a hawng kal ding nan theih mi asi, tu khawm ah laikulh ah a um chia rawh asi.

⁴ Sikhawmsele, fa le tla, Pathian sinah mi nan si le, khuavâng telê chu nan neh rawh, laikulh lakah mi thlarau neitu ngâk hen nanmah lakah a um mi Thlarau chu a chak dauh ruangah.

⁵ Annih chu laikulh ah mi an si ruangah, laikulh mi hâwi hen an hawlh le, laikulh ah mi tla thu an ngâi tâwn asi.

⁶ Kannih lam chu Pathian lakah mi kan si. Âuzawng Pathian theihtu zawng nih kan thu an ngâi tâwn. Pathian lakah mi lo nih chun kan thu an ngâilo, chubang lakah chun Thlarau dik leh thlarau diklo chu kan theih asi.

Pathian Chu Zângfahnâk Asi

⁷ Duhtak tla, zângfahnâk hi Pathian thawk hen suak asi ruangah kanna zângfah tawnh ding asi. Âuzawng zângfahnâk neitu chu Pathian fa asi, Pathian khawm a theih.

⁸ Zângfahnâk neilotu nih chun Pathian a theih lo, Pathian chu zângfahnâk asi.

⁹ Hi hi Pathian nih zângfahnâk kan rangah a langhtir mi chu asi, a Fapa neihlem laikulh ah a hawng fial mi zârah nungnâk kan nei khonâk ding hen.

¹⁰ Zângfahnâk ka ti mi hi, kanmah nih Pathian kan zângfah ka ti mi silo le, amah nih hawng kan zângfah le, kan sual tla ngaihdamnâk ding hen a Fapa a hawng fial ka ti dauh asi.

¹¹ Duhtak le tla, chu hâwi tluk hen Pathian nih hawng kan zângfah asi chun, kannih khawm kanna zângfah tawnh ding asi.

¹² Âukhawm nih Pathian an muh dahlo; kanna zângfah tawnh chun, Pathian kanmah lakah a um lai le, a zângfahnâk khawm kanmah lakah a rangtling lai.

¹³ Amah chu kanmah lakah a um kumza mi leh kannih amah lakah kan um kumza ti, hi lak hin kan theih, a Thlarau hawng kan pêk mi lak hin.

¹⁴ Chun, Pa nih a Fapa chu laikulh ruangsuahtu ding hen a hawng fial asi ti kan muh le, midang tla khawm kan theihtir na asi.

¹⁵ Âuzawng, “Jisu chu Pathian Fapa asi” titu chu amah lakah Pathian a um kumza le, anih khawm chu Pathian lakah a um kumza asi.

¹⁶ Pathian nih kanmah lakah zângfahnâk a nei ti kan theih le, kan lung asi. Pathian chu zângfahnâk asi, zângfahnâk ah a um kumza mi chu Pathian lakah a um kumza asi. Pathian khawm amah lakah a um kumza asi.

¹⁷ Zângfahnâk thiltum chu kan lakah siam rangtling hen a um rawh: lâirêl ding mi Ni lak khawm ah râlṭha tak hen kan um khonâk chu hi laikulh ah hin Jisu Krist nunchan hâwi put hen kan um ruangah asi.

¹⁸ Zângfahnâk lakah chun ṭihnâk a um lo, zângfahnâk rangtling nih ṭihnâk a nar tâwn, ṭihnâk lak chun rêpnâk a um ruangah, a ṭihtu chu zângfahnâk ah a rangtling lo asi.

¹⁹ Pathian nih a hawng kan zângfah masa ruangah kan zângfah asi.

²⁰ Mi nih, “Pathian ka zângfah” ti hen, a unau hua sele, amah chu mi âwkrâwl asi, a unau a muh ko mi men a zângfah lo chun Pathian a muh dahlo mi chu zeitin a zângfah kho lai?

²¹ Hi hi Krist nih thu hawng kan pêk mi chu asi “Mi nih Pathian a zângfah chun a unau khawm a zângfah ding asi,” ti hi.