1 JOHAN 3 - Bawm Common Language Bible Version

¹ Ngâinik u, Pa nih hawng kan dâwt zia chu a fâk a! A dâwtnâk fâk tak ruangah Pathian fa ah kawh hen kan um hi, chu hâwi chu kan si, hi ruangah laikulh nih hawng kan theih lo asi, amah chu an theih lo ruangah.

² Duhtak tla, tuhin Pathian fa tla kan si le, zei hâwi hen kan um awt ti lam chu a lang lo rih, amah a hawng a langh tikah amah hâwi hen kan um awt ti lam chu kan theih, amah chu a umdân hâwitê hen kan muh awt.

³ Âuzawng Jisu Krist ah lungnâk nei mi vial nih amah â thenhlimh hâwi hen a thenhlimhtir tâwn.

⁴ Âuzawng thilsual titu vial nih dân a buar tâwn, sual chu dân buarnâk asi.

⁵ Amah chu sual tla veih ding hen a hawng lang rawh ti nan theih, amah lakah chun sual zeikhawm a um lo.

⁶ Âuzawng amah lakah umtu nih chun thilsual a ti lo, âuzawng thilsual titu nih chun amah chu a muh lo le, theih khawm a theih lo.

⁷ Fa le tla, âu perpet hen khawm um lah u, Jisu Krist â rep hâwi hen thil dik titu chu â rep asi.

⁸ Thilsual titu chu Diabol lak mi asi, Diabol chu a tîr thawk hen thilsual titu asi. Pathian Fapa a hawng kalnâk san tak chu Diabol thilti veih ding hen asi.

⁹ Âuzawng Pathian fa nih chun, Pathian nunchan amah lakah a um kumza ruangah thilsual a ti tâwn lo, Pathian a Pa asi ruangah thilsual a ti kho lo.

¹⁰ Hi lak hin Pathian fa tla leh Diabol fa tla chu â theih asi. Âuzawng thil dik ti lotu mawh, a unau zângfah lotu chu Pathian fa asi lo.

A Zângfah Tawnhnâk

¹¹ Hi hi a tîr thawk hen thuchah nan theih mi kha asi: Kanna zângfah tawnh ding asi, ti hi.

¹² Kain misual lakah mi mah unau thahtu hâwi khan kan um ding asi lo le, zeiruang me Kain nih anih chu a thah? Amah thilti a diklo le, a unau Abel thilti chu a dik ruangah.

¹³ Unau le tla, laikulh nih a nan hua na chun chê ti lah u.

¹⁴ Kan unau tla kan zângfah ruangah thihnâk ah mi kan suak le, nungnâk ah kan lût rawh ti kan theih. Âuzawng chu hâwi ti lotu chu thihnâk ah a um kumza asi.

¹⁵ Âuzawng a unau huatu chu mi thahtu asi, mi thahtu âukhawm zungzâl nungnâk ting an um lo ti nan theih.

¹⁶ Hi lak hin zângfahnâk chu zei me asi ti kan theih, Krist nih kan rangah a nungnâk hawng kan pêk mi lak hin, kannih khawm nih unau tla rangah kan nungnâk kan pêk bâk ding asi.

¹⁷ Âuzawng laikulh sum leh pâi nei hen, a unau samphâng hen muh sele, anih chu ṭangpi lah sele, Pathian zângfahnâk chu amah lakah zeitin a um lai?

¹⁸ Fa le tla, thu cho hen a zângfah lah ule, kâ cho hen khawm a zângfah lah u, thilti leh thungâi tak hen si dauh seh.

Pathian Mâika Ah Râlṭhatnâk

¹⁹ Hi lakah hin thutak ah um kan si ti kanna theih asi. Kan thinlung khawm nih Pathian lakah mi kan si ti a theih lai,

²⁰ kan thinlung nih mawh hawng kan phurhtir khawm ah, Pathian chu kan thinlung ngâk hen rokual dauh leh zeizawng theihkhotu asi.

²¹ Duhtak le tla, kan thinlung nih mawh hawng kan phurhtir lo chun Pathian lakah kan râlṭha asi.

²² Chun, a thupêk tla kan zûl le, a mitmuh ah thil lawmhkâi kan ti tâwn ruangah, kan ngiar mi zawng kan tawng tâwn.

²³ Chun, a thupêk chu hi hi asi, Jisu Krist nih thu hawng kan pêk hâwitê hen, Jisu Krist min lung hen a zângfah tawnh ding asi.

²⁴ Pathian thupêk zûltu chu Pathian lakah a um kumza le, Pathian khawm amah lakah a um. Chun hi lak hin amah chu kanmah lakah a um kumza ti kan theih, Thlarau hawng kan pêk mi lak hin kan theih asi.