1 JOHAN 2 - Bawm Common Language Bible Version

Krist Hawng Kan ṭangpitu

¹ Ka fa le, thilsual nan ti lonâk ding hen hi bang thu hi nan sinah ka hawng rîn asi. Chun, âuzawng nih thilsual a ti chun, Pa sinah simpitu Jisu Krist mirep chu kan nei asi,

² anih chu kan sual tla thutluangvâwrnâk asi, kanmah tla sual cho silo hen, laikulh zawzawng sual thutluangvâwrnâk khawm asi.

³ Chun, a thupêk tla kan zâwt chun, chu lakah chun amah kan theih ti kanna theih asi.

⁴ A thupêk tla zâwt ṭung lo hen, “Amah ka theih” titu chu mi âwkrâwl asi, thutak khawm amah lakah a um lo.

⁵ Âuzawng a thu zâwttu chu amah lakah chun Pathian zângfahnâk a rangtling tatak rawh asi.

⁶ Pathian sinah kan um asi ti theihnâk chu hi hi asi, Pathian lakah ka um titu chu Jisu hâwitê hen a um ding asi.

Thupêk Thar

⁷ Duhtak le tla, thupêk thar lam chu nan sinah ka hawng rîn lo le, thupêk li, a tîr thawk hen nan nei mi kha ka hawng rîn dauh asi. Thupêk li chu nan theih rawh mi thu kha asi.

⁸ Sikhawmsele thupêk thar rîn hâwi khawm kasi, chu chu Jisu Krist lakah leh nanmah lakah a lang asi, chêu tatak chu tuah a hawng chêu rawh ruangah mûi chu a vei liau chir asi.

⁹ Mah unau hua ṭung hen, “Chêu ah ka um” titu chu tu khawm ah mûi ah a um ko asi.

¹⁰ Mah unau zângfahtu chu chêu ah a um kumza le, amah lakah tlûknâk rerêng a um lo.

¹¹ Mah unau huatu lam chu mûi ah a um le, mûi ah a kal asi, mûi nih a mit a châwtir rawh ruangah a kalnâk ding a theih lo asi.

¹² Fa le tla, Krist min hen nan sual tla ngaihdam asi rawh ruangah nan sinah ka hawng rîn asi.

¹³ Pa le tla, amah chu a tîr thawk hen a um kumza ti nan theih ruangah nan sinah ka hawng rîn asi. Rualnâu tla, Misual chu nan neh rawh ruangah nan sinah ka hawng rîn asi.

¹⁴ Fa tla, Pa chu nan theih ruangah nan sinah ka rîn asi. Pa tla, amah chu a tîr thawk hen a um kumza ti nan theih ruangah nan sinah ka hawng rîn asi. Tlangvâl tla, nan chak le, Pathian thu nanmah lakah a um kumza le, Misual chu nan neh rawh ruangah nan sinah ka hawng rîn asi.

¹⁵ Laikulh hi zângfah lah ule, laikulh ah thil um tla khawm hi zângfah lah u. Âuzawng nih laikulh hi a zângfah chun, Pa a zângfahnâk amah lakah a um lo.

¹⁶ Laikulh ah thil a um mi zawzawng, taksa duhnâk tla, mit duhnâk tla, dam kar rokualnâk tla hi Pa thawk hen suak asi lo, laikulh thawk hen suak asi dauh.

¹⁷ Laikulh hi a duhnâk tla hen a tlâu liau chir asi. Pathian duhzia titu lam chu zungzâl hen a um kumza lai.

Krist Mêlma

¹⁸ Ka fa le tla, tik dawnghnâk chu a nâi rawh, Krist Mêlma a hawng kal lai ti nan theih rawh hâwi khan, tu khawm ah Krist Mêlma tam tak an hawng suak rawh, churuangah chun tik madung chem asi rawh ti kan theih.

¹⁹ Annih chu kan lakah mi murui an si lo ruangah hawng kan kaltâk le, kanmah mi tak si na sele kan sinah an um vima ding asi, sikhawmsele, an ektê hen kanmah mi tak an si lo ti a lang fiang khonâk ding hen hawng kan suaktâk rawh asi.

²⁰ Sikhawmsele, nannih lam chu Krist nih Thlarau Thenhlimh an tawih na ruangah, nan ektê hen thudik nan theih asi.

²¹ Thutak chu nan theih lo mi asi lo ruangah ka rîn asi, nan theih ruangah leh thutak lakah âwkrâwl zeikhawm a suak dahlo ti nan theih ruangah ka rîn dauh asi.

²² Jisu chu Mesia asi ti lunglotu nûnlêm chun mi âwkrâwl âu me um? Krist Mêlma chu Pa leh Fapa lung lotu hi asi.

²³ Âuzawng Fapa lung lotu nih chun Pa khawm a lung lo, Fapa lungtu lam nih chun Pa khawm a lung asi.

²⁴ Thuchah a tîr thawk hen nan theih rawh mi kha nan thinlung ah kil thlir u. Chu hâwi hen nan thinlung ah nan kil thlir chun Pa leh Fapa hen nanna tlâi kumza lai.

²⁵ Amah Jisu Krist nih pêk ding hen hawng kan tiamh mi chu zungzâl nungnâk asi.

²⁶ Nanmah tla an bum awt natu thâwngthâng chu nan sinah ka rîn asi.

²⁷ Nannih lam chu Jisu Krist nih a Thlarau an pêk na le, chu Thlarau nan sinah a um kar zawng chu âu sîntir khawm nan herh lo. Thlarau nih chun zeizawng an sîntir na ruangah leh a sim mi vial chu thudik asi ruangah âwkrâwl asi lo. Thlarau sîntirnâk chu zûl ule, Krist lakah um u.

²⁸ Fa le tla, amah ah um kumza u, amah a hawng a langh tikah ningzak lo hen râlṭha tak hen kan um kho lai.

²⁹ Amah chu mirep asi ti nan theih chun, mi âuzawng repnâk titu chu Pathian fa asi ti nan theih lai.