1 JOHAN 1 - Bawm Common Language Bible Version

Nungnâk Thu

¹ Nungnâk Thu, a tîr thawk hen a um mi kha, kan nâ hen kan theih le, kan mit hen kan muh kha, kan zauh le, kan kut hen kan tawngh kha.

² Chu nungnâk chu muhkho hen a hawng um le, kan muh rawh; kan theihtir na le, chu zungzâl nungnâk, Pa sinah mi kan sinah theihtir hen a um mi chu kan simh na asi hi.

³ Churuangah kan muh hen kan theih mi chu kan simh na bâk asi, nannih khawm nih Pa leh Fapa Jisu Krist kawmhnâk ah kanna khat khonâk ding hen.

⁴ Chun, kanna lâwmnâk a rangtling khonâk ding hen hi bang thu hi kan rîn asi.

Pathian Chu Chêu Asi

⁵ Chun, thuchah a Fapa sin thawk hen kan theih le, nan sinah kan simh na mi chu hi hi asi: Pathian chu chêu asi, amah lakah chun mûi rerêng a um lo.

⁶ Mûi lakah um ko hen “Amah hen kanna kawmh” kan ti chun âwkrâwl kan sim asi, thutak khawm chu kan zâwt lo,

⁷ chun, amah chu chêu ah a um hâwi hen, kannih khawm chêu ah um kan si chun, kanna kawmh dut le, a Fapa Jisu thisen nih kan sual zawzawng a thiangtir asi.

⁸ “Sual kan nei lo” kan ti chun mah le mah kanna perpet le, thutak chu kanmah lakah a um lo asi.

⁹ Kan sual tla Pathian sinah thutluang kan vâwr chun, kan sual tla ngaihdam ding leh kanna replonâk zawzawng leh kan sual tla thiangtir ding hen, â rep hen zumh a kâi asi.

¹⁰ “Thilsual kan ti lo” kan ti chun, Pathian chu âwkrâwl ah kan siam le, a thu khawm kanmah lakah a um lo asi.