၂ တိ 1 - ခေတ်သစ်​မြန်မာ သမ္မာကျမ်း

ရှင်ပေါလု​၏ နှုတ်ခွန်းဆက်​စကား

¹ ဘုရားသခင်​၏ အလိုတော်​အတိုင်း ယေရှု​ခရစ်တော်​၏ တမန်တော်​အဖြစ် ရွေးချယ်တော်မူခြင်း​ခံရသူ၊ ယေရှု​ခရစ်တော်​ကို ယုံကြည်​လျှင် ရရှိမည်​ဟု ဘုရားသခင် ကတိပေးတော်မူသည့်​ထာဝရ​အသက်​အကြောင်း​ကို ဟောပြော​ရန် စေလွှတ်ခံရသူ ကျွန်ုပ်​ပေါလု စာရေးလိုက်ပါ၏။

² ဤ​စာ​သည် ချစ်သော​သား တိမောသေ​ထံသို့ ပို့လိုက်သော​စာ​ဖြစ်၏။ ကျွန်ုပ်တို့​၏ အဖ​ဘုရားသခင်​နှင့် သခင်​ယေရှု​ခရစ်တော်​တို့​ထံမှ ကျေးဇူးတော်၊ ကရုဏာ​နှင့် ငြိမ်းချမ်းခြင်း​သည် သင့်​အပေါ် သက်ရောက်ပါစေသော။

သစ္စာရှိ​စွာ အမှုဆောင်​ရန် တိုက်တွန်းအားပေးခြင်း

³ ကျွန်ုပ်​သည် သင့်​အတွက် နေ့ရောညပါ သတိတရ ဆုတောင်းပေး၏။ ဆုတောင်းပေး​သောအခါ ကျွန်ုပ်​၏​ဘိုးဘေးတို့ ကိုးကွယ်ခဲ့သည့်​နည်းတူ လိပ်ပြာသန့်သန့်​ဖြင့် ကျွန်ုပ်​ကိုးကွယ်သော ဘုရားသခင်​ကို ကျေးဇူးတင်၏။

⁴ သင်​မျက်ရည်ကျသည်​ကို သတိရ​တိုင်း သင့်​ကို ကျွန်ုပ်​တွေ့လို​လှ၏။ သို့မှသာ ကျွန်ုပ်​ဝမ်းမြောက်နိုင်​လိမ့်မည်။

⁵ ခရစ်တော်​ကို သင်​အမှန်တကယ်​ယုံကြည်ကြောင်း ကျွန်ုပ်​သတိရ၏။ သင့်​အဖွား​လောဣ​နှင့် သင့်​မိခင်​ဥနိတ်​တို့သည် ဦးစွာ ယုံကြည်ကြပြီး ယခု သင်​၌လည်း ထို​ယုံကြည်ခြင်း​မျိုး ရှိကြောင်း ကျွန်ုပ်​စိတ်ချ​ယုံကြည်၏။

⁶ ထို့ကြောင့် သင့်​အပေါ် ကျွန်ုပ်​လက်တင်​စဉ်က ဘုရားသခင် သင့်​အား ပေးတော်မူသော ဆုကျေးဇူး​ကို ပြန်လည်​တောက်လောင်​စေရန် လှုံ့ဆော်လော့​ဟု ကျွန်ုပ်​သတိပေး၏။

⁷ အဘယ်ကြောင့်ဆိုသော် ဘုရားသခင်​သည် ကျွန်ုပ်တို့​အား သူရဲဘောကြောင်သော​စိတ်​ကို ပေးတော်မမူဘဲ တန်ခိုး​ပါသော​စိတ်၊ ချစ်တတ်သော​စိတ်၊ မိမိကိုယ်မိမိ ချုပ်တည်းနိုင်သော​စိတ်တို့​ကို ပေးတော်မူ​သောကြောင့်​ဖြစ်၏။

⁸ ထို့ကြောင့် ကျွန်ုပ်တို့​၏ သခင်ဘုရား​အကြောင်း သက်သေခံ​ရန် မရှက်နှင့်။ သခင်ဘုရား​အတွက်ကြောင့် အကျဉ်းချ​ခံနေရသော ကျွန်ုပ်​အတွက်​လည်း မရှက်နှင့်။ ဘုရားသခင်​၏ တန်ခိုးတော်​ဖြင့် သတင်းကောင်း​အတွက် ကျွန်ုပ်​နှင့်အတူ ဒုက္ခခံလော့။

⁹ ဘုရားသခင်​သည် ကျွန်ုပ်တို့​ကို ကယ်တင်တော်မူ​ပြီး သန့်ရှင်းသော​ဘဝ​၌ အသက်ရှင်​နေထိုင်​ရန် ခေါ်ယူတော်မူသည်​မှာ ကျွန်ုပ်တို့​၏ လုပ်ဆောင်မှု​ကြောင့် မဟုတ်ဘဲ ကိုယ်တော်​၏ အကြံအစည်တော်​နှင့် ကျေးဇူးတော်​ကြောင့် ဖြစ်၏။ ကိုယ်တော်​သည် ရှေးယခင်​မတိုင်မီ​ကပင် ယေရှု​ခရစ်တော်​အားဖြင့် ထို​ကျေးဇူးတော်​ကို ကျွန်ုပ်တို့​အား ပေးသနားတော်မူ၏။

¹⁰ ထို​ကျေးဇူးတော်​သည် ကျွန်ုပ်တို့​၏ ကယ်တင်ရှင် ယေရှု​ခရစ်တော်​ကြွလာတော်မူခြင်း​ဖြင့် ယခု​ထင်ရှားပြီ။ ခရစ်တော်​သည် သေခြင်း​ကို ဖျက်ဆီးပြီး မပျက်စီး​မယိုယွင်းသော​အသက်ရှင်ခြင်း​အကြောင်း​ကို သတင်းကောင်း​ဖြင့် ပေါ်လွင်​ထင်ရှားစေတော်မူ၏။

¹¹ ဤ​သတင်းကောင်း​အတွက် တရားဟောဆရာ၊ တမန်တော်​နှင့် ဆရာ​အဖြစ် ကျွန်ုပ်​ကို ခန့်ထားတော်မူပြီ။

¹² ထို​အကြောင်း​ကြောင့် ဤ​ဆင်းရဲဒုက္ခ​ကို ခံစားနေရ၏။ သို့သော်လည်း ကျွန်ုပ်​မရှက်ပါ။ အဘယ်ကြောင့်ဆိုသော် ကျွန်ုပ်​သည် မိမိ​ယုံကြည်သော​အရှင်​ကို သိ​ပြီး ကိုယ်တော်​ထံ၌ မိမိ​အပ်ထားသော​အရာ​ကိုလည်း ထို​နေ့ရက်​တိုင်အောင် ကိုယ်တော်​စောင့်ထိန်းတော်မူမည်​ဟု စိတ်ချ​သောကြောင့်​ဖြစ်၏။

¹³ ကျွန်ုပ်​ထံမှ ကြားရသည့် မှန်ကန်သော​တရားစကား​ကို စံနမူနာ​အဖြစ် ခံယူ​၍ ခရစ်တော်​ကို ဆက်လက်​ယုံကြည်​လျက် လူတို့​ကို ချစ်လော့။ ဤသို့ သင်​လုပ်ဆောင်နိုင်သည်​မှာ ယေရှု​ခရစ်တော်​နှင့် တပေါင်းတစည်းတည်း​ရှိသောကြောင့်​ဖြစ်၏။

¹⁴ သင့်​ထံ၌ အပ်ထားသော​သတင်းကောင်း​တရား​ကို ကျွန်ုပ်တို့​ထဲ၌ ကိန်းဝပ်တော်မူသည့်​သန့်ရှင်းသော​ဝိညာဉ်တော်​အားဖြင့် ကာကွယ်​စောင့်ရှောက်လော့။

¹⁵ ဖုဂေလု​နှင့် ဟေရမောဂင်​တို့​အပါအဝင် အာရှပြည်​၌ နေထိုင်သော​လူအပေါင်း​သည် ကျွန်ုပ်​ကို စွန့်ခွာသွားကြောင်း သင်​သိ၏။

¹⁶ ဩနေသိဖော်​၏​မိသားစု​အပေါ် သခင်ဘုရား​၏ ကရုဏာတော်​သက်ရောက်ပါစေသော။ အဘယ်ကြောင့်ဆိုသော် သူ​သည် ကျွန်ုပ်​အကျဉ်းချ​ခံရသည်​ကိုပင် မရှက်မကြောက်​ဘဲ အမြဲ အားပေးနှစ်သိမ့်​သောကြောင့် ဖြစ်၏။

¹⁷ သူ​သည် ရောမမြို့​သို့ ရောက်နေ​စဉ် ကျွန်ုပ်​ကို မတွေ့မချင်း အလွန်​ကြိုးစား​ရှာ​၍ တွေ့ဆုံခဲ့၏။

¹⁸ ဧဖက်မြို့​၌ ကျွန်ုပ်​ရှိစဉ် သူ​သည် မည်မျှ​အကူအညီ​ပေးခဲ့သည်​ကို သင်​ကောင်းစွာ​သိ၏။ သခင်ဘုရား ပြန်ကြွလာတော်မူမည့် ထို​နေ့​၌ သခင်ဘုရား​သည် သူ့​အား ကရုဏာတော်​ခံစားရသော​အခွင့်​ကို ပေးသနားတော်မူပါစေသော။