၂ ကော 8 - ခေတ်သစ်မြန်မာ သမ္မာကျမ်းရက်ရောစွာလှူဒါန်းရန် နှိုးဆော်ခြင်း 1 ညီအစ်ကိုမောင်နှမတို့… မာကေဒေါနိပြည်ရှိ အသင်းတော်များအား ဘုရားသခင်ပြုတော်မူသော ကျေးဇူးတော်အကြောင်းကို ကျွန်ုပ်တို့သည် သင်တို့အား သိစေလို၏။ 2 သူတို့သည် ဆင်းရဲဒုက္ခများကို အလူးအလဲ ခံခဲ့ကြရ၏။ သို့ရာတွင် သူတို့သည် အလွန်ပျော်ရွှင်ခဲ့ကြသဖြင့် အလွန်ဆင်းရဲသော်လည်း ရက်ရောစွာ လှူဒါန်းကြ၏။ 3 သူတို့သည် တတ်နိုင်သမျှအတိုင်း ပေးကမ်းသည်သာမက မိမိတို့ဆန္ဒအလျောက် ထိုထက်ပင် ပို၍ ပေးကမ်းကြကြောင်း ကျွန်ုပ်သက်သေခံ၏။ 4 သူတို့သည် ဂျေရုဆလင်မြို့ရှိ ယုံကြည်သူတို့အား ပေးကမ်းသည့်အမှုတွင် ပါဝင်ခွင့်ရရန် ကျွန်ုပ်တို့အား အနူးအညွတ်မေတ္တာရပ်ခံကြ၏။ 5 ထိုသို့ သူတို့သည် ကျွန်ုပ်တို့ မျှော်လင့်သည်ထက် ပိုပြုကြ၏။ သူတို့သည် ဦးစွာ ဘုရားသခင်ထံ မိမိကိုယ်ကိုယ် ဆက်ကပ်လှူဒါန်းပြီးနောက် ဘုရားသခင်၏ အလိုတော်အားဖြင့် ကျွန်ုပ်တို့ထံ၌လည်း ဆက်ကပ်လှူဒါန်းကြ၏။ 6 ထို့ကြောင့် တိတုသည် သင်တို့အထဲ၌ ဤလှူဒါန်းခြင်းကို စတင်ဆောင်ရွက်ခဲ့သည့်အားလျော်စွာ ပြီးမြောက်အောင် ဆောင်ရွက်နိုင်ရန် သူ့အား ကျွန်ုပ်တို့တိုက်တွန်းခဲ့၏။ 7 သင်တို့သည် ယုံကြည်ခြင်း၊ ဟောပြောခြင်း၊ အသိပညာရှိခြင်း၊ စိတ်အားထက်သန်မှုအပြည့်ရှိခြင်း နှင့် သင်တို့အထဲ၌ ကျွန်ုပ်တို့လှုံ့ဆော်ပေးခဲ့သော ချစ်ခြင်း စသည့် အချက်တို့၌ ကြွယ်ဝကြသကဲ့သို့ ဤလှူဒါန်းခြင်း၌လည်း ကြွယ်ဝကြပါစေ။ 8 ဤသည်မှာ ကျွန်ုပ်သည် သင်တို့ကို အမိန့်ပေးနေခြင်းမဟုတ်။ သို့သော် သင်တို့၏ ချစ်ခြင်းမေတ္တာစစ်မှန်မှုကို အခြားသူတို့၏ စိတ်အားထက်သန်မှုနှင့် နှိုင်းယှဉ်၍ စစ်ဆေးခြင်းသာဖြစ်၏။ 9 ကျွန်ုပ်တို့သခင်ယေရှုခရစ်တော်၏ ကျေးဇူးတော်ကို သင်တို့သိကြ၏။ ကိုယ်တော်သည် ချမ်းသာသော်လည်း သင်တို့၏ အကျိုးကိုထောက်၍ ဆင်းရဲခံတော်မူ၏။ ထိုသို့ဆင်းရဲခံတော်မူခြင်းမှာ သင်တို့ ချမ်းသာလာစေရန် ဖြစ်၏။ 10 ဤအမှုနှင့်ပတ်သက်၍ သင်တို့အတွက် ကျွန်ုပ် အကောင်းဆုံး အကြံပေးမည်။ လွန်ခဲ့သောနှစ်က သင်တို့သည် ဤအမှုကို အစပြုခဲ့သည်သာမက ပြုလုပ်ရန်လည်း ဆန္ဒရှိခဲ့ကြ၏။ 11 သို့ဖြစ်၍ သင်တို့အစပြုခဲ့သည့်အရာကို ပြီးမြောက်အောင် ဆောင်ရွက်ကြလော့။ ဆောင်ရွက်ရန် ဆန္ဒပြင်းပြခဲ့ကြသကဲ့သို့ ဆောင်ရွက်ရာတွင်လည်း စေတနာစိတ်ရှိကြလော့။ သင်တို့တတ်နိုင်သမျှကို လှူဒါန်းကြလော့။ 12 သင်တို့လှူဒါန်းရန် စေတနာစိတ်ရှိလျှင် ဘုရားသခင်သည် သင်တို့၌ မရှိသောအရာကို မထောက်ဘဲ ရှိသောအရာကို ထောက်၍ သင်တို့၏ လှူဒါန်းခြင်းကို လက်ခံတော်မူလိမ့်မည်။ 13 သင်တို့၏ လှူဒါန်းခြင်းသည် အခြားသူတို့အတွက် သက်သာစေ၍ သင်တို့အတွက်မှာမူ ခက်ခဲစေရန် ကျွန်ုပ်မဆိုလိုပါ။ တန်းတူညီမျှဖြစ်စေရန်သာ ဆိုလို၏။ 14 လက်ရှိအချိန်တွင် သင်တို့၏ ကြွယ်ဝမှုသည် သူတို့၏ လိုအပ်မှုကို ဖြည့်ဆည်းပေးမည်ဖြစ်သကဲ့သို့ နောင်တစ်ချိန်တွင် သူတို့၏ ကြွယ်ဝမှုသည် သင်တို့၏ လိုအပ်မှုကို ဖြည့်ဆည်းပေးနိုင်မည်ဖြစ်၏။ ဤနည်းဖြင့် တန်းတူညီမျှဖြစ်စေလိမ့်မည်။ 15 ကျမ်းစာ၌ “များများရသောသူ မပို၊ နည်းနည်းရသောသူ မလို” ဟု ရေးသားထားသည့်အတိုင်း ဖြစ်၏။ တိတုနှင့် သူ၏ အပေါင်းအဖော်များ 16 သင်တို့အား ကူညီရန် ကျွန်ုပ်၌စိတ်အားထက်သန်မှုရှိသကဲ့သို့ တိတု၌လည်း ရှိစေတော်မူသော ဘုရားသခင်ကို ကျေးဇူးတင်ပါ၏။ 17 သူသည် ကျွန်ုပ်တို့ တိုက်တွန်းသည်ကို လက်ခံသည်သာမက သူကိုယ်တိုင်က အလွန်စိတ်အားထက်သန်လျက် မိမိဆန္ဒအလျောက် သင်တို့ထံသို့ လာ၏။ 18 တိတုနှင့်အတူ အခြားညီအစ်ကိုတစ်ဦးကိုလည်း ကျွန်ုပ်တို့စေလွှတ်လိုက်ပါ၏။ ထိုညီအစ်ကိုသည် သတင်းကောင်းကို ဟောပြောရာတွင် အသင်းတော်တို့၌ ချီးမွမ်းခံရသောသူဖြစ်၏။ 19 ထို့ပြင် ကျွန်ုပ်တို့ကောက်ခံဆောင်ရွက်နေသော အလှူငွေကို သယ်ယူပို့ဆောင်ပေးသည့်အမှု၌ ကျွန်ုပ်တို့နှင့်အတူ ခရီးပြုရန် အသင်းတော်များ၏ ရွေးချယ်ခန့်ထားခြင်းခံရသူလည်း ဖြစ်၏။ ဤအလှူငွေကောက်သည့်အမှုမှာ ဘုရားသခင်၏ ဘုန်းတော်ကို ထင်ရှားစေရန်နှင့် ကျွန်ုပ်တို့၏ စေတနာစိတ်ကို ပြရန်ဖြစ်၏။ 20 ဤသို့ ရက်ရောစွာ လှူဒါန်းကြသော အလှူငွေကို ကိုင်တွယ်စီမံခြင်းနှင့်ပတ်သက်၍ ကျွန်ုပ်တို့ကို မည်သူမျှ အပြစ်မတင်စေရန် ကျွန်ုပ်တို့သတိနှင့် ဆောင်ရွက်လျက် ရှိကြ၏။ 21 ကျွန်ုပ်တို့သည် သခင်ဘုရားရှေ့တော်၌ သာမက အခြားသူတို့ရှေ့၌လည်း မှန်သောအရာကို လုပ်ဆောင်ရန် ရည်ရွယ်ကြ၏။ 22 ထိုသူတို့နှစ်ယောက်နှင့်အတူ နောက်ထပ်ညီအစ်ကိုတစ်ဦးကိုလည်း ကျွန်ုပ်တို့စေလွှတ်လိုက်၏။ ထိုသူအား အကြိမ်ကြိမ် စိစစ်ကြည့်ရာ သူသည် ကူညီရန် အစဉ်စိတ်အားထက်သန်ကြောင်း ကျွန်ုပ်တို့တွေ့ရှိရ၏။ သူသည် သင်တို့အပေါ် ယုံကြည်မှုရှိသောကြောင့် ယခု ပို၍ပင် စေတနာစိတ်အားထက်သန်လျက်ရှိ၏။ 23 တိတုအကြောင်းနှင့် ပတ်သက်၍ ပြောရလျှင် သူသည် သင်တို့ကို ကူညီရန် ကျွန်ုပ်နှင့်အတူ လုပ်ဆောင်သော ကျွန်ုပ်၏ လုပ်ဖော်ကိုင်ဖက်တစ်ဦးဖြစ်သည်ဟု ဆိုရပေမည်။ သူနှင့်အတူပါရှိသော အခြားညီအစ်ကိုများမှာ ခရစ်တော်၏ ဘုန်းတော်ဖြစ်သော အသင်းတော်တို့၏ ကိုယ်စားလှယ်များဖြစ်ကြ၏။ 24 ထို့ကြောင့် သင်တို့၏ ချစ်ခြင်းမေတ္တာကို သူတို့အား ပြ၍ သင်တို့အကြောင်း ကျွန်ုပ်တို့ ကြွားဝါထားသောအရာများကို အသင်းတော်များ ရှေ့၌ သက်သေပြကြလော့။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.