Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

၂ ကော 4 - ခေတ်သစ်​မြန်မာ သမ္မာကျမ်း


မြေအိုး​ထဲ၌ ရှိသော​ရတနာ

1 ထို့ကြောင့် ကျွန်ုပ်တို့​သည် ဘုရားသခင်​၏ ကရုဏာတော်​ကို ခံစားရသည်​နှင့်အညီ ဤ​အမှုတော်​ကို ဆောင်ရွက်ရ​သောကြောင့် စိတ်ပျက်​အားလျော့ခြင်း​မရှိကြပေ။

2 ကျွန်ုပ်တို့​သည် ဆိတ်ကွယ်ရာ​၌ ပြုသော ရှက်ရွံ့ဖွယ်​အမှုတို့​ကို ရှောင်ကြဉ်ကြ၏။ ပရိယာယ်​ကို မသုံးကြ။ ဘုရားသခင်​၏ နှုတ်ကပတ်တော်​ကိုလည်း မှောက်လှန်​၍ မဟောပြောကြ။ ဘုရားသခင်​ရှေ့တော်​၌ ကျွန်ုပ်တို့​မှာ မည်သို့သော​သူများ​ဖြစ်သည်​ကို သူတို့​စိတ်​ထဲက သိနိုင်​ရန် အမှန်တရား​ကိုသာ အတိအလင်း​ဖော်ပြကြ၏။

3 ကျွန်ုပ်တို့​ဟောပြောသော သတင်းကောင်း​သည် ဖုံးအုပ်ခြင်း​ခံရသည်​ဆိုလျှင် ပျက်စီးတော့မည့်​သူတို့​အတွက်သာ ဖုံးအုပ်ခြင်း​ခံရ၏။

4 ဤ​လောက​၏ ဘုရား​ဖြစ်သော စာတန်​သည် မယုံကြည်သောသူတို့​၏ စိတ်နှလုံး​ကို ကွယ်စေခဲ့၏။ ထို့ကြောင့် သူတို့​သည် ဘုရားသခင်​၏ ပုံသဏ္ဌာန်တော်​ဖြစ်သည့် ခရစ်တော်​၏ ဘုန်းအသရေ​နှင့်​ပြည့်စုံသော သတင်းကောင်း​၏​အလင်း​ကို မမြင်နိုင်ခြင်း​ဖြစ်၏။

5 ကျွန်ုပ်တို့​သည် မိမိတို့​အကြောင်း​ကို ဟောပြောကြသည်​မဟုတ်။ ယေရှု​ခရစ်တော်​သည် သခင်​ဖြစ်ကြောင်း​နှင့် ကျွန်ုပ်တို့​သည် ယေရှု​အတွက် သင်တို့​၏ အစေအပါးများ​ဖြစ်ကြောင်း​ကို ဟောပြောကြခြင်း​ဖြစ်၏။

6 “အမှောင်​ထဲမှ အလင်း​ထွန်းလင်းစေ” ဟု မိန့်တော်မူသော ဘုရားသခင်​သည် ယေရှု​ခရစ်တော်​၏ မျက်နှာတော်​၌ ထွန်းလင်းသည့် မိမိ​ဘုန်းတော်​ကို သိနိုင်သော​ဉာဏ်​အလင်း​ကို ကျွန်ုပ်တို့​၏​နှလုံးသား​ထဲ၌ ထွန်းလင်း​စေတော်မူ၏။

7 ထွန်းလင်းနေသည့် ထို​ရတနာ​သည် မြေအိုး​သဖွယ်​ဖြစ်သော ကျွန်ုပ်တို့​ထဲ၌ ရှိ၏။ ဤသည်​မှာ သတင်းကောင်း​၏​ကြီးမြတ်သော​တန်ခိုး​သည် ကျွန်ုပ်တို့​ထံမှ မဟုတ်ဘဲ ဘုရားသခင်​ထံမှ ဖြစ်ကြောင်း ပေါ်လွင်​စေရန်​ဖြစ်၏။

8 ကျွန်ုပ်တို့​သည် ဆင်းရဲဒုက္ခ​အမျိုးမျိုး​ဖြင့် ဖိနှိပ်​ခံရ​သော်လည်း မပြိုလဲ။ ဖြစ်ပျက်နေသည့်​အရာများ​အတွက် ဇဝေဇဝါ​ဖြစ်ရ​သော်လည်း စိတ်ပျက်​အားလျော့ခြင်း​မရှိ။

9 ညှဉ်းပန်း​နှိပ်စက်ခြင်း​ကို ခံရ​သော်လည်း ဘုရားသခင်​၏ စွန့်ပစ်ခြင်း​ကို မခံရ။ အလဲထိုးခံရ​သော်လည်း ရှုံးနိမ့်ခြင်း​မရှိကြ။

10 ကျွန်ုပ်တို့​သည် ဆင်းရဲဒုက္ခ​ခံရခြင်း​အားဖြင့် ယေရှု​အသေခံတော်မူခြင်း​ကို ကျွန်ုပ်တို့​၏ ကိုယ်ခန္ဓာ​တွင် အစဉ်​ဆောင်ထားကြသည်​မှာ ယေရှု​အသက်ရှင်တော်မူခြင်း​ကို ကိုယ်ခန္ဓာ​တွင် ပေါ်လွင်​ထင်ရှား​စေရန်​ဖြစ်၏။

11 သေမျိုး​ဖြစ်သော ကျွန်ုပ်တို့​၏​ကိုယ်ခန္ဓာ​၌ ယေရှု​အသက်ရှင်တော်မူကြောင်း ပေါ်လွင်​ထင်ရှား​နိုင်ရန် အသက်ရှင်​စဉ်​ကာလ​တွင် ကျွန်ုပ်တို့​သည် ယေရှု​ကို​အစေခံ​၍ အစဉ်မပြတ် သေဘေး​နှင့် ရင်ဆိုင်​ကြရ၏။

12 ထိုသို့ ကျွန်ုပ်တို့​သည် သေဘေး​နှင့် ရင်ဆိုင်ရ​သော်လည်း ဤ​အရာ​သည် သင်တို့​အတွက် ထာဝရ​အသက်​ကို ရရှိ​စေ၏။

13 ကျမ်းစာ​၌ “ငါ​ယုံကြည်​သောကြောင့် ငါ​ဟောပြော၏” ဟု ရေးသားထား၏။ ကျွန်ုပ်တို့​တွင်လည်း ထို​ယုံကြည်သည့်​စိတ် ရှိ​သဖြင့် ဟောပြောကြ၏။

14 သခင်​ယေရှု​ကို သေခြင်း​မှ ရှင်ပြန်​ထမြောက်စေတော်မူသော​ဘုရားသခင်​သည် ကျွန်ုပ်တို့​ကိုလည်း ယေရှု​ထမြောက်တော်မူသည်​နည်းတူ ထမြောက်စေ​ပြီးလျှင် သင်တို့​နှင့်အတူ ရှေ့တော်မှောက်​သို့ ခေါ်သွင်းတော်မူမည်​ဖြစ်ကြောင်း​ကို ကျွန်ုပ်တို့​သိကြ၏။

15 ဤ​အခြင်းအရာ​အားလုံး​သည် သင်တို့​အကျိုး​အတွက်​ဖြစ်၏။ ဤသည်​မှာ ဘုရားသခင်​၏ ကျေးဇူးတော်​ကို ခံစားရသောသူ ပို၍​များလာသည်​နှင့်အမျှ ဘုရားသခင်​၏ ဘုန်းတော်​ထင်ရှား​ရန် ကျေးဇူးတော်​ချီးမွမ်းခြင်း​သည်လည်း ပို၍ များလာ​ရန်​ဖြစ်၏။

16 ထို့ကြောင့် ကျွန်ုပ်တို့​သည် စိတ်ပျက်​အားလျော့ခြင်း​မရှိ။ ကျွန်ုပ်တို့​၏ အပြင်ပန်း​ကိုယ်ခန္ဓာ​သည် ပျက်စီး​ယိုယွင်းလာ​သော်လည်း ကျွန်ုပ်တို့​၏ အတွင်း​စိတ်​ခွန်အား​မှာမူ နေ့စဉ်​နှင့်အမျှ အသစ်​တိုးပွား​လျက်​ရှိ၏။

17 ကျွန်ုပ်တို့ ခဏတာ​ခံရသည့် ပေါ့ပါးသော​ဆင်းရဲဒုက္ခ​သည် ကျွန်ုပ်တို့​အတွက် အလွန်​ထူးမြတ်သော ထာဝရ​ဘုန်းအသရေ​ကို ဖြစ်ပွားစေ၏။

18 ထို့ကြောင့် ကျွန်ုပ်တို့​သည် ယခု​မြင်ရသော​အရာများ​ကို အာရုံ​မစိုက်ဘဲ မမြင်ရသော​အရာများ​ကိုသာ အာရုံစိုက်ကြ၏။ မြင်ရသော​အရာများ​သည် မကြာမီ​ပျောက်ကွယ်သွားမည်​ဖြစ်ပြီး မမြင်ရသော​အရာများ​သည် ထာဝရ​တည်မြဲ​လိမ့်မည်။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ