၂ ကော 2 - ခေတ်သစ်မြန်မာ သမ္မာကျမ်း1 ထို့ကြောင့် သင်တို့ထံသို့ လာ၍ သင်တို့အား ဝမ်းနည်းစေမည့် အဖြစ်မျိုးကို နောက်ထပ်မပြုရန် ကျွန်ုပ်ဆုံးဖြတ်ထား၏။ 2 ကျွန်ုပ်သည် သင်တို့ကို ဝမ်းနည်းစေမိလျှင် ကျွန်ုပ်ကို ဝမ်းမြောက်စေမည့်သူ အဘယ်မှာရှိဦးမည်နည်း။ သင်တို့ကသာ ကျွန်ုပ်ကို ဝမ်းမြောက်စေနိုင်၏။ သို့သော်လည်း ကျွန်ုပ်သည် သင်တို့ကို ဝမ်းနည်းစေမိပြီမဟုတ်လော။ 3 ထို့ကြောင့် ကျွန်ုပ်ရောက်လာသောအခါ ကျွန်ုပ်ကို ဝမ်းမြောက်စေရမည့်သူများက ကျွန်ုပ်ကို ဝမ်းနည်းစေမည်စိုးသဖြင့် ယခင်စာကို ရေးပို့ခဲ့ခြင်းဖြစ်၏။ ကျွန်ုပ် ဝမ်းမြောက်လျှင် သင်တို့အားလုံးသည်လည်း ဝမ်းမြောက်ကြမည်ဟု ကျွန်ုပ်စိတ်ချယုံကြည်ပါ၏။ 4 ကျွန်ုပ်သည် အလွန်စိတ်ဆင်းရဲခြင်းနှင့် ပူဆွေးခြင်းထဲမှ မျက်ရည်များဖြင့် ထိုစာကိုရေးခဲ့၏။ သင်တို့ကို ဝမ်းနည်းစေလိုသောကြောင့် မဟုတ်ဘဲ သင်တို့ကို ကျွန်ုပ် မည်မျှချစ်ကြောင်းကို သိစေလိုသောကြောင့် ရေးခဲ့ခြင်းဖြစ်၏။ အပြစ်ရှိသူကို ခွင့်လွှတ်ခြင်း 5 တစ်စုံတစ်ယောက်သည် အပြစ်ကျူးလွန်ခြင်းအားဖြင့် ဝမ်းနည်းစရာဖြစ်စေလျှင် သူသည် ကျွန်ုပ်ကို ဝမ်းနည်းစေသည်ထက် အတိုင်းအတာတစ်ခုအထိ သင်တို့အားလုံးကို ပို၍ ဝမ်းနည်းစေသည်ဟု ကျွန်ုပ်ပြောလျှင် လွန်ရာကျမည်မဟုတ်ပါ။ 6 သင်တို့အများစုပေးသောပြစ်ဒဏ်သည် ထိုသူ၏ အပြစ်အတွက် လုံလောက်ပြီ။ 7 ယခုအချိန်သည် သူ့ကို ခွင့်လွှတ်၍ နှစ်သိမ့်ရမည့်အချိန်ဖြစ်၏။ ထိုသို့မဟုတ်လျှင် သူသည် အလွန်အကျွံ ဝမ်းနည်းခြင်းထဲ၌ နစ်မြုပ်သွားလိမ့်မည်။ 8 သို့ဖြစ်၍ သင်တို့သည် သူ့အပေါ် အမှန်တကယ်မေတ္တာထားကြောင်းကို ရှင်းလင်းစွာ ပြရန် ကျွန်ုပ်တိုက်တွန်းနှိုးဆော်လို၏။ 9 ကျွန်ုပ်စာရေးပို့ရသော အခြားအကြောင်းရင်းမှာ သင်တို့သည် ကျွန်ုပ်၏ ညွှန်ကြားချက်များကို အပြည့်အဝ လိုက်နာသည်၊ မလိုက်နာသည်ကို သိလိုသောကြောင့် ဖြစ်၏။ 10 သင်တို့ ခွင့်လွှတ်သောသူကို ကျွန်ုပ်လည်း ခွင့်လွှတ်၏။ ကျွန်ုပ်သည် တစ်စုံတစ်ယောက်ကို ခွင့်လွှတ်စရာရှိ၍ ခွင့်လွှတ်လျှင် သင်တို့အကျိုးအတွက် ခရစ်တော်၏ရှေ့တော်၌ ခွင့်လွှတ်၏။ 11 သို့မှသာ စာတန်သည် ကျွန်ုပ်တို့အပေါ် အမြတ်ထုတ်နိုင်မည် မဟုတ်ပေ။ အဘယ်ကြောင့်ဆိုသော် ကျွန်ုပ်တို့သည် သူ၏ မကောင်းသောအကြံအစည်များကို သိကြသောကြောင့်ဖြစ်၏။ 12 ကျွန်ုပ်သည် ခရစ်တော်၏ သတင်းကောင်းကို ဟောပြောရန် တရောမြို့သို့ ရောက်ခဲ့၏။ ရောက်သောအခါ သခင်ဘုရားသည် မိမိ၏ အမှုတော်ကို ကျွန်ုပ်အား ဆောင်ရွက်စေရန် ကျွန်ုပ်အတွက် အခွင့်အရေးတံခါးကို ဖွင့်ပေးတော်မူ၏။ 13 သို့သော်လည်း ကျွန်ုပ်၏ညီ တိတု ရောက်မလာသေးသောကြောင့် ကျွန်ုပ်သည် စိတ်မသက်မသာဖြစ်ရ၏။ ထို့ကြောင့် ထိုသူတို့ကို နှုတ်ဆက်ပြီးလျှင် တိတုကို ရှာရန် မာကေဒေါနိပြည်သို့ ထွက်သွားရ၏။ ပဋိညာဉ်သစ်၏ အမှုထမ်းများ 14 သို့သော် ဘုရားသခင်ကို ကျေးဇူးတင်ပါ၏။ ကိုယ်တော်သည် ကျွန်ုပ်တို့ကို သုံ့ပန်းများအဖြစ် သတ်မှတ်ပြီး ခရစ်တော်၏အောင်ပွဲခံအခမ်းအနား လှည့်လည်ရာတွင် လိုက်ပါစေတော်မူ၏။ ခရစ်တော်ကို သိကျွမ်းခြင်း၏ မွှေးရနံ့ကိုလည်း ကျွန်ုပ်တို့အားဖြင့် အရပ်ရပ်တို့၌ ပျံ့နှံ့စေတော်မူ၏။ 15 အဘယ်ကြောင့်ဆိုသော် ကျွန်ုပ်တို့သည် ကယ်တင်ခြင်းခံရသောသူတို့ထဲ၌လည်းကောင်း၊ ဖျက်ဆီးခြင်းခံရသောသူတို့ထဲ၌လည်းကောင်း ဘုရားသခင်အတွက် ခရစ်တော်၏ မွှေးကြိုင်သောရနံ့ဖြစ်ကြသောကြောင့်ပင် ဖြစ်၏။ 16 ကျွန်ုပ်တို့သည် ဖျက်ဆီးခြင်းခံရသောသူတို့အတွက် သေစေတတ်သော သေခြင်းတရား၏ရနံ့ဖြစ်ပြီး ကယ်တင်ခြင်းခံရသောသူများအတွက်မှာမူ အသက်ရှင်စေတတ်သော အသက်ရှင်ခြင်း၏ရနံ့ဖြစ်ကြ၏။ သို့ဖြစ်၍ ဤကဲ့သို့သော တာဝန်ကို မည်သူထမ်းဆောင်နိုင်မည်နည်း။ 17 ကျွန်ုပ်တို့သည် လူများစွာကဲ့သို့ ဘုရားသခင်၏ နှုတ်ကပတ်တရားတော်ကို မိမိကိုယ်ကျိုးအတွက် လှည့်လည်ရောင်းစားသောသူများမဟုတ်ကြပါ။ ကျွန်ုပ်တို့သည် ဘုရားသခင်ထံမှ စေလွှတ်ခံရသူများအဖြစ် ဘုရားသခင်ရှေ့တော်၌ ခရစ်တော်၏ အခွင့်နှင့် ရိုးသားစွာ ဟောပြောကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.