၂ ကော 10 - ခေတ်သစ်မြန်မာ သမ္မာကျမ်းပေါလု ချေပပြောဆိုခြင်း 1 သင်တို့နှင့် လူချင်းတွေ့သောအခါ မဝံ့မရဲဖြစ်၍ အဝေးတွင် ရှိသောအခါ ရဲဝံ့ပြတ်သားသည်ဟု သင်တို့မှတ်ယူသော ကျွန်ုပ်ပေါလုသည် ခရစ်တော်၏ နှိမ့်ချမှုနှင့် နူးညံ့သိမ်မွေ့မှုတို့ဖြင့် သင်တို့ကို တိုက်တွန်းနှိုးဆော်ပါ၏။ 2 လူတချို့က ကျွန်ုပ်တို့သည် လောကီစံနှုန်းအတိုင်း ပြုမူနေထိုင်ကြသည်ဟု ထင်မြင်ကြ၏။ ကျွန်ုပ်ရောက်လာသောအခါ ထိုသူတို့အား ရဲရင့်ပြတ်သားစွာ ပြုမူရန် ကြံစည်ထား၏။ သို့သော် သင်တို့ကိုမူ ထိုသို့ရဲရင့်ပြတ်သားစွာ မပြုမူရစေရန် ကျွန်ုပ်တောင်းပန်ပါ၏။ 3 ကျွန်ုပ်တို့သည် လောကီသားများအဖြစ် ပြုမူနေထိုင်သော်လည်း လောကီသားများက မိမိတို့၏ ရန်ဘက်များကို ဆန့်ကျင်တိုက်ခိုက်သကဲ့သို့ ကျွန်ုပ်တို့မတိုက်ခိုက်။ 4 တိုက်ပွဲတွင် ကျွန်ုပ်တို့ အသုံးပြုသည့်လက်နက်များသည် လောကီသားများအသုံးပြုသည့် လက်နက်များမဟုတ်။ ခံတပ်များကို ဖြိုဖျက်နိုင်သည့် ဘုရားသခင်၏ တန်ခိုးတော်ပါသော လက်နက်များဖြစ်၏။ 5 ကျွန်ုပ်တို့သည် ဘုရားသခင်အား သိကျွမ်းသည့်ဉာဏ်ပညာကို ဆန့်ကျင်သောမာန်မာနတိုင်းကို ဖြိုဖျက်၍ လူ့အတွေးအခေါ်တိုင်းကို ချုပ်နှောင်ကာ ခရစ်တော်၏စကားကို နာခံစေကြ၏။ 6 သင်တို့အကြွင်းမဲ့ နာခံကြသောအခါ ကျွန်ုပ်တို့သည် မနာခံသောသူအပေါင်းတို့ကို ပြစ်ဒဏ်ပေးရန် အသင့်ရှိမည်။ 7 မျက်စိရှေ့၌ ရှိသောအရာကိုသာ ကြည့်ကြလော့။ တစ်စုံတစ်ယောက်က သူသည် ခရစ်တော်၏လူဖြစ်ကြောင်း ယုံကြည်စိတ်ချလျှင် ကျွန်ုပ်တို့သည်လည်း ထိုသူကဲ့သို့ပင် ခရစ်တော်၏လူများဖြစ်ကြောင်းကို သူသည် ပြန်လည်ဆင်ခြင်ပါစေ။ 8 ထို့ကြောင့် သင်တို့ကို ဖြိုဖျက်ရန်အတွက် မဟုတ်ဘဲ တည်ဆောက်ရန်အတွက် ကျွန်ုပ်တို့အား သခင်ဘုရားပေးသော အခွင့်အာဏာကိုအကြောင်းပြုလျက် အနည်းငယ်ပို၍ ကြွားဝါမိလျှင်ပင် မရှက်ပါ။ 9 ကျွန်ုပ်သည် သင်တို့ထံ စာများရေး၍ ခြိမ်းခြောက်နေသည်ဟု မထင်စေလိုပေ။ 10 တချို့က “ပေါလု၏ စာများသည် ဩဇာပါ၍ အထင်ကြီးဖွယ်ဖြစ်သော်လည်း လူချင်းတွေ့လျှင် သူသည် သတ္တိနည်း၍ အဟောအပြောလည်း ညံ့သည်” ဟု ပြောဆိုတတ်ကြ၏။ 11 ထိုသို့ ပြောဆိုသောသူများ သိမှတ်ရမည်မှာ ကျွန်ုပ်တို့သည် အဝေးတွင် ရှိစဉ်က စာ၌ ရေးလိုက်သည့်စကားအတိုင်း လူကိုယ်တိုင်ရောက်ရှိလာသောအခါ လုပ်ဆောင်သွားမည့်အကြောင်းပင် ဖြစ်၏။ 12 ကျွန်ုပ်တို့သည် မိမိကိုယ်ကိုယ် ချီးမွမ်းတတ်သောသူတို့နှင့် တန်းတူသတ်မှတ်ရန်၊ သို့မဟုတ် နှိုင်းယှဉ်ရန် မဝံ့ရဲပါ။ ထိုသူတို့သည် မိမိကိုယ်ကိုယ် စံထားပြီး မိမိကိုယ်ကိုယ် တိုင်းတာကာ အချင်းချင်းကြား၌သာ နှိုင်းယှဉ်၍ ပညာမဲ့လျက်ရှိကြ၏။ 13 သို့သော် ကျွန်ုပ်တို့သည် မိမိတို့၏ အတိုင်းအတာကို ကျော်လွန်၍ ကြွားဝါမည်မဟုတ်။ ကျွန်ုပ်တို့အား ဘုရားသခင် ပေးအပ်ထားတော်မူသောနယ်ပယ်အတွင်း၌သာ ကြွားဝါမည်။ သင်တို့သည်လည်း ထိုနယ်ပယ်အတွင်း၌ ပါဝင်၏။ 14 အကယ်၍ ကျွန်ုပ်တို့သည် သင်တို့ထံသို့ မရောက်ခဲ့သော် ကျွန်ုပ်တို့သည် အလွန်အကျွံနယ်ကျော်နေသည်ဟု ဆိုနိုင်သော်လည်း အမှန်တွင်မူ ကျွန်ုပ်တို့သည် ခရစ်တော်၏ သတင်းကောင်းနှင့်အတူ သင်တို့ထံသို့ ဦးစွာ ရောက်လာခဲ့ကြသူများဖြစ်၏။ ထို့ကြောင့် ကျွန်ုပ်တို့သည် အလွန်အကျွံနယ်ကျော်နေသည်မဟုတ်။ 15 ကျွန်ုပ်တို့သည် မိမိတို့၏ လုပ်ဆောင်မှုအတိုင်းအတာကို ကျော်လွန်၍ အခြားသူတို့လုပ်ဆောင်ခဲ့သောအရာအပေါ် မကြွားဝါတတ်။ သင်တို့၏ ယုံကြည်ခြင်းအားကြီးလာသည်နှင့်အမျှ ကျွန်ုပ်တို့၏ လုပ်ငန်းနယ်ပယ်ကို သင်တို့အကြား ပိုမိုတိုးချဲ့နိုင်ရန် မျှော်လင့်၏။ 16 သို့ပြုလျှင် ကျွန်ုပ်တို့သည် သင်တို့၏အရပ်ဒေသကို ကျော်လွန်၍ အခြားအရပ်ဒေသများ၌ သတင်းကောင်းကို ဟောပြောနိုင်မည်ဖြစ်၏။ ကျွန်ုပ်တို့သည် အခြားသူတို့၏ နယ်ပယ်အတွင်း၌ ထိုသူတို့ဆောင်ရွက်ခဲ့ပြီးသော အရာများအပေါ် မကြွားဝါလိုပေ။ 17 ကျမ်းစာ၌ “ကြွားဝါလိုလျှင် သခင်ဘုရားလုပ်ဆောင်တော်မူသောအခြင်းအရာများအတွက်သာ ကြွားဝါစေ” ဟု ဖော်ပြထား၏။ 18 အဘယ်ကြောင့်ဆိုသော် သခင်ဘုရားနှစ်သက်တော်မူသောသူသည် မိမိကိုယ်ကိုယ် ချီးမွမ်းသောသူမဟုတ်ဘဲ ကိုယ်တော်က ချီးမွမ်းသောသူဖြစ်သောကြောင့်ပင်ဖြစ်၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.