Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

၁ ယော 5 - ခေတ်သစ်​မြန်မာ သမ္မာကျမ်း


လောက​ကို အောင်နိုင်သော​ယုံကြည်ခြင်း

1 ယေရှု​သည် ခရစ်တော်​ဖြစ်တော်မူကြောင်း​ကို ယုံကြည်သောသူ​တိုင်း​သည် ဘုရားသခင်​ထံမှ ဖြစ်ပွားလာသော​သူ​ဖြစ်ပြီး အဖ​ဘုရားသခင်​ကို​ချစ်သောသူ​တိုင်း​သည် အဖ​ဘုရားသခင်​၏​သားသမီးများ​ကိုလည်း ချစ်တတ်၏။

2 ကျွန်ုပ်တို့​သည် ဘုရားသခင်​ကို ချစ်​၍ ပညတ်တော်တို့​ကို လိုက်နာခြင်း​အားဖြင့် ဘုရားသခင်​၏​သားသမီးများ​ကို ချစ်ကြောင်း ကျွန်ုပ်တို့​သိကြ၏။

3 ဘုရားသခင်​ကို ချစ်ခြင်း​သည် ဘုရားသခင်​၏​ပညတ်တော်များ​ကို လိုက်နာခြင်း​ပင် ဖြစ်၏။ ပညတ်တော်တို့​သည် လိုက်နာ​ရန် မခဲယဉ်းပေ။

4 အဘယ်ကြောင့်ဆိုသော် ဘုရားသခင်​ထံမှ ဖြစ်ပွားလာသောသူ​တိုင်း​သည် ဤ​လောက​ကို အောင်နိုင်​သောကြောင့်​ဖြစ်၏။ ကျွန်ုပ်တို့​သည် ယုံကြည်ခြင်း​အားဖြင့် လောက​ကို အောင်နိုင်၏။

5 လောက​ကို အောင်နိုင်သူ​မှာ မည်သူနည်း။ ယေရှု​သည် ဘုရားသခင်​၏​သားတော်​ဖြစ်ကြောင်း ယုံကြည်သူ​သာလျှင်​ဖြစ်၏။

6 ယေရှု​ခရစ်တော်​သည် ရေ​နှင့် သွေး​အားဖြင့် ကြွလာတော်မူသော​အရှင်​ဖြစ်၏။ ရေ​အားဖြင့်​သာ ကြွလာသည်​မဟုတ်။ ရေ​နှင့် သွေး​အားဖြင့် ကြွလာ၏။ ဝိညာဉ်တော်​သည် သမ္မာတရား​ဖြစ်တော်မူ​သောကြောင့် ထိုသို့​ကြွလာကြောင်း​ကို သက်သေခံတော်မူ၏။

7 သက်သေ​သုံးပါး​ရှိ၏။

8 ၎င်းတို့​မှာ ဝိညာဉ်တော်၊ ရေ​နှင့် သွေး​တို့​ဖြစ်ကြ၏။ ထို​သုံးပါး​တို့​သည် တညီတညွတ်တည်း​သက်သေခံကြ၏။

9 ကျွန်ုပ်တို့​သည် လူ​၏​သက်သေ​ကို လက်ခံကြ၏။ ဘုရားသခင်​၏ သက်သေ​မှာမူ ပို​၍ ခိုင်လုံ၏။ အဘယ်ကြောင့်ဆိုသော် ဤ​သက်သေခံချက်​သည် ဘုရားသခင်​၏ သက်သေခံတော်မူချက်​ဖြစ်​၍ မိမိ​သားတော်​နှင့်​ပတ်သက်သော သက်သေခံတော်မူချက်​ဖြစ်၏။

10 ဘုရားသခင်​၏​သားတော်​ကို ယုံကြည်သောသူ​တိုင်း​သည် ဤ​သက်သေခံချက် မှန်ကန်ကြောင်း​ကို လက်ခံ၏။ ဘုရားသခင်​ကို မယုံကြည်သောသူ​မှာမူ ဘုရားသခင်​အား “လိမ်လည်သော​အရှင်” ဟု စွပ်စွဲရာ​ရောက်၏။ အဘယ်ကြောင့်ဆိုသော် ဘုရားသခင်​သည် မိမိ​သားတော်​အကြောင်း သက်သေခံတော်မူသည်​ကို ထို​သူ​သည် မယုံကြည်​သောကြောင့်​ဖြစ်၏။

11 ထို​သက်သေခံချက်​မှာ “ဘုရားသခင်​သည် ကျွန်ုပ်တို့​အား ထာဝရ​အသက်​ကို ပေးတော်မူ​ပြီး ထို​အသက်​သည် သားတော်​၌ ရှိသည်” ဟူ၍ ဖြစ်၏။

12 ထို့ကြောင့် သားတော်​နှင့် တပေါင်းတစည်းတည်း​ဖြစ်သောသူ​သည် အသက်​ကို ရ၏။ ဘုရားသခင်​၏​သားတော်​နှင့် တပေါင်းတစည်းတည်း​မဖြစ်သောသူ​သည် အသက်​ကို မရ။


နိဂုံး

13 ဘုရားသခင်​၏​သားတော်​ကို ယုံကြည်သော​သင်တို့​သည် ထာဝရ​အသက်​ကို ရကြောင်း​သိ​စေရန် ဤ​အကြောင်းအရာများ​ကို ကျွန်ုပ်​ရေးလိုက်၏။

14 ကျွန်ုပ်တို့​သည် အလိုတော်​နှင့်အညီ တစ်စုံတစ်ရာ​ကို တောင်းလျှောက်​လျှင် ဘုရားသခင်​သည် နားဆင်တော်မူမည်​ဟု သိ​သောကြောင့် ဘုရားသခင်​ထံသို့ စိတ်ချ​ယုံကြည်မှု​ဖြင့် ချဉ်းကပ်​နိုင်ကြ၏။

15 တောင်းလျှောက်​သမျှ​ကို ကိုယ်တော်​နားဆင်တော်မူကြောင်း ကျွန်ုပ်တို့​သိ​လျှင် တောင်းလျှောက်သော​အရာ​ကို ပေးတော်မူကြောင်း​ကိုလည်း သိကြ၏။

16 ညီအစ်ကို​မောင်နှမ​တစ်စုံတစ်ယောက်​သည် မိမိ​ဝိညာဉ်​မဆုံးရှုံး​စေနိုင်သည့်​အပြစ်​မျိုး ကျူးလွန်သည်​ကို သင်​တွေ့​လျှင် သူ့​အတွက် ဆုတောင်းပေး​သင့်၏။ မိမိ​ဝိညာဉ်​မဆုံးရှုံး​စေနိုင်သည့်​အပြစ်​မျိုး​ကို ကျူးလွန်သော ထို​သူ​အား ဘုရားသခင်​သည် အသက်​ကို ပေးတော်မူ​လိမ့်မည်။ မိမိ​ဝိညာဉ်​ဆုံးရှုံး​စေနိုင်သည့်​အပြစ်​မျိုး​ရှိ၏။ ထို​အပြစ်​မျိုး​အတွက် ဆုတောင်း​သင့်ကြောင်း ကျွန်ုပ်​မဆိုလိုပါ။

17 မတရားမှု​ဟူသမျှ​သည် အပြစ်​ဖြစ်၏။ ဝိညာဉ်​မဆုံးရှုံး​စေနိုင်သည့်​အပြစ်​မျိုး​လည်း ရှိ၏။

18 ဘုရားသခင်​ထံမှ ဖြစ်ပွားလာသောသူ​သည် အပြစ်​မကျူးလွန်တတ်ကြောင်း ကျွန်ုပ်တို့​သိကြ၏။ ဘုရားသခင်​ထံမှ ဖြစ်ပွားလာသော​အရှင်​သည် ထို​သူ​ကို စောင့်ရှောက်တော်မူ​သဖြင့် မာရ်နတ်​သည် သူ့​ကို မထိခိုက်နိုင်။

19 ကျွန်ုပ်တို့​သည် ဘုရားသခင်​၏​သားသမီးများ​ဖြစ်ကြောင်း​နှင့် လောကီသား​အပေါင်းတို့​သည် မာရ်နတ်​၏​ထိန်းချုပ်မှု​အောက်တွင် ရှိနေကြောင်း ကျွန်ုပ်တို့​သိကြ၏။

20 ဘုရားသခင်​၏​သားတော်​သည် ကြွလာ​၍ စစ်မှန်သော​ဘုရားသခင်​ကို သိ​နိုင်သည့်​ဉာဏ်​ကို ကျွန်ုပ်တို့​အား ပေးတော်မူကြောင်း​ကိုလည်း ကျွန်ုပ်တို့​သိကြ၏။ ထို့ကြောင့် ကျွန်ုပ်တို့​သည် စစ်မှန်သော​ဘုရားသခင်​နှင့်​လည်းကောင်း၊ သားတော်​ယေရှု​ခရစ်တော်​နှင့်​လည်းကောင်း တပေါင်းတစည်းတည်း​ဖြစ်ကြ၏။ ထို​အရှင်​သည် စစ်မှန်သော​ဘုရားသခင်​ဖြစ်တော်မူ​ပြီး ထာဝရ​အသက်​လည်း ဖြစ်တော်မူ၏။

21 ချစ်သော​သားသမီးတို့… ရုပ်တုများ​ကို ရှောင်ကြဉ်ကြလော့။ ရှင်ယောဟန်​ဩဝါဒစာ​ပထမစောင် ပြီးပါပြီ။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ