၁ တိ 5 - ခေတ်သစ်မြန်မာ သမ္မာကျမ်းယုံကြည်သူတို့၏ တာဝန်များ 1 အသက်ကြီးသောအမျိုးသားများကို မဆူပူမကြိမ်းမောင်းဘဲ မိမိဖခင်ကဲ့သို့ အကြံပြု တိုက်တွန်းလော့။ အသက်ငယ်သောအမျိုးသားများကို မိမိညီများကဲ့သို့ ဆက်ဆံလော့။ 2 အသက်ကြီးသောအမျိုးသမီးများကို မိခင်ကဲ့သို့လည်းကောင်း၊ အသက်ငယ်သောအမျိုးသမီးများကို နှမကဲ့သို့လည်းကောင်း စင်ကြယ်စွာ ပြုမူဆက်ဆံလော့။ 3 အမှန်တကယ်ခိုကိုးရာမဲ့ဖြစ်သော မုဆိုးမများကို ရိုသေလျက် ကူညီထောက်ပံ့လော့။ 4 သားသမီးများ၊ မြေးများရှိသော မုဆိုးမဖြစ်လျှင် ထိုသားသမီးမြေးတို့သည် အိမ်သူအိမ်သားများကို ကျွေးမွေးရန်နှင့် မိဘတို့ကို ကျေးဇူးဆပ်ရန် ဦးစွာသင်ယူပါစေ။ ၎င်းသည် မိမိတို့ပြုအပ်သောဘာသာရေးကျင့်ဝတ်ဖြစ်၏။ ဤသို့ပြုခြင်းသည် ဘုရားသခင်၏ စိတ်တော်ကို ကျေနပ်စေ၏။ 5 အမှန်တကယ်ခိုကိုးရာမဲ့ပြီး စောင့်ရှောက်သူမရှိသော မုဆိုးမသည် ဘုရားသခင်ကို မျှော်လင့်လျက် နေ့ညမပြတ် အသနားခံ၍ ဆုတောင်းတတ်၏။ 6 သို့သော် အပျော်အပါးမက်သော မုဆိုးမမှာမူ အသက်ရှင်လျက်ပင် အသေကဲ့သို့ ဖြစ်၏။ 7 ထို့ကြောင့် မည်သူ့ကိုမျှ အပြစ်တင်စရာမရှိစေရန် လူတို့အား ဤအရာများကို ညွှန်ကြားလော့။ 8 မိမိဆွေမျိုးသားချင်း၊ အထူးသဖြင့် မိမိအိမ်သူအိမ်သားများကို မစောင့်ရှောက်သူသည် ယုံကြည်ခြင်းတရားကို ငြင်းပယ်သဖြင့် မယုံကြည်သူများထက် ပို၍ ဆိုး၏။ 9 မုဆိုးမအဖြစ် စာရင်းသွင်းခံရမည့်သူသည် အနည်းဆုံးအသက်ခြောက်ဆယ် ရှိရမည်။ သူသည် ခင်ပွန်းတစ်ယောက်တည်းသာ ရှိဖူးသူ ဖြစ်ရမည်။ 10 သူသည် မိမိသားသမီးများကို ပြုစုပျိုးထောင်ခြင်း၊ ဧည့်ဝတ်ကို ကျေပွန်စွာ ပြုခြင်း၊ ယုံကြည်သူများ၏ခြေကို ဆေးခြင်း၊ ဆင်းရဲဒုက္ခကြုံတွေ့နေသူများကို ကူညီခြင်း၊ အမျိုးမျိုးသောကောင်းမှုများကို အားထုတ်လုပ်ဆောင်ခြင်း စသည့် ကောင်းမှုကုသိုလ်များကြောင့် နာမည်ကောင်းရသူဖြစ်ရမည်။ 11 ငယ်ရွယ်သော မုဆိုးမများကိုမူ စာရင်းမသွင်းနှင့်။ အဘယ်ကြောင့်ဆိုသော် သူတို့၏ ကာမဂုဏ်တပ်မက်ခြင်းသည် ခရစ်တော်ထံ ဆက်ကပ်ခြင်းထက် အားကြီးလာသောအခါ ထပ်မံအိမ်ထောင်ပြုလိုစိတ်ရှိလာသောကြောင့် ဖြစ်၏။ 12 ထိုသို့ပြုခြင်းဖြင့် သူတို့သည် မိမိတို့၏ ကနဦး ကတိသစ္စာကို ချိုးဖောက်သောကြောင့် ပြစ်ဒဏ်စီရင်ခံရကြလိမ့်မည်။ 13 ထို့ပြင် သူတို့သည် တစ်အိမ်တက်တစ်အိမ်ဆင်း လှည့်လည်ကာ ပျင်းရိသောအကျင့် ရှိလာကြ၏။ ပျင်းရိသည်သာမက အတင်းအဖျင်းပြောလျက် မပြောသင့်သည့်အရာကို ပြော၍ သူတစ်ပါးကိစ္စတွင် ဝင်ရောက်စွက်ဖက်တတ်ကြ၏။ 14 ထို့ကြောင့် လမ်းလွဲ၍ စာတန်နောက်သို့ လိုက်ပါသွားကြသော အချို့မုဆိုးမတို့ကို ထောက်၍ ငယ်ရွယ်သောမုဆိုးမတို့သည် ရန်သူအား ကဲ့ရဲ့ခွင့်ကို မပေးဘဲ ထပ်မံအိမ်ထောင်ပြုရန်၊ သားသမီးများယူရန်၊ အိမ်မှုကိစ္စများထိန်းသိမ်းရန် ကျွန်ုပ်အကြံပေးလို၏။ 15 အချို့မုဆိုးမတို့မှာမူ လမ်းလွဲ၍ စာတန်နောက်သို့ လိုက်ပါသွားကြပြီ။ 16 အကယ်၍ ယုံကြည်သူအမျိုးသမီးများ၏ မိသားစုတွင် မုဆိုးမများရှိပါက အသင်းတော်အတွက် ဝန်ထုပ်မဖြစ်စေရန် သူတို့ကိုယ်တိုင် ထိုမုဆိုးမများကို ကူညီထောက်ပံ့သင့်၏။ သို့မှသာ အမှန်တကယ်ခိုကိုးရာမဲ့ မုဆိုးမများကို အသင်းတော်က ကူညီထောက်ပံ့နိုင်လိမ့်မည်။ 17 အသင်းတော်ကို ကောင်းမွန်စွာ ဦးဆောင်စီမံသောသင်းအုပ်များ၊ အထူးသဖြင့် တရားဟောခြင်းနှင့် သွန်သင်ပေးခြင်းတို့ကို ကြိုးစား၍ ဆောင်ရွက်သော သင်းအုပ်များသည် နှစ်ဆသောထောက်ပံ့ခြင်းကို ရထိုက်၏။ 18 အဘယ်ကြောင့်ဆိုသော် ကျမ်းစာ၌ “စပါးနယ်နေသည့် နွား၏နှုတ်ကို ပါးချုပ်မတပ်နှင့်” ဟူ၍လည်းကောင်း၊ “အလုပ်လုပ်သူသည် အခကြေးငွေကို ရထိုက်၏” ဟူ၍လည်းကောင်း ဆိုထားသောကြောင့်ဖြစ်၏။ 19 သက်သေနှစ်ဦး၊ သုံးဦးမရှိလျှင် သင်းအုပ်အပေါ် စွပ်စွဲခြင်းကို လက်မခံနှင့်။ 20 အပြစ်ကျူးလွန်သော သင်းအုပ်တို့ကို လူအများရှေ့တွင် ဆုံးမလော့။ ထိုသို့ပြုလျှင် အခြားသင်းအုပ်တို့သည်လည်း အပြစ်ကျူးလွန်ရန် ကြောက်ရွံ့ကြလိမ့်မည်။ 21 မျက်နှာလိုက်ခြင်း၊ ဘက်လိုက်ခြင်းမရှိဘဲ ဤညွှန်ကြားချက်များကို လိုက်နာဆောင်ရွက်ရန် ဘုရားသခင်နှင့် ယေရှုခရစ်တော်တို့ ရှေ့၌လည်းကောင်း၊ ရွေးကောက်တော်မူသောကောင်းကင်တမန်တို့ရှေ့၌လည်းကောင်း သင့်ကို ကျွန်ုပ်အလေးအနက် ညွှန်ကြားလို၏။ 22 အသင်းတော်ခေါင်းဆောင်တစ်ဦးကို လက်တင်မင်္ဂလာပေး၍ ခန့်အပ်ရာတွင် မည်သည့်အခါမျှ အလျင်စလိုမလုပ်နှင့်။ အခြားသူတို့ အပြစ်ကျူးလွန်ရာတွင် မပါဝင်နှင့်။ မိမိကိုယ်ကိုယ် ဖြူစင်သန့်ရှင်းစေလော့။ 23 သင့်ကို မကြာခဏ မကျန်းမမာဖြစ်စေသည့် သင်၏အစာအိမ်ရောဂါကြောင့် ရေကိုသာ မသောက်ဘဲ စပျစ်ဝိုင်အနည်းငယ်ကိုလည်း သောက်လော့။ 24 လူတချို့၏ အပြစ်များသည် တရားမစီရင်မီကပင် သိသာထင်ရှား၏။ လူတချို့၏ အပြစ်များသည် နောက်မှ ပေါ်လာတတ်၏။ 25 ထိုနည်းတူ ကောင်းမှုများသည် သိသာထင်ရှား၏။ မသိသာမထင်ရှားသော ကောင်းမှုများသည်လည်း ဖုံးကွယ်၍ ရမည်မဟုတ်။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.