၁ တိ 3 - ခေတ်သစ်မြန်မာ သမ္မာကျမ်းသင်းအုပ်များနှင့် သင်းထောက်များ၌ ရှိရမည့် အရည်အချင်းများ 1 “တစ်စုံတစ်ယောက်သည် သင်းအုပ်အဖြစ် ဆောင်ရွက်ရန် ဆန္ဒပြင်းပြလျှင် ထိုသူသည် မွန်မြတ်သည့်အမှုကို တောင့်တသူဖြစ်၏” ဟူသော စကားသည် လုံးဝမှန်သောစကား ဖြစ်၏။ 2 သင်းအုပ်သည် အပြစ်ဆိုဖွယ်မရှိသူ၊ မယားတစ်ယောက်တည်းရှိသူ၊ ကိုယ်ကျင့်တရားစောင့်ထိန်းသူ၊ မိမိကိုယ်ကိုယ် ချုပ်တည်းသူ၊ လေးစားထိုက်သူ၊ ဧည့်ဝတ်ကျေသူ၊ သင်ပြတတ်သူ ဖြစ်ရမည်။ 3 သူသည် သောက်စားမူးယစ်သူ၊ ခက်ထန်ကြမ်းကြုတ်သူ၊ ခိုက်ရန်ဖြစ်ပွားသူ၊ ငွေမက်သူမဟုတ်ဘဲ ထောက်ထားညှာတာသူ ဖြစ်ရမည်။ 4 သူသည် မိမိအိမ်ထောင်ကို ကောင်းစွာ ဦးဆောင်စီမံနိုင်ပြီး အရာရာ၌ သားသမီးများ၏ နာခံလေးစားမှုကို ခံရသောသူဖြစ်ရမည်။ 5 မိမိအိမ်ထောင်ကို ဦးမဆောင်မစီမံနိုင်လျှင် ဘုရားသခင်၏ အသင်းတော်ကို မည်သို့ ပြုစုစောင့်ရှောက်နိုင်မည်နည်း။ 6 သူသည် ယေရှုကို ယုံကြည်ခါစလူ မဖြစ်ရ။ ထိုသို့မဟုတ်ပါက သူသည် ဘဝင်မြင့်လျက် မာရ်နတ်ခံရသည့်ပြစ်ဒဏ်အတိုင်း ခံရလိမ့်မည်။ 7 သူတစ်ပါး ကဲ့ရဲ့ရှုတ်ချခြင်းမခံရစေရန်နှင့် မာရ်နတ်၏ ကျော့ကွင်းထဲသို့ မကျရောက်စေရန် သူသည် အသင်းတော်ပြင်ပတွင် ဂုဏ်သရေရှိသူ ဖြစ်ရမည်။ 8 ထိုနည်းတူ သင်းထောက်တို့သည် ကိုယ်ကျင့်တရားကောင်းသူ ဖြစ်ရမည်။ လျှာနှစ်ခွဖြင့် ပြောဆိုတတ်သူ၊ သေရည်သေရက်သောက်ကြူးသူ၊ မသမာနည်းဖြင့် ငွေရှာသူမဖြစ်ရ။ 9 သူတို့သည် ယုံကြည်ခြင်းတရား၏ လျှို့ဝှက်နက်နဲသောအမှန်တရားကို လိပ်ပြာသန့်သန့်ဖြင့် ဆက်လက်ယုံကြည်သူများဖြစ်ရမည်။ 10 ထိုသူတို့သည် ဦးစွာ စစ်ဆေးခံရမည်။ သူတို့၌ အပြစ်ဆိုဖွယ်မရှိလျှင် သင်းထောက်အဖြစ် ခန့်အပ်နိုင်၏။ 11 ထိုနည်းတူ သူတို့၏ ဇနီးတို့သည်လည်း ကိုယ်ကျင့်တရားကောင်းသူများဖြစ်ရမည်။ အတင်းအဖျင်းမပြောသူ၊ ကိုယ်ကျင့်တရားစောင့်ထိန်းသူ၊ အရာရာ၌ ယုံကြည်စိတ်ချရသူ ဖြစ်ရမည်။ 12 သင်းထောက်သည် မယားတစ်ယောက်တည်းရှိသူ၊ သားသမီးများနှင့် အိမ်သူအိမ်သားများကို ကောင်းစွာ ဦးဆောင်စီမံနိုင်သူ ဖြစ်ရမည်။ 13 မိမိတာဝန်ကို ကောင်းစွာ ထမ်းဆောင်သော သင်းထောက်သည် နာမည်ကောင်းရ၍ ယေရှုခရစ်တော်ကို ယုံကြည်သည့်အကြောင်း ရဲဝံ့စွာ ပြောနိုင်၏။ နက်နဲဆန်းကြယ်သော ယုံကြည်ခြင်းတရား 14 သင့်ထံသို့ အမြန်လာနိုင်ရန် မျှော်လင့်သော်လည်း ဤအရာများကို ဦးစွာ ရေးပို့လိုက်ပါ၏။ 15 သို့မှသာ ကျွန်ုပ်၏ခရီး ကြန့်ကြာနေခဲ့လျှင်လည်း ဘုရားသခင်၏ အိမ်တော်တွင် မည်သို့ ပြုမူရမည်ကို သင်သိနိုင်မည်။ ထိုအိမ်တော်သည် အသက်ရှင်သောဘုရားသခင်၏ အသင်းတော်ဖြစ်ပြီး သမ္မာတရား၏ မဏ္ဍိုင်နှင့် အုတ်မြစ်လည်း ဖြစ်၏။ 16 ကျွန်ုပ်တို့၏ ယုံကြည်ခြင်းတရား နက်နဲဆန်းကြယ်ပုံသည် အမှန်တကယ်ကြီးမြတ်လှ၏။ သခင်ဘုရားသည် လူသားအဖြစ် ကြွလာတော်မူခဲ့ပြီး ဘုရားသခင်၏ သားတော် စစ်မှန်ကြောင်း ဝိညာဉ်တော်အားဖြင့် ဖော်ပြခြင်းခံရတော်မူ၏။ ကိုယ်တော်ကို ကောင်းကင်တမန်တို့ မြင်ကြ၏။ ကိုယ်တော်အကြောင်းကို လူမျိုးခြားတို့ထံ ဟောပြောကြ၏။ ကိုယ်တော်ကို ကမ္ဘာလောကသားတို့ ယုံကြည်ကြ၏။ ကိုယ်တော်ကို ဘုန်းအသရေနှင့်တကွ ကောင်းကင်ဘုံသို့ ဘုရားသခင်ခေါ်ယူတော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.