Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

၁ ကော 9 - ခေတ်သစ်​မြန်မာ သမ္မာကျမ်း


တမန်တော်​အခွင့်အရေးများ​ကို ပေါလု စွန့်လွှတ်ခြင်း

1 ကျွန်ုပ်​သည် လွတ်လပ်သူ​ဖြစ်သည် မဟုတ်လော။ တမန်တော်​ဖြစ်သည် မဟုတ်လော။ ကျွန်ုပ်တို့​၏​သခင် ယေရှု​ကို မြင်ခဲ့ဖူးသူ​ဖြစ်သည် မဟုတ်လော။ သင်တို့​သည် သခင်ဘုရား​အားဖြင့် ကျွန်ုပ် ထမ်းဆောင်ရသော​အမှုတော်​မှ ရရှိလာသော အသီးအပွင့်များ မဟုတ်လော။

2 ကျွန်ုပ်​သည် အခြား​သူတို့​အတွက် တမန်တော် မဖြစ်​လျှင်ပင် သင်တို့​အတွက် တမန်တော်​ဖြစ်၏။ အဘယ်ကြောင့်ဆိုသော် သင်တို့​ကိုယ်တိုင်​သည် သခင်ဘုရား​နှင့် တပေါင်းတစည်းတည်း​ရှိခြင်း​အားဖြင့် ကျွန်ုပ်​တမန်တော်​ဖြစ်ကြောင်း သက်သေ​ဖြစ်ကြ​သောကြောင့် ဖြစ်၏။

3 ကျွန်ုပ်​ကို စစ်ဆေး​မေးမြန်းသော​သူတို့​အား ဤသို့ ကျွန်ုပ်​ဖြေရှင်း၏။

4 ကျွန်ုပ်တို့​သည် သင်တို့​အိမ်​၌ စားသောက်​ပိုင်ခွင့် မရှိသလော။

5 ကျွန်ုပ်တို့​သည် ပေတရု​မှစ၍ သခင်ဘုရား​၏ ညီတော်များ​နှင့် အခြားသော​တမန်တော်များ​ကဲ့သို့ ခရီးသွား​ရာတွင် ယုံကြည်သူ​ဇနီးသည်​ကို ကျွန်ုပ်တို့​နှင့်အတူ ခေါ်ဆောင်ခွင့် မရှိသလော။

6 ကျွန်ုပ်​နှင့် ဗာနဗ​သာလျှင် မိမိတို့​စားဝတ်နေရေး​အတွက် အလုပ်လုပ်​ရမည်လော။

7 မည်သူ​သည် မိမိ​စရိတ်​ဖြင့် စစ်မှုထမ်း​ရသနည်း။ မည်သူ​သည် စပျစ်ခြံ​ကို စိုက်ပျိုး​ပြီး ထို​ခြံထွက်​အသီး​ကို မစားဘဲ​နေရသနည်း။ မည်သူ​သည် သိုးအုပ်​ကို ထိန်းကျောင်း​ပြီး သိုးနို့​ကို မသောက်ဘဲ​နေရသနည်း။

8 ကျွန်ုပ်​သည် ဤ​အရာများ​ကို လူ့​အမြင်​ဖြင့်သာ ပြောနေသလော။ ပညတ်တရား​သည်လည်း ဤ​အတိုင်း​ပင် ဖော်ပြထားသည်​မဟုတ်လော။

9 မောရှေ​၏​ပညတ်ကျမ်း​တွင် “စပါး နယ်နေသည့်​နွား​၏​နှုတ်​ကို ပါးချုပ်​မတပ်ရ” ဟု ရေးသားထား၏။ ထိုသို့​ဆိုရာ​တွင် ဘုရားသခင်​သည် နွား​ကိုသာ အလေးထား​၍ မိန့်တော်မူသလော။

10 ကျွန်ုပ်တို့​အတွက်​သာ မိန့်တော်မူသည်​မဟုတ်လော။ အမှန်ပင် ကျွန်ုပ်တို့​အတွက် ရေးသားထားခြင်း​ဖြစ်၏။ အဘယ်ကြောင့်ဆိုသော် လယ်ထွန်သောသူ​နှင့် စပါး​နယ်သော​သူတို့​နှစ်ဦးလုံး​သည် ရရှိမည့်​ဝေစု​အသီးအနှံ​ကို မျှော်လင့်​လျက် လုပ်ဆောင်ကြရ​သောကြောင့် ဖြစ်၏။

11 ကျွန်ုပ်တို့​သည် သင်တို့​ထံ၌ ဝိညာဉ်ရေးရာ မျိုးစေ့​ကို စိုက်ပျိုးခဲ့သည်​ဖြစ်လျှင် သင်တို့​ထံမှ ခန္ဓာရေးရာ​အစားအသောက်​ကို ရိတ်သိမ်းခြင်း​က လွန်ရာ​ကျသလော။

12 အခြား​သူတို့​သည် သင်တို့​ထံမှ ဤ​ခံစားခွင့်​ကို ရ​လျှင် ကျွန်ုပ်တို့​သည် ပို၍ ရထိုက်သည်​မဟုတ်လော။ သို့ရာတွင် ကျွန်ုပ်တို့​သည် ဤ​ခံစားခွင့်​ကို မယူခဲ့ကြ။ ခရစ်တော်​၏ သတင်းကောင်း​ကို အဆီးအတား​မရှိ​စေရန်​အတွက် မည်သည့်​အခက်အခဲ​ကို​မဆို သည်းခံကြ၏။

13 ဗိမာန်တော်​၌ အမှုထမ်းသော​သူတို့​သည် ဗိမာန်တော်​မှ အစားအစာများ​ကို စားသောက်ရ​ပြီး ယဇ်ပလ္လင်​၌ အမှုထမ်းသော​သူတို့​သည် ယဇ်ပလ္လင်​မှ ရရှိသော ပူဇော်စရာများ​ကို မျှဝေ​ခံစားခွင့်​ရှိကြောင်း​ကို သင်တို့​မသိကြသလော။

14 ထို​နည်းတူ သတင်းကောင်း​ကို ဟောပြောသော​သူတို့​သည် ထို​သတင်းကောင်း​အားဖြင့် အသက်​မွေးခွင့်​ရှိကြောင်း သခင်ဘုရား​မိန့်တော်မူခဲ့၏။

15 သို့သော်လည်း ကျွန်ုပ်​သည် ထို​အခွင့်အရေး​ကို တစ်ခါ​မျှ မယူခဲ့ဖူးပေ။ ထို​အခွင့်အရေး​ကို သင်တို့​ပေးမည်​ဟု မျှော်လင့်​၍ ဤ​စာ​ကို ရေးရခြင်း​လည်း မဟုတ်ပါ။ အမှန်​တွင် အခကြေးငွေ​မယူဘဲ ဟောပြောခြင်း​ကြောင့် ဂုဏ်ယူ​ဝင့်ကြွားရသော​အခွင့်​ကို ဆုံးရှုံးသည်​ထက် သေသွားခဲ့​လျှင်ပင် ပို၍ ကောင်း​လိမ့်မည်။

16 သို့သော်လည်း သတင်းကောင်း​ကို ဟောပြောခြင်း​သည် ကျွန်ုပ်​အတွက် ကြွားဝါစရာ​မဟုတ်ပေ။ အဘယ်ကြောင့်ဆိုသော် ကျွန်ုပ်​၌ မဖြစ်မနေ​ဟောပြောရမည့်​တာဝန်​ရှိ​သောကြောင့်​ဖြစ်၏။ ထို​သတင်းကောင်း​ကို မဟောပြော​လျှင် ကျွန်ုပ်​သည် အမင်္ဂလာ​ရှိ၏။

17 ကျွန်ုပ်​သည် ဤ​အမှု​ကို မိမိ​အလိုဆန္ဒ​ကြောင့် ဆောင်ရွက်ခြင်း​ဖြစ်​လျှင် ဆုလာဘ်​ကို ရသင့်၏။ သို့သော် ဘုရားသခင်​က ဤ​တာဝန်​ကို ကျွန်ုပ်​ထံ ယုံယုံကြည်ကြည်​အပ်နှံထား​သောကြောင့် ဝတ္တရား​ရှိ​၍ ဆောင်ရွက်ရခြင်း​ဖြစ်၏။

18 သို့ဖြစ်​လျှင် ကျွန်ုပ်​၏ ဆုလာဘ်​မှာ မည်သည့်​အရာ​ဖြစ်သနည်း။ ဤ​အရာ​မှာ အခကြေးငွေ​မယူဘဲ သတင်းကောင်း​ကို ဟောပြောခြင်း​ဖြစ်၏။ ထို့ကြောင့် ကျွန်ုပ်​သည် သတင်းကောင်း​ကို ဟောပြော​သောအခါ ကျွန်ုပ်​ရထိုက်သော​အခွင့်အရေး​ကို အပြည့်အဝ​မတောင်းဆိုဘဲ​နေခြင်း​ဖြစ်၏။

19 ကျွန်ုပ်​သည် လွတ်လပ်သောသူ​ဖြစ်ပြီး မည်သူ​၏​ကျွန်​မှ မဟုတ်ပါ။ သို့သော် ခရစ်တော်​ကို ယုံကြည်သောသူများ ပို၍ များလာ​စေရန် လူ​အပေါင်းတို့​၏​ကျွန် ဖြစ်လာရ၏။

20 ဂျူးလူမျိုးတို့​နှင့်အတူ​ရှိစဉ်က ဂျူးလူမျိုးတို့​ကို ကယ်တင်​နိုင်ရန် ဂျူးလူမျိုး​ကဲ့သို့ နေထိုင်၏။ ဂျူးလူမျိုးတို့​၏ ပညတ်တရား​ကို လိုက်နာ​စောင့်ထိန်းသူ​မဟုတ်​သော်လည်း ထို​ပညတ်တရား​ကို လိုက်နာ​စောင့်ထိန်းသော​ဂျူးလူမျိုးတို့​ကို ကယ်တင်​နိုင်ရန် ပညတ်တရား​ကို စောင့်ထိန်းသူ​ကဲ့သို့ နေထိုင်၏။

21 ဂျူးလူမျိုးတို့​၏​ပညတ်တရား​ကို မကျင့်သုံးသော လူမျိုးခြားတို့​နှင့်အတူ​ရှိစဉ်က ထို​သူတို့​ကို ကယ်တင်​နိုင်ရန် ပညတ်တရား​ကို မကျင့်သုံးသောသူ​ကဲ့သို့ နေထိုင်၏။ သို့ရာတွင် ဘုရားသခင်​၏ ပညတ်တရား​ကို လျစ်လျူ​မရှု၊ ခရစ်တော်​၏ ပညတ်တရား​ကို နာခံ​ကျင့်သုံး၏။

22 အားနည်းသော​သူတို့​နှင့်အတူ​ရှိစဉ်က အားနည်းသော​သူတို့​ကို ကယ်တင်​နိုင်ရန် အားနည်းသောသူ​ဖြစ်လာ၏။ တတ်နိုင်​သမျှ လူ​တချို့​ကို ကယ်တင်​နိုင်ရန် ထို​သူတို့​နှင့် တူသော​အချက်​ကို ရှာ​၍ နေထိုင်၏။

23 သတင်းကောင်း​ပျံ့နှံ့​ရန်အတွက် အရာ​အားလုံး​ကို လုပ်ဆောင်​ပြီး ထို​သတင်းကောင်း​၏ အကျိုး​ကျေးဇူးများ​ကို မျှဝေခံစား၏။

24 အပြေးပြိုင်ပွဲ​တွင် ပြေးသောသူ​အားလုံး ယှဉ်ပြိုင်ကြ​သော်လည်း တစ်ဦးတည်း​သာ ဆုရသည်​ကို သင်တို့​သိကြသည်​မဟုတ်လော။ သို့ဖြစ်၍ ဆု​ကို ဆွတ်ခူးရရှိ​နိုင်ရန်​အတွက် ပြေးကြလော့။

25 အားကစားသမား​တိုင်း​သည် လေ့ကျင့်​ရာတွင် အရာရာ​၌ မိမိ​ကိုယ်ကိုယ် ထိန်းချုပ်ရ၏။ ထို​သူတို့​သည် ပျောက်ကွယ်​ပျက်စီးမည့် ဆုသရဖူ​ကို ရ​ရန် ထိုသို့​ပြုကြ၏။ ကျွန်ုပ်တို့​မှာမူ ထာဝရ​မပျောက်ကွယ်​မပျက်စီးမည့် ဆုသရဖူ​ကို ရ​ရန် ထိုသို့​ပြုကြ၏။

26 ထို့ကြောင့် ကျွန်ုပ်​သည် ပန်းတိုင်​မရှိဘဲ ပြေး​သကဲ့သို့ ပြေးသည်​မဟုတ်။ ကျွန်ုပ်​သည် လေ​ကို လက်ဝှေ့​ထိုး​သကဲ့သို့ ထိုးသည်​မဟုတ်။

27 သူတစ်ပါး​ကို ဟောပြော​ပြီးမှ မိမိ​ကိုယ်တိုင်​က အရည်အချင်း​မပြည့်မီဘဲ​နေမည်​ကို ကျွန်ုပ်​စိုးရွံ့​သောကြောင့် ကျွန်ုပ်​သည် အားကစားသမား​ကဲ့သို့ မိမိ​ကိုယ်ခန္ဓာ​ကို ထိုးနှက်​၍ ထိန်းချုပ်၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ