၁ ကော 7 - ခေတ်သစ်မြန်မာ သမ္မာကျမ်းလက်ထပ်ထိမ်းမြားခြင်းဆိုင်ရာ ညွှန်ကြားချက်များ 1 ယခုတွင် သင်တို့ရေးပို့သောစာ၌ မေးထားသည့်မေးခွန်းနှင့် ပတ်သက်၍ ဖြေရပါက ယောက်ျားသည် မိန်းမနှင့် မထိတွေ့လျှင် ကောင်း၏။ 2 သို့သော် တရားနှင့်မညီသော မေထုန်ကိုပြုခြင်းတို့ကြောင့် အမျိုးသားတိုင်း၌ ဇနီးရှိသင့်ပြီး အမျိုးသမီးတိုင်း၌လည်း ခင်ပွန်း ရှိသင့်၏။ 3 ခင်ပွန်းဖြစ်သူသည် ဇနီးအပေါ် ခင်ပွန်းဝတ်ကို ကျေပွန်ရမည်ဖြစ်ပြီး ဇနီးဖြစ်သူသည်လည်း ခင်ပွန်းအပေါ် ဇနီးဝတ်ကို ကျေပွန်ရမည်။ 4 ဇနီးသည် မိမိကိုယ်ခန္ဓာကို မပိုင်။ ခင်ပွန်းကသာ ပိုင်၏။ ထို့အတူ ခင်ပွန်းသည် မိမိကိုယ်ခန္ဓာကို မပိုင်။ ဇနီးကသာ ပိုင်၏။ 5 လင်မယားဝတ်ကို မရှောင်ကြနှင့်။ သို့သော် ဆုတောင်းချိန်တွင် အပြည့်အဝဆုတောင်းနိုင်ရန် နှစ်ဦးသဘောတူညီချက်ဖြင့် သတ်မှတ်ထားသော အချိန်အတိုင်းအတာအတွင်း ရှောင်ကြဉ်နိုင်၏။ လင်မယားဝတ်ကို ရှောင်လျှင် စာတန်သည် သင်တို့၏ မထိန်းချုပ်နိုင်ခြင်းအပေါ် အခွင့်ကောင်းယူ၍ သင်တို့ကို သွေးဆောင်မည်ကို စိုးရသောကြောင့် အချိန်စေ့လျှင် လင်မယားဝတ်ကို ပြန်၍ ပြုကြလော့။ 6 ဤသို့ ကျွန်ုပ်ပြောဆိုသည်မှာ အမိန့်ပေးခြင်းမဟုတ်ဘဲ အခွင့်ပေးခြင်းသာဖြစ်၏။ 7 ကျွန်ုပ်သည် လူတိုင်းကို ကျွန်ုပ်ကဲ့သို့ အိမ်ထောင်မပြုဘဲ နေစေလို၏။ သို့သော်လည်း လူတိုင်းတွင် ဘုရားသခင်ထံမှ ရရှိသော အထူးဆုကျေးဇူးတစ်မျိုးစီရှိ၏။ 8 ထို့ကြောင့် အိမ်ထောင်မရှိသောသူများနှင့် မုဆိုးမများကို ကျွန်ုပ်ပြောလိုသည်မှာ ထိုသူတို့သည် ကျွန်ုပ်ကဲ့သို့ အိမ်ထောင်မပြုဘဲ နေလျှင် ပို၍ကောင်းလိမ့်မည်။ 9 သို့သော် သူတို့သည် မိမိကိုယ်ကိုယ် မထိန်းချုပ်နိုင်လျှင် အိမ်ထောင်ပြုသင့်၏။ တဏှာမီးတောက်လောင်နေခြင်းထက် အိမ်ထောင်ပြုလိုက်ခြင်းက ပို၍ ကောင်း၏။ 10 အိမ်ထောင်ရှိသောသူများအတွက် ကျွန်ုပ်ထံမှ မဟုတ်ဘဲ သခင်ဘုရားထံမှ လာသော ပညတ်ချက်ရှိ၏။ ဇနီးသည် မိမိခင်ပွန်းနှင့် ခွဲမနေရ။ 11 ခင်ပွန်းနှင့် ခွဲနေလျှင် သူသည် နောက်အိမ်ထောင်မပြုဘဲနေရမည်။ ထိုသို့မဟုတ်လျှင် ခင်ပွန်းနှင့် ပြန်လည်ပေါင်းသင်းရမည်။ ခင်ပွန်းသည်လည်း မိမိဇနီးကို မကွာရှင်းရ။ 12 သခင်ဘုရားထံမှ လာသော ပညတ်မဟုတ်သော်လည်း အခြားသောသူတို့အား ကျွန်ုပ်ပြောလို၏။ ယုံကြည်သောအမျိုးသားတစ်ဦးတွင် မယုံကြည်သောဇနီး ရှိပြီး ထိုဇနီးသည် သူနှင့်အတူ ဆက်၍ ပေါင်းသင်းနေထိုင်လိုပါက သူသည် ထိုဇနီးကို မကွာရှင်းရ။ 13 ထိုနည်းတူ ယုံကြည်သောအမျိုးသမီးတစ်ဦးတွင် မယုံကြည်သောခင်ပွန်း ရှိပြီး ထိုခင်ပွန်းသည် သူနှင့်အတူ ဆက်၍ ပေါင်းသင်းနေထိုင်လိုပါက သူသည် ထိုခင်ပွန်းကို မကွာရှင်းရ။ 14 အဘယ်ကြောင့်ဆိုသော် မယုံကြည်သောခင်ပွန်းသည် မိမိဇနီးအားဖြင့် သန့်ရှင်းစင်ကြယ်ပြီး မယုံကြည်သောဇနီးသည်လည်း မိမိခင်ပွန်းအားဖြင့် သန့်ရှင်းစင်ကြယ်သောကြောင့်ဖြစ်၏။ သို့မဟုတ်ပါက သင်တို့၏ သားသမီးများသည် သန့်ရှင်းစင်ကြယ်မည်မဟုတ်။ ယခုတွင်မူ သန့်ရှင်းစင်ကြယ်ပြီဖြစ်၏။ 15 သို့သော် မယုံကြည်သောခင်ပွန်း၊ သို့မဟုတ် ဇနီးက ကွာရှင်းလိုလျှင် ကွာရှင်းပါစေ။ ထိုအခြေအနေမျိုးတွင် ယုံကြည်သောခင်ပွန်းဖြစ်စေ၊ ဇနီးဖြစ်စေ ထိုသူနှင့် မသက်ဆိုင်တော့ပေ။ ဘုရားသခင်သည် သင်တို့အား ငြိမ်းချမ်းစွာ နေထိုင်ရန် ရွေးကောက်တော်မူ၏။ 16 အသင် အမျိုးသမီး… သင်၏ ခင်ပွန်းသည် သင့်အားဖြင့် ကယ်တင်ခံရမည် မခံရမည်ကို သင်မည်သို့သိနိုင်မည်နည်း။ အသင် အမျိုးသား… သင်၏ ဇနီးသည် သင့်အားဖြင့် ကယ်တင်ခံရမည် မခံရမည်ကို သင်မည်သို့သိနိုင်မည်နည်း။ 17 သင်တို့တစ်ဦးစီသည် ဘုရားသခင် ထားတော်မူသော မည်သည့် အခြေအနေတွင်မဆို ဆက်လက်ပြုမူနေထိုင်၍ သင်တို့ကို စတင်ရွေးကောက်တော်မူသည့်အချိန်က ကဲ့သို့ပင် ဆက်လက်ရှိနေသင့်၏။ ဤသည်မှာ အသင်းတော်အားလုံးကို ကျွန်ုပ်ညွှန်ကြားသောအချက်ဖြစ်၏။ 18 ဥပမာဆိုသော် ဘုရားသခင်သည် အရေပြားလှီးခြင်းမင်္ဂလာကို ခံယူပြီးသောသူကို ရွေးကောက်တော်မူသောအခါ ထိုသူသည် အရေပြားလှီးခြင်းမင်္ဂလာကို ဖျောက်ဖျက်ရန် မလိုပေ။ ထိုနည်းတူ အရေပြားလှီးခြင်းမင်္ဂလာကို မခံယူသောသူကို ရွေးကောက်တော်မူသောအခါ ထိုသူသည် အရေပြားလှီးခြင်းမင်္ဂလာကို ခံယူရန် မလိုပေ။ 19 အဘယ်ကြောင့်ဆိုသော် အရေပြားလှီးခြင်းမင်္ဂလာကို ခံယူသည်ဖြစ်စေ မခံယူဘဲနေသည်ဖြစ်စေ ထိုအရာသည် အဓိကမကျ။ ဘုရားသခင်၏ ပညတ်တော်ကို လိုက်နာဆောင်ရွက်ခြင်းသည်သာ အဓိကကျ၏။ 20 လူတစ်ဦးစီတိုင်းသည် ဘုရားသခင် ရွေးကောက်တော်မူစဉ်က ရှိသည့်အခြေအနေမျိုး၌ ဆက်၍ ရှိနေသင့်၏။ 21 ဘုရားသခင် ရွေးကောက်တော်မူစဉ်က သင်သည် ကျွန်ဖြစ်နေပါကလည်း မပူပန်နှင့်။ သို့သော် ကျွန်အဖြစ်မှ လွတ်ခွင့်ရလျှင် ထိုအခွင့်အရေးကို ရယူလော့။ 22 ကျွန်ဖြစ်စဉ်က ဘုရားသခင် ရွေးကောက်တော်မူလျှင် ယခုသင်သည် သခင်ဘုရား၏ လွတ်လပ်သူဖြစ်၏။ လွတ်လပ်စဉ်က ဘုရားသခင် ရွေးကောက်တော်မူလျှင် ယခု သင်သည် ခရစ်တော်၏ ကျွန်ဖြစ်၏။ 23 ဘုရားသခင်သည် သင်တို့ကို အဖိုးအခပေး၍ ရွေးနုတ်ဝယ်ယူထားတော်မူသည်ဖြစ်သောကြောင့် လူတို့ထံ ကျွန်မခံကြနှင့်။ 24 ချစ်သော ညီအစ်ကိုမောင်နှမတို့… သင်တို့သည် ဘုရားသခင် ရွေးကောက်တော်မူစဉ်က ရှိသည့်အခြေအနေမျိုး၌ ဘုရားသခင်နှင့်အတူ ဆက်၍ ရှိနေသင့်၏။ 25 အိမ်ထောင်မပြုသေးသူများနှင့်ပတ်သက်၍ သခင်ဘုရားထံမှ လာသောပညတ်ကို ကျွန်ုပ်မရသော်လည်း သခင်ဘုရား၏ ကျေးဇူးတော်ကို ခံစားရသည့် ယုံကြည်ထိုက်သူတစ်ဦးအနေဖြင့် ကျွန်ုပ်၏ ထင်မြင်ချက်ကို ပေးပါမည်။ 26 လက်ရှိ အကျပ်အတည်းကြောင့် ဤအတိုင်း နေလျှင် အကောင်းဆုံးဖြစ်မည်ဟု ကျွန်ုပ်ယူဆပါ၏။ 27 သင်၌ ဇနီးရှိပါက ကွာရှင်းရန် မကြံစည်နှင့်။ ဇနီးမရှိပါက အိမ်ထောင်ပြုရန် မကြံစည်နှင့်။ 28 သို့သော် အိမ်ထောင်ပြုလျှင်လည်း ၎င်းသည် အပြစ်မဟုတ်ပါ။ အပျိုစင်တစ်ယောက်အိမ်ထောင်ပြုလျှင်လည်း အပြစ်မဟုတ်ပါ။ သို့ရာတွင် ဤကာလ၌ အိမ်ထောင်ပြုသူတို့သည် ဆင်းရဲဒုက္ခနှင့် ကြုံရမည်ဖြစ်၍ ကျွန်ုပ်သည် သင်တို့ကို ထိုဒုက္ခများမှ ကင်းလွတ်ရန် ပြောရခြင်းဖြစ်၏။ 29 ညီအစ်ကိုမောင်နှမတို့… ကျွန်ုပ်ဆိုလိုသည်မှာ ကျန်ရှိသောအချိန်သည် အလွန်တိုတောင်း၏။ ထို့ကြောင့် ယခုမှစ၍ ဇနီးရှိသောသူတို့သည် ဇနီးမရှိသောသူကဲ့သို့လည်းကောင်း၊ 30 ငိုကြွေးသောသူတို့သည် မငိုကြွေးသကဲ့သို့လည်းကောင်း၊ ဝမ်းမြောက်သောသူတို့သည် ဝမ်းမမြောက်သကဲ့သို့လည်းကောင်း၊ ဝယ်ယူသောသူတို့သည် ထိုဥစ္စာပစ္စည်းများကို မပိုင်ဆိုင်သကဲ့သို့လည်းကောင်း နေသင့်၏။ 31 လောကီနှင့်ဆိုင်သောအရာများကို သုံးစွဲသောသူတို့သည် ထိုအရာများကို မတွယ်တာသင့်။ အဘယ်ကြောင့်ဆိုသော် ဤလက်ရှိကမ္ဘာလောကပုံသဏ္ဌာန်သည် ကွယ်ပျောက်သွားတော့မည်ဖြစ်သောကြောင့်ပင်။ 32 ကျွန်ုပ်သည် သင်တို့အား စိုးရိမ်ပူပန်မှုနှင့် ကင်းလွတ်စေချင်၏။ အိမ်ထောင်မရှိသောယောက်ျားသည် သခင်ဘုရားကို မည်သို့ နှစ်သက်စေရမည်ကို တွေးတောလျက် သခင်ဘုရား၏ အမှုတော်ကို ဂရုစိုက်တတ်၏။ 33 သို့သော် အိမ်ထောင်ရှိသောယောက်ျားမှာမူ မိမိမယားကို မည်သို့ နှစ်သက်စေရမည်ကို တွေးတောလျက် လောကီဆိုင်ရာဝတ္တရားများကို ဂရုစိုက်တတ်၏။ 34 ထို့ကြောင့် သူသည် စိတ်နှစ်ခွဖြစ်နေတတ်၏။ ထိုနည်းတူ အိမ်ထောင်မရှိသောအမျိုးသမီး၊ သို့မဟုတ် အပျိုစင်သည် ခန္ဓာနှင့် စိတ်နှစ်ခုလုံး သန့်ရှင်းစေရန် သခင်ဘုရား၏ အမှုတော်ကို ဂရုစိုက်တတ်၏။ သို့သော် အိမ်ထောင်ရှိသောအမျိုးသမီးမှာမူ မိမိခင်ပွန်းအား မည်သို့ နှစ်သက်စေရမည်ကို တွေးတောလျက် လောကီဆိုင်ရာဝတ္တရားများကို ဂရုစိုက်တတ်၏။ 35 ဤသို့ ကျွန်ုပ်ပြောရသည်မှာ သင်တို့၏အကျိုးအတွက် ဖြစ်၏။ သင်တို့ကို ချုပ်ချယ်လိုသောကြောင့် မဟုတ်ပါ။ မှန်ကန်လျောက်ပတ်စွာ နေထိုင်၍ သင်တို့သည် ဘုရားသခင်၏ အမှုတော်ကို အာရုံမပျံ့လွင့်ဘဲ ထမ်းဆောင်နိုင်ရန်အတွက် ဤသို့ကျွန်ုပ်ပြောရခြင်း ဖြစ်၏။ 36 တစ်စုံတစ်ယောက်သည် သူနှင့် စေ့စပ်ထားသောမိန်းမပျိုကို အရွယ်လွန်စေလျှင် မသင့်တော်ဟု ထင်မှတ်၍ သူ၏ဆန္ဒကို မထိန်းချုပ်နိုင်လျှင် ဆန္ဒရှိသည့်အတိုင်း အိမ်ထောင်ပြုသင့်၏။ ထိုအရာသည် အပြစ်မဟုတ်ပါ။ 37 သို့သော် သူသည် အိမ်ထောင်မပြုရန် စိတ်ပိုင်းဖြတ်ထား၍ မပြုမနေရသဘောမျိုးလည်းမဟုတ်ဘဲ မိမိစိတ်ကို ထိန်းချုပ်နိုင်လျှင် ထိုသို့ အိမ်ထောင်မပြုဘဲနေရန် ဆုံးဖြတ်ခြင်းသည် ကောင်း၏။ 38 ထို့ကြောင့် မိမိနှင့် စေ့စပ်ထားသောမိန်းမပျိုကို လက်ထပ်သောသူသည် ကောင်းမွန်စွာပြု၏။ လက်မထပ်သောသူမှာမူ ပို၍ ကောင်းမွန်စွာပြု၏။ 39 ဇနီးသည် မိမိခင်ပွန်း အသက်ရှင်နေသမျှကာလပတ်လုံး ထိုခင်ပွန်းနှင့် နှောင်ဖွဲ့ထား၏။ ခင်ပွန်းကွယ်လွန်လျှင် မိမိနှစ်သက်သောသူနှင့် လက်ထပ်ခွင့်ရှိ၏။ သို့သော်လည်း ထိုသူသည် သခင်ဘုရားကို ယုံကြည်သောသူဖြစ်ရမည်။ 40 မည်သို့ပင်ဖြစ်စေ ကျွန်ုပ်၏ ထင်မြင်ချက်အရ သူသည် နောက်ထပ်အိမ်ထောင်မပြုဘဲနေလျှင် ပို၍ ကောင်း၏။ ဤသို့ ကျွန်ုပ်ပြောဆိုရာတွင် ဘုရားသခင်၏ ဝိညာဉ်တော်အားဖြင့် သင်တို့ကို အကြံပေးပြောဆိုခြင်းဖြစ်ကြောင်း ကျွန်ုပ်မှတ်ယူပါ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.