၁ ကော 16 - ခေတ်သစ်မြန်မာ သမ္မာကျမ်းဂျေရုဆလင်မြို့ရှိ အသင်းသားများအတွက် အလှူငွေကောက်ခံခြင်း 1 ဂျေရုဆလင်မြို့ရှိ ယုံကြည်သူများအတွက် အလှူငွေကောက်ခံခြင်းနှင့်ပတ်သက်၍ ဂလာတိပြည်ရှိ အသင်းတော်များကို ကျွန်ုပ်လမ်းညွှန်ထားသကဲ့သို့ သင်တို့သည်လည်း ထိုနည်းအတိုင်း ပြုကြလော့။ 2 ကျွန်ုပ်ရောက်လာသောအခါ အလှူငွေကောက်ခံစရာ မလိုစေရန် အပတ်တိုင်း၏ ပထမနေ့တွင် သင်တို့တစ်ဦးချင်းစီက ရရှိသောဝင်ငွေထဲမှ တချို့ကို ထုတ်၍ စုထားကြလော့။ 3 ကျွန်ုပ်ရောက်လာသောအခါ သင်တို့၏ အလှူငွေကို ဂျေရုဆလင်မြို့သို့ ယူဆောင်သွားရန် သင်တို့ရွေးချယ်သောသူတို့အား စာနှင့် လွှတ်လိုက်မည်။ 4 အကယ်၍ ကျွန်ုပ်ကိုယ်တိုင် သွားရန် လိုအပ်ပါက ကျွန်ုပ်သည် ထိုသူတို့နှင့်အတူ သွားမည်။ ပေါလု၏ နောက်ဆုံးညွှန်ကြားချက်များ 5 ကျွန်ုပ်သည် မာကေဒေါနိပြည်ကို ဖြတ်သွားရန် စီစဉ်ထားသောကြောင့် ထိုပြည်ကို ဖြတ်ပြီးမှ သင်တို့ထံ လာခဲ့မည်။ 6 ကျွန်ုပ်သည် သင်တို့နှင့်အတူ အတန်ကြာ နေကောင်းနေလိမ့်မည်။ ဆောင်းရာသီကာလပတ်လုံး နေရန်ပင် ဖြစ်နိုင်၏။ ထို့နောက်တွင်မူ ကျွန်ုပ် သွားရမည့် အရပ်သို့ သွားနိုင်ရန် သင်တို့ကူညီနိုင်ကြလိမ့်မည်ဟု မျှော်လင့်၏။ 7 အဘယ်ကြောင့်ဆိုသော် ကျွန်ုပ်သည် သင်တို့ထံ ယခု ခရီးကြုံ၍ လည်ပတ်ရုံသာ မပြုလိုပါ။ သခင်ဘုရား ခွင့်ပြုတော်မူလျှင် သင်တို့နှင့်အတူ ကာလအတန်ကြာ နေနိုင်ရန် ကျွန်ုပ်မျှော်လင့်ထား၏။ 8 ဤအတောအတွင်း ပင်တေကုတ္တေပွဲနေ့တိုင်အောင် ဧဖက်မြို့တွင် ကျွန်ုပ်နေပါမည်။ 9 ဤမြို့တွင် ထိရောက်စွာ အမှုတော်ဆောင်နိုင်ရန်အတွက် အခွင့်အရေးတံခါးကြီးသည် ပွင့်လျက်ရှိ၏။ ကျွန်ုပ်ကို ဆန့်ကျင်သောသူများလည်း ရှိကြ၏။ 10 သင်တို့ထံ တိမောသေ ရောက်လာလျှင် သူ့ကို မစိုးထိတ်စေနှင့်။ သူသည် ကျွန်ုပ်ကဲ့သို့ သခင်ဘုရား၏ အမှုတော်ကို ဆောင်ရွက်နေသူဖြစ်၏။ 11 မည်သူမျှ သူ့ကို မထီမဲ့မြင်မပြုစေနှင့်။ သူသည် ကျွန်ုပ်ထံသို့ စိတ်ချမ်းသာစွာ ပြန်လာနိုင်ရန် သင်တို့ကူညီပေးကြလော့။ ကျွန်ုပ်သည်လည်း သူ့ကို ယုံကြည်သူများနှင့်အတူ ရောက်လာမည်ကို စောင့်နေလျက်ရှိ၏။ 12 ယခု ကျွန်ုပ်ညီ အာပေါလုနှင့် ပတ်သက်၍ဆိုရလျှင် ကျွန်ုပ်သည် သူ့ကို အခြားယုံကြည်သူများနှင့်အတူ သင်တို့ထံသို့ အလည်လာရန် အလေးအနက်တိုက်တွန်းခဲ့၏။ သို့သော်လည်း သူသည် ယခု လာရန် ဆန္ဒမရှိ။ အခွင့်ကြုံသောအခါ သူလာရောက်လည်ပတ်ပါလိမ့်မည်။ 13 သတိဝီရိယရှိကြလော့။ ယုံကြည်ခြင်း၌ ခိုင်မြဲစွာ ရပ်တည်ကြလော့။ သတ္တိရှိကြလော့။ အားတင်းထားကြလော့။ 14 ပြုလေသမျှသောအရာတို့ကို မေတ္တာရှေ့ထား၍ ပြုကြလော့။ 15 ညီအစ်ကိုမောင်နှမတို့… သတေဖနာနှင့် သူ၏ အိမ်သူအိမ်သားတို့သည် ဂရိပြည်တွင် ပထမဆုံး ယုံကြည်သက်ဝင်လာကြသောသူများဖြစ်ပြီး ယုံကြည်သူများကို အစေခံရန် မိမိတို့ကိုယ်မိမိ ဆက်ကပ်ထားသူများဖြစ်ကြောင်း သင်တို့သိကြ၏။ 16 ထိုသို့ဆက်ကပ်ထားသော သူများမှစ၍ သူတို့နှင့်အတူ လုပ်ကိုင်လျက် ကြိုးစားအားထုတ်နေကြသောသူအားလုံး၏ ဦးဆောင်မှုကို လိုက်နာကြရန် သင်တို့ကို ကျွန်ုပ်တိုက်တွန်းနှိုးဆော်ပါ၏။ 17 သတေဖနာ၊ ဖော်တုနတ်နှင့် အခါယကုတို့ ရောက်လာကြသည်ကို ကျွန်ုပ်ဝမ်းမြောက်ပါ၏။ ထိုသူတို့သည် သင်တို့မတတ်နိုင်သောအရာကို ဖြည့်ဆည်းပေးကြ၏။ 18 သူတို့သည် ကျွန်ုပ်၏ စိတ်နှင့် သင်တို့၏ စိတ်ကို လန်းဆန်းစေကြ၏။ ထို့ကြောင့် ထိုသို့သောသူတို့ကို အသိအမှတ်ပြုကြလော့။ နိဂုံးချုပ်စကား 19 အာရှပြည်ရှိ အသင်းတော်များသည် သင်တို့ကို နှုတ်ဆက်လိုက်ပါ၏။ အာကုလနှင့် ပြစ်ကိလတို့မှစ၍ သူတို့အိမ်၌ စုဝေးကြသောအသင်းတော်သည် သခင်ဘုရားကို ထောက်၍ သင်တို့ကို လှိုက်လှဲစွာ နှုတ်ဆက်လိုက်ပါ၏။ 20 ဤအရပ်ရှိ ညီအစ်ကိုမောင်နှမများကလည်း သင်တို့ကို နှုတ်ဆက်လိုက်ပါ၏။ အချင်းချင်း တစ်ဦးကိုတစ်ဦး သန့်ရှင်းသောအနမ်းဖြင့် နှုတ်ဆက်ကြလော့။ 21 ကျွန်ုပ်ပေါလုကိုယ်တိုင် ဤနှုတ်ဆက်စကားကို မိမိလက်နှင့် ရေးလိုက်ပါ၏။ 22 မည်သူမဆို သခင်ဘုရားကို မချစ်လျှင် ထိုသူသည် ကျိန်ဆိုခြင်းကို ခံပါစေ။ သခင်ဘုရား ကြွလာတော်မူပါ။ 23 သခင်ယေရှုခရစ်တော်၏ ကျေးဇူးတော်သည် သင်တို့နှင့်အတူ ရှိပါစေ။ 24 ကျွန်ုပ်၏ ချစ်ခြင်းမေတ္တာသည် ယေရှုခရစ်တော်၌ သင်တို့အားလုံးနှင့်အတူ ရှိပါစေသော။ ကောရိန္သုဩဝါဒစာပထမစောင် ပြီးပါပြီ။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.