၁ ကော 15 - ခေတ်သစ်မြန်မာ သမ္မာကျမ်းခရစ်တော်ရှင်ပြန်ထမြောက်တော်မူခြင်း 1 ညီအစ်ကိုမောင်နှမတို့… ယခင်က ကျွန်ုပ်ဟောပြောခဲ့သော သတင်းကောင်းကို သင်တို့အား ပြန်၍ သတိရစေလို၏။ သင်တို့သည် ထိုသတင်းကောင်းကို ခံယူခဲ့ပြီး ထိုအပေါ်၌ မှီခိုအားထားခဲ့ကြ၏။ 2 ကျွန်ုပ်ဟောပြောခဲ့သော ထိုသတင်းကောင်းတရားကို သင်တို့ဆက်လက်၍ စွဲမြဲစွာ ယုံကြည်လျှင် ထိုသတင်းကောင်းအားဖြင့် သင်တို့သည် ကယ်တင်ခံကြရ၏။ ထိုသို့ မယုံကြည်လျှင် သင်တို့ ယုံကြည်ခဲ့သည်မှာ အချည်းနှီးဖြစ်၏။ 3 ကျွန်ုပ်ကိုယ်တိုင် ခံယူရရှိခဲ့သည့် အရေးကြီးဆုံးသောအရာကို သင်တို့အား ကျွန်ုပ်လက်ဆင့်ကမ်းခဲ့၏။ ထိုအရာမှာ ကျမ်းစာ၌ ဖော်ပြထားသည့်အတိုင်း ခရစ်တော်သည် ကျွန်ုပ်တို့၏ အပြစ်များအတွက် အသေခံတော်မူသည့်အကြောင်း၊ 4 သင်္ဂြိုဟ်ခြင်းကို ခံတော်မူပြီးနောက် ကျမ်းစာ၌ ဖော်ပြထားသည့်အတိုင်း သုံးရက်မြောက်သောနေ့၌ သေခြင်းမှ ရှင်ပြန်ထမြောက်တော်မူခဲ့သည့်အကြောင်း၊ 5 ပေတရုအား ကိုယ်ထင်ပြတော်မူပြီးမှ တမန်တော်ဆယ့်နှစ်ပါးတို့အား ပြတော်မူသည့်အကြောင်းတို့ဖြစ်၏။ 6 ထို့နောက် ယုံကြည်သောသူငါးရာကျော်တို့အား တစ်ချိန်တည်းတွင်ပင် ကိုယ်ထင်ပြတော်မူ၏။ ထိုသူတို့ထဲမှ တချို့သည် ကွယ်လွန်ကြပြီဖြစ်သော်လည်း အများစုမှာမူ သက်ရှိထင်ရှားနေဆဲဖြစ်ကြ၏။ 7 ထို့နောက် ယာကုပ်အား ကိုယ်ထင်ပြတော်မူ၏။ နောက်ပိုင်းတွင် တမန်တော်ရှိသမျှတို့အား ကိုယ်ထင်ပြတော်မူ၏။ 8 နောက်ဆုံးတွင် အချိန်မတန်ဘဲ မွေးလာသောသူကဲ့သို့ဖြစ်သည့် ကျွန်ုပ်အားလည်း ကိုယ်ထင်ပြတော်မူ၏။ 9 ကျွန်ုပ်သည် တမန်တော်ထဲတွင် အသေးနုပ်ဆုံးသောသူ ဖြစ်၏။ ဘုရားသခင်၏ အသင်းတော်ကို ညှဉ်းပန်းနှိပ်စက်ခဲ့သူဖြစ်သောကြောင့် တမန်တော်ဟု ပင် ခေါ်ဝေါ်ခြင်းကို မခံထိုက်ပါ။ 10 သို့ရာတွင် ဘုရားသခင်၏ ကျေးဇူးတော်ကြောင့် ကျွန်ုပ်သည် တမန်တော်ဖြစ်လာခဲ့၏။ ကျွန်ုပ်အပေါ် ထားရှိသော ကိုယ်တော်၏ ကျေးဇူးတော်သည်လည်း အချည်းနှီးမဖြစ်ဘဲ ကျွန်ုပ်သည် အခြားတမန်တော်များထက် သာ၍ လုပ်ဆောင်ရ၏။ ထိုသို့ လုပ်ဆောင်နိုင်ခြင်းမှာ ကျွန်ုပ်ကြောင့်မဟုတ်ဘဲ ကျွန်ုပ်နှင့်အတူ လုပ်ဆောင်သောဘုရားသခင်၏ ကျေးဇူးတော်ကြောင့်သာဖြစ်၏။ 11 ထို့ကြောင့် ကျွန်ုပ်ဟောပြောသည်ဖြစ်စေ၊ သူတို့ဟောပြောသည်ဖြစ်စေ ကျွန်ုပ်တို့ဟောပြောသောအကြောင်းအရာနှင့် သင်တို့ယုံကြည်ခဲ့ကြသော အကြောင်းအရာမှာ တစ်ခုတည်းဖြစ်၏။ သေလွန်သောသူတို့ ထမြောက်ခြင်း 12 ခရစ်တော်သည် သေခြင်းမှ ရှင်ပြန်ထမြောက်တော်မူပြီဟု ကျွန်ုပ်တို့ဟောပြောကြလျှင် သင်တို့ထဲမှ တချို့က သေလွန်သောသူတို့သည် မထမြောက်ကြပါဟု အဘယ်ကြောင့် ပြောဆိုကြသနည်း။ 13 သေလွန်သောသူတို့သည် ရှင်ပြန်ထမြောက်ခြင်းမရှိလျှင် ခရစ်တော်သည်လည်း ရှင်ပြန်ထမြောက်တော်မူခဲ့မည်မဟုတ်ပေ။ 14 ခရစ်တော် ရှင်ပြန်ထမြောက်တော်မမူခဲ့လျှင် ကျွန်ုပ်တို့၏ ဟောပြောခြင်းသည်လည်း အချည်းနှီးဖြစ်ပြီး သင်တို့၏ ယုံကြည်ခြင်းသည်လည်း အချည်းနှီးဖြစ်၏။ 15 အကယ်၍ သေလွန်သောသူတို့ မထမြောက်ဟူသော အရာသည် မှန်ခဲ့လျှင် ဘုရားသခင်သည် ခရစ်တော်ကို သေခြင်းမှ ရှင်ပြန်ထမြောက်စေတော်မူခဲ့မည်မဟုတ်ပေ။ သို့ဖြစ်လျှင် ကျွန်ုပ်တို့က “ဘုရားသခင်သည် ခရစ်တော်ကို ရှင်ပြန်ထမြောက်စေတော်မူပြီ” ဟု ပြောဆိုသောကြောင့် ကျွန်ုပ်တို့သည် ဘုရားသခင်အကြောင်းကို လိမ်လည်ပြောဆိုသူများဖြစ်သွားလိမ့်မည်။ 16 သေလွန်သောသူတို့ မထမြောက်လျှင် ခရစ်တော်သည်လည်း ရှင်ပြန်ထမြောက်တော်မူခဲ့မည် မဟုတ်ပေ။ 17 ခရစ်တော်သည် ရှင်ပြန်ထမြောက်တော်မမူခဲ့လျှင် သင်တို့၏ယုံကြည်ခြင်းသည် အချည်းနှီးဖြစ်၍ သင်တို့သည်လည်း အပြစ်၌ နစ်မွန်းလျက်ပင် ရှိနေကြဦးမည်ဖြစ်၏။ 18 ထိုသို့ဖြစ်လျှင် ခရစ်တော်ကို ယုံကြည်လျက် ကွယ်လွန်သွားသောသူတို့သည်လည်း ပျက်စီးကြပြီဖြစ်ပေမည်။ 19 အကယ်၍ ကျွန်ုပ်တို့အား ခရစ်တော်ပေးသော မျှော်လင့်ချက်သည် ဤဘဝအတွက်သာ ဖြစ်လျှင် ကျွန်ုပ်တို့သည် ဤကမ္ဘာပေါ်ရှိ လူအပေါင်းတို့ထဲမှ သနားစရာအကောင်းဆုံးသောသူများဖြစ်ပေမည်။ 20 အမှန်တွင်မူ ခရစ်တော်သည် သေခြင်းမှ ရှင်ပြန်ထမြောက်တော်မူ၍ သေလွန်သောသူတို့အနက် အဦးဆုံးရှင်ပြန်ထမြောက်သောသူ ဖြစ်တော်မူ၏။ 21 သို့ဖြစ်၍ လူတစ်ဦးကြောင့် သေခြင်းတရားရှိလာသကဲ့သို့ လူတစ်ဦးကြောင့် သေလွန်သောသူတို့ ပြန်ရှင်ခြင်းတရား ရှိလာ၏။ 22 လူအပေါင်းတို့သည် အာဒံကြောင့် သေဆုံးကြရသကဲ့သို့ လူအပေါင်းတို့သည် ခရစ်တော်ကြောင့် အသက်ပြန်ရှင်ခြင်းအခွင့်ကို ရကြလိမ့်မည်။ 23 သို့သော် ထမြောက်ခြင်းတွင် အလှည့်ကျရှိမည်ဖြစ်ပြီး ခရစ်တော်သည် အဦးဆုံးရှင်ပြန်ထမြောက်တော်မူ၏။ ထို့နောက် ခရစ်တော်နှင့်ဆိုင်သောသူတို့သည် ခရစ်တော် ပြန်လည်ကြွလာတော်မူသောအခါ ထမြောက်ကြလိမ့်မည်။ 24 ထို့နောက် ကမ္ဘာကုန်ဆုံးချိန်ရောက်လာလိမ့်မည်။ ထိုအခါ ကိုယ်တော်သည် အုပ်ချုပ်သူရှိသမျှ၊ တန်ခိုးနှင့် ဩဇာရှိသမျှတို့ကို ဖျက်ဆီး၍ နိုင်ငံတော်ကို ခမည်းတော်ဘုရားသခင်ထံသို့ ပြန်လည်ပေးအပ်တော်မူလိမ့်မည်။ 25 ခရစ်တော်သည် ရန်သူအားလုံးကို မိမိခြေဖဝါးတော်အောက်သို့ ချမထားမီတိုင်အောင် အုပ်စိုးရမည်ဖြစ်၏။ 26 နောက်ဆုံး ဖျက်ဆီးခံရမည့်ရန်သူမှာ သေခြင်းတရားဖြစ်၏။ 27 ကျမ်းစာ၌ “ဘုရားသခင်သည် အရာအားလုံးကို ကိုယ်တော်၏ ခြေဖဝါးအောက်၌ ချထားတော်မူပြီ” ဟု ဖော်ပြထား၏။ “အရာအားလုံးကို ချထားတော်မူပြီ” ဟု ဆိုရာတွင် ထိုအရာအားလုံးထဲ၌ ဘုရားသခင် မပါဝင်ပေ။ အဘယ်ကြောင့်ဆိုသော် ဘုရားသခင်သည် ခရစ်တော်အား အုပ်စိုးစေတော်မူသောအရှင် ဖြစ်သောကြောင့်ပင်။ 28 သားတော်သည် အရာအားလုံးကို အုပ်စိုးသောအခါ သားတော်ကိုယ်တိုင်သည်လည်း မိမိအား အရာအားလုံးကို အုပ်စိုးစေတော်မူသောဘုရားသခင်၏ အုပ်စိုးခြင်းကို ခံယူတော်မူလိမ့်မည်။ ဤသည်မှာ ဘုရားသခင်သည် အရာအားလုံးကို အုပ်စိုးတော်မူမည့်အကြောင်းဖြစ်၏။ 29 သေလွန်သောသူတို့ မထမြောက်လျှင် ထိုသူတို့အတွက် နှစ်ခြင်းမင်္ဂလာခံယူခြင်းသည် မည်သည့်အကျိုး ရှိသနည်း။ သေလွန်သောသူတို့ မထမြောက်လျှင် ထိုသူတို့အတွက် အဘယ်ကြောင့် နှစ်ခြင်းမင်္ဂလာကို ခံယူစရာအကြောင်း ရှိမည်နည်း။ 30 ကျွန်ုပ်တို့သည်လည်း အဘယ်ကြောင့် အန္တရာယ်နှင့် အစဉ်အမြဲရင်ဆိုင်နေရသနည်း။ 31 ညီအစ်ကိုမောင်နှမတို့… ကျွန်ုပ်တို့၏သခင် ယေရှုခရစ်တော်၌ သင်တို့အတွက် ကျွန်ုပ်ဂုဏ်ယူဝမ်းမြောက်သည်ကို တိုင်တည်၍ “ကျွန်ုပ်သည် နေ့စဉ်နေ့တိုင်း သေရ၏” ဟု ကျွန်ုပ်ဆို၏။ 32 ကျွန်ုပ်သည် လူ့သဘောဖြင့် ဧဖက်မြို့၌ သားရဲတိရစ္ဆာန်များနှင့် တိုက်ခိုက်ခဲ့မည်ဆိုလျှင် ကျွန်ုပ်အတွက် မည်သည့်အကျိုး ရှိမည်နည်း။ သေလွန်သောသူတို့ မထမြောက်လျှင် “ကျွန်ုပ်တို့သည် မနက်ဖြန် သေကြမည်ဖြစ်၍ စားသောက်လျက် နေကြစို့” ဟူ၍ ဆိုထားသည့်အတိုင်း ပြုကြစို့။ 33 အလှည့်စားမခံကြနှင့်။ မကောင်းသော အပေါင်းအသင်းတို့သည် ကောင်းသောစာရိတ္တကို ပျက်စီးစေကြ၏။ 34 အမြင်မှန်ရကြလော့။ ဆက်၍ အပြစ်မပြုနှင့်။ သင်တို့ထဲမှ တချို့သည် ဘုရားသခင်ကို လုံးဝမသိကြ။ သင်တို့အရှက်ရစေရန် ဤသို့ ကျွန်ုပ်ပြော၏။ ပြန်ရှင်လာသည့်ကိုယ်ခန္ဓာ 35 သို့သော် တစ်စုံတစ်ယောက်က သေလွန်သောသူတို့သည် မည်သို့ ပြန်ရှင်မည်နည်း။ မည်သို့သော ကိုယ်ခန္ဓာနှင့် ပေါ်လာကြမည်နည်းဟု မေးလိမ့်မည်။ 36 အို လူမိုက်… သင်စိုက်ပျိုးသော မျိုးစေ့သည် မပျက်လျှင် အပင်အဖြစ် ပေါက်လာမည်မဟုတ်။ 37 မျိုးစေ့ကို မြေ၌ သင်စိုက်ပျိုးသောအခါ နောင်ဖြစ်လာမည့် အပင်ကိုယ်ထည်တစ်ခုလုံးကို စိုက်ပျိုးသည်မဟုတ်ပါ။ ဂျုံ၊ သို့မဟုတ် အစေ့သက်သက်ကိုသာ စိုက်ပျိုး၏။ 38 ဘုရားသခင်သည် အလိုတော်ရှိသည့်အတိုင်း ထိုအစေ့အား ကိုယ်ထည်ကို ပေးတော်မူ၏။ မျိုးစေ့တစ်စေ့စီအား အမျိုးအစားအလိုက် ကိုယ်ထည်ကို ပေးတော်မူ၏။ 39 ထို့အတူ အသားရှိသမျှတို့သည် အသားတစ်မျိုးတစ်စားတည်းမဟုတ်ပေ။ ဆိုလိုသည်မှာ လူ၏ အသားတစ်မျိုး၊ တိရစ္ဆာန်၏ အသားတစ်မျိုး၊ ငှက်၏ အသားတစ်မျိုး၊ ငါး၏ အသားတစ်မျိုးဟူ၍ အသီးသီးရှိကြ၏။ 40 ထို့ပြင် ကောင်းကင်နှင့်ဆိုင်သော ဒြပ်များ၊ မြေကြီးနှင့်ဆိုင်သော ဒြပ်များဟူ၍ ရှိ၏။ ကောင်းကင်နှင့်ဆိုင်သော ဒြပ်များ၏ ဘုန်းအသရေသည် တစ်မျိုးဖြစ်၍ မြေကြီးနှင့်ဆိုင်သော ဒြပ်များ၏ဘုန်းအသရေသည် တစ်မျိုးဖြစ်၏။ 41 နေ၏ ဘုန်းအသရေသည် တစ်မျိုး၊ လ၏ ဘုန်းအသရေသည် တစ်မျိုး၊ ကြယ်များ၏ ဘုန်းအသရေသည် တစ်မျိုး အသီးသီးဖြစ်၏။ ကြယ်တစ်လုံးနှင့် တစ်လုံး၏ ဘုန်းအသရေသည်လည်း ကွဲပြားကြ၏။ 42 သေလွန်သောသူတို့ ပြန်ရှင်ခြင်းမှာလည်း ထိုနည်းအတိုင်းဖြစ်၏။ ကျွန်ုပ်တို့ သေဆုံးသောအခါ ကျွန်ုပ်တို့၏ ပုပ်ပျက်တတ်သောခန္ဓာသည် မြေ၌ စိုက်ပျိုးခြင်းခံရ၏။ သို့သော်လည်း ထမြောက်သောအခါ မပုပ်ပျက်နိုင်သောခန္ဓာအဖြစ် ရှိလိမ့်မည်။ 43 စိုက်ပျိုးသောအခါ ဂုဏ်အသရေပျက်၍ ထမြောက်သောအခါ ဂုဏ်သရေရှိလိမ့်မည်။ စိုက်ပျိုးသောအခါ အားနည်း၍ ထမြောက်သောအခါ အားကြီးလိမ့်မည်။ 44 ရုပ်ခန္ဓာအဖြစ် စိုက်ပျိုးခြင်းခံရ၍ ထမြောက်သောအခါ ဝိညာဉ်ခန္ဓာအဖြစ် ရှိလိမ့်မည်။ ရုပ်ခန္ဓာရှိလျှင် ဝိညာဉ်ခန္ဓာလည်း ရှိလိမ့်မည်။ 45 ကျမ်းစာ၌ “ပထမဆုံးလူအာဒံသည် အသက်ရှင်သောသူဖြစ်လာ၏” ဟု ရေးသားထား၏။ နောက်ဆုံးအာဒံသည် အသက်ရှင်စေသော ဝိညာဉ်ဖြစ်၏။ 46 ရုပ်ခန္ဓာသည် ဦးစွာ လာ၏။ ဝိညာဉ်ခန္ဓာသည် နောက်မှ လာ၏။ 47 ပထမဦးဆုံးလူသည် မြေကြီးက ဖြစ်လာသောကြောင့် မြေကြီးသားဖြစ်၏။ ဒုတိယလူမှာ ကောင်းကင်ဘုံမှ လာသောသူဖြစ်၏။ 48 မြေကြီး၌ ရှိသောသူတို့သည် မြေကြီးဖြင့် ဖန်ဆင်းထားသောသူနှင့် တူကြ၏။ ကောင်းကင်၌ ရှိသောသူတို့သည် ကောင်းကင်မှလာသောသူတို့နှင့် တူကြ၏။ 49 ကျွန်ုပ်တို့သည် ယခု မြေကြီးသား၏ ပုံသဏ္ဌာန်ကို ဆောင်သကဲ့သို့ နောင်တွင် ကောင်းကင်သား၏ ပုံသဏ္ဌာန်ကိုလည်း ဆောင်ကြလိမ့်မည်။ 50 ညီအစ်ကိုမောင်နှမတို့… ကျွန်ုပ်ဆိုလိုသည်မှာ အသွေးအသားဖြင့်ဖွဲ့စည်းထားသောလူ့ခန္ဓာသည် ဘုရားသခင်၏ နိုင်ငံတော်ကို အမွေမခံနိုင်ပေ။ ပုပ်ပျက်တတ်သောအရာသည် မပုပ်ပျက်နိုင်သောအဖြစ်ကို အမွေဆက်ခံနိုင်မည်မဟုတ်ပေ။ 51-52 သို့သော် လျှို့ဝှက်နက်နဲသောအရာကို သင်တို့အား ကျွန်ုပ်ပြောမည်။ ကျွန်ုပ်တို့အားလုံးသည် သေကြရမည်မဟုတ်။ နောက်ဆုံး တံပိုးမှုတ်သောအခါ တစ်ခဏချင်းမျက်စိတစ်မှိတ်အတွင်းတွင် ကျွန်ုပ်တို့အားလုံးသည် ပြောင်းလဲကြလိမ့်မည်။ အဘယ်ကြောင့်ဆိုသော် တံပိုးမှုတ်သောအခါ သေလွန်သောသူတို့သည် မပုပ်ပျက်သောအရာအဖြစ် ထမြောက်မည်ဖြစ်သောကြောင့်ပင်။ အသက်ရှင်လျက်ရှိသော ကျွန်ုပ်တို့သည်လည်း ပြောင်းလဲကြလိမ့်မည်။ 53 အဘယ်ကြောင့်ဆိုသော် ကျွန်ုပ်တို့၏ ပုပ်ပျက်တတ်သောခန္ဓာသည် မပုပ်ပျက်နိုင်သောခန္ဓာအဖြစ်သို့ ပြောင်းလဲရမည်ဖြစ်ပြီး ကျွန်ုပ်တို့၏ သေတတ်သောခန္ဓာသည် မသေနိုင်သောခန္ဓာအဖြစ်သို့ ပြောင်းလဲရမည်ဖြစ်သောကြောင့်ပင်။ 54 ပုပ်ပျက်တတ်သောခန္ဓာသည် မပုပ်ပျက်နိုင်သောခန္ဓာအဖြစ်သို့ လည်းကောင်း၊ သေတတ်သောခန္ဓာသည် မသေနိုင်သောခန္ဓာအဖြစ်သို့လည်းကောင်း ပြောင်းလဲလာသောအခါ “သေခြင်းတရားသည် အောင်မြင်ခြင်း၌ နစ်မြုပ်လေပြီ” ဟု ရေးထားသောကျမ်းအတိုင်း ဖြစ်လာလိမ့်မည်။ 55 “အို သေမင်း… သင်၏ အောင်မြင်ခြင်းသည် အဘယ်မှာနည်း။ အို သေမင်း… သင်၏ အစွယ်သည် အဘယ်မှာနည်း။” 56 သေမင်း၏ အစွယ်သည် အပြစ်ဖြစ်၏။ အပြစ်သည် ပညတ်တရားမှ တန်ခိုးကို ရရှိ၏။ 57 ကျွန်ုပ်တို့၏သခင် ယေရှုခရစ်တော်အားဖြင့် ကျွန်ုပ်တို့အား အောင်မြင်စေတော်မူသော ဘုရားသခင်ကို ကျေးဇူးတင်ပါ၏။ 58 ထို့ကြောင့် ချစ်သော ညီအစ်ကိုမောင်နှမတို့… မြဲမြံစွာ ရပ်တည်၍ မရွေ့လျားမပြောင်းလဲကြနှင့်။ ဘုရားသခင်အတွက် သင်တို့ လုပ်ဆောင်သမျှသည် အချည်းနှီးမဖြစ်ကြောင်း သင်တို့သိကြသည့်အတိုင်း ဘုရားသခင်အတွက် အစဉ်အမြဲ စိတ်အားထက်သန်စွာ လုပ်ဆောင်ကြလော့။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.