၁ ကော 10 - ခေတ်သစ်မြန်မာ သမ္မာကျမ်းအစ္စရေးလူမျိုးတို့၏ ရုပ်တုကိုးကွယ်ခြင်းမှ ရရှိသော သင်ခန်းစာ 1 ညီအစ်ကိုမောင်နှမတို့… တောကန္တာရ၌ ကျွန်ုပ်တို့၏ ဘိုးဘေးများကြုံတွေ့ခဲ့ရသောအဖြစ်အပျက်များကို သင်တို့မသိနားမလည်ဘဲ မနေစေလိုပါ။ သူတို့အားလုံးသည် ဘုရားသခင်စေလွှတ်သော မိုးတိမ်အောက်၌ ခရီးပြုခဲ့ကြပြီး ပင်လယ်၏ အလယ်၌ ဖြတ်လျှောက်ခဲ့ကြ၏။ 2 သူတို့အားလုံးသည် မိုးတိမ်နှင့် ပင်လယ်ထဲ၌ မောရှေ၏ တပည့်များအဖြစ် နှစ်ခြင်းမင်္ဂလာကို ခံယူခဲ့ကြ၏။ 3 သူတို့အားလုံးသည် တူညီသော ဓမ္မအစာကို စားခဲ့ကြပြီး 4 တူညီသော ဓမ္မရေကို သောက်ခဲ့ကြ၏။ သူတို့အားလုံးသည် သူတို့နှင့်အတူ ခရီးပြုသော ဓမ္မကျောက်မှ ရေကို သောက်ခဲ့ကြ၏။ ထိုကျောက်မှာ ခရစ်တော်ပင်ဖြစ်၏။ 5 သို့သော်လည်း ဘုရားသခင်သည် သူတို့ထဲမှ အများစုကို အားရနှစ်သက်တော်မမူခဲ့ပေ။ ထို့ကြောင့် သူတို့သည် တောကန္တာရ၌ သေကျေပျက်စီးခဲ့ကြရ၏။ 6 ဤအကြောင်းအရာများမှာ ကျွန်ုပ်တို့သည် သူတို့ကဲ့သို့ မကောင်းသောအရာများကို မတပ်မက်ကြစေရန် ကျွန်ုပ်တို့အတွက် သင်ခန်းစာများဖြစ်၏။ 7 ကျမ်းစာ၌ “လူတို့သည် ထိုင်၍ စားသောက်ကြ၏။ တစ်ဖန် ထ၍ ကခုန်မြူးထူး၍ မွေ့လျော်ကြ၏” ဟု ဖော်ပြထားသည့်အတိုင်း သင်တို့သည် ထိုသူတို့အထဲမှတချို့ကဲ့သို့ ရုပ်တုကိုးကွယ်သူများ မဖြစ်ကြနှင့်။ 8 ထိုသူတို့ထဲမှ တချို့သည် လိင်မှုကျူးလွန်သကဲ့သို့ ကျွန်ုပ်တို့သည် မကျူးလွန်ဘဲနေကြကုန်စို့။ ထိုသို့ သူတို့သည် လိင်မှုကျူးလွန်ကြသောကြောင့် တစ်နေ့အတွင်း လူနှစ်သောင်းသုံးထောင် သေကြရ၏။ 9 ထိုသူတို့ထဲမှ အချို့သောသူတို့သည် ခရစ်တော်ကို အကဲစမ်းသကဲ့သို့ ကျွန်ုပ်တို့သည် အကဲမစမ်းဘဲနေကြကုန်စို့။ ထိုသူတို့သည် အကဲစမ်းသောကြောင့် မြွေကိုက်၍ သေကြ၏။ 10 ထိုသူတချို့ ညည်းညူသကဲ့သို့ မညည်းညူကြနှင့်။ ထိုသူတို့သည် ညည်းညူသောကြောင့် သေမင်းတမန်၏ လက်ချက်ဖြင့် သေကျေပျက်စီးခဲ့ကြ၏။ 11 သူတို့၌ ဖြစ်ပျက်ခဲ့သည့် ဤအခြင်းအရာများသည် ကျွန်ုပ်တို့အတွက် သင်ခန်းစာများဖြစ်၏။ ထိုအကြောင်းအရာများကို ရေးသားရခြင်းမှာ ကမ္ဘာကုန်ဆုံးရန် နီးချိန်တွင် အသက်ရှင်ကြသော ကျွန်ုပ်တို့ကို သတိပေးရန်အတွက်ဖြစ်၏။ 12 ထို့ကြောင့် မိမိကိုယ်ကိုယ် ခိုင်ခံ့စွာ ရပ်နေသည်ဟု ထင်လျှင် မလဲကျစေရန် သတိပြုပါ။ 13 သင်တို့ဘဝတွင် ကြုံတွေ့ရသော စုံစမ်းနှောင့်ယှက်မှုများသည် အခြားသူများ ကြုံတွေ့ရသောစုံစမ်းနှောင့်ယှက်မှုများနှင့် မခြားနားပါ။ ဘုရားသခင်သည် သစ္စာရှိတော်မူသည်ဖြစ်၍ သင်တို့ ခံနိုင်သည်ထက် ပိုသော စုံစမ်းနှောင့်ယှက်ခြင်းကို သင်တို့အား ခံစေတော်မူမည်မဟုတ်။ စုံစမ်းနှောင့်ယှက်ခြင်းကို သင်တို့ကြုံတွေ့ရသောအခါ ဘုရားသခင်သည် သင်တို့ခံနိုင်ရန်အတွက် လွတ်မြောက်မည့်လမ်းကို ပြင်ဆင်ပေးတော်မူလိမ့်မည်။ 14 ထို့ကြောင့် ချစ်ရသောသူတို့… ရုပ်တုကိုးကွယ်ခြင်းကို ရှောင်ကြဉ်ကြလော့။ 15 သင်တို့သည် ဆင်ခြင်တုံတရားရှိသောသူများ ဖြစ်ကြ၏။ ကျွန်ုပ်ပြောဆိုသောအရာ မှားသည်မှန်သည်ကို သင်တို့ကိုယ်တိုင် သုံးသပ်ကြလော့။ 16 ကောင်းချီးမင်္ဂလာခွက်ကို ကျွန်ုပ်တို့ကောင်းချီးပေး၍ သောက်သည်မှာ ခရစ်တော်၏ အသွေးတော်ကို မျှဝေခံယူကြခြင်းဖြစ်သည် မဟုတ်လော။ မုန့်ကို ဖဲ့၍ စားသည်မှာ ခရစ်တော်၏ ကိုယ်ခန္ဓာကို မျှဝေခံယူကြခြင်းဖြစ်သည် မဟုတ်လော။ 17 ကျွန်ုပ်တို့သည် အများဖြစ်သော်လည်း ကိုယ်ခန္ဓာတစ်ခုတည်းဖြစ်သည်ကို ပြသရန် မုန့်တစ်လုံးတည်းကို မျှစားကြ၏။ 18 အစ္စရေးလူမျိုးတို့ကို ကြည့်ရှုဆင်ခြင်ကြလော့။ ယဇ်ပလ္လင်တွင် ပူဇော်ထားသော ယဇ်ကောင်ကို စားသောသူတို့သည် ယဇ်ပလ္လင်တွင် ပူဇော်ခြင်း၌ ပါဝင်ပတ်သက်ကြသည်မဟုတ်လော။ 19 သို့ဖြစ်လျှင် မည်သည့်အရာကို ကျွန်ုပ် ဆိုလိုသနည်း။ ရုပ်တုအား ပူဇော်ထားသောအစားအစာသည် အရေးပါသည်ဟု ဆိုလိုသလော။ ထိုရုပ်တုများသည် အရေးပါသည်ဟု ဆိုလိုသလော။ 20 ထိုသို့ မဆိုလိုပါ။ ဘုရားသခင်ကို မကိုးကွယ်သောသူတို့ ပူဇော်သောယဇ်များသည် ဘုရားသခင်အား ပူဇော်သောယဇ်မဟုတ်ဘဲ နတ်ဆိုးတို့အား ပူဇော်သောယဇ်သာ ဖြစ်ကြောင်းကို ကျွန်ုပ်ဆိုလို၏။ ကျွန်ုပ်သည် သင်တို့ကို နတ်ဆိုးများနှင့် မပတ်သက်စေလိုပါ။ 21 သင်တို့သည် သခင်ဘုရား၏ ခွက်ကို သောက်လျှင် နတ်ဆိုးတို့၏ ခွက်ကို သောက်၍ မရပေ။ သင်တို့သည် သခင်ဘုရား၏စားပွဲ၌ စားလျှင် နတ်ဆိုးတို့၏ စားပွဲ၌ စား၍ မရပေ။ 22 ကျွန်ုပ်တို့သည် သခင်ဘုရားကို သဝန်တိုစေဝံ့သလော။ ကျွန်ုပ်တို့သည် သခင်ဘုရားထက် တန်ခိုးကြီးသလော။ 23 သင်တို့က “ငါ၌ မည်သည့်အရာကိုမဆို လုပ်ပိုင်ခွင့်ရှိသည်” ဟု ဆိုကြ၏။ သို့သော် အရာတိုင်းသည် သင်တို့အတွက် ကောင်းသည်မဟုတ်။ သင်တို့က “ငါ၌ မည်သည့်အရာကိုမဆို လုပ်ပိုင်ခွင့်ရှိသည်” ဟု ဆိုကြ၏။ သို့သော် အရာအားလုံးသည် အကျိုးရှိစေသည်မဟုတ်။ 24 မည်သူမျှ ကိုယ်ကျိုးကို မရှာစေနှင့်။ သူတစ်ပါးအကျိုးကိုသာ ရှာစေ။ 25 ဈေး၌ ရောင်းသမျှသောအသားကို လိပ်ပြာသန့်သန့်ဖြင့် မစစ်ဆေးမမေးမြန်းဘဲ စားကြလော့။ 26 အဘယ်ကြောင့်ဆိုသော် ကျမ်းစာ၌ “ဤကမ္ဘာလောကနှင့် ကမ္ဘာပေါ်၌ ရှိသမျှသောအရာတို့ကို ထာဝရဘုရား ပိုင်တော်မူ၏” ဟု ဖော်ပြထားသောကြောင့် ဖြစ်၏။ 27 မယုံကြည်သောသူတစ်ယောက်က ညစာစားရန် ဖိတ်ခေါ်လျှင် သင်တို့သွားလိုပါက သွားကြလော့။ ကျွေးမွေးသမျှကိုလည်း လိပ်ပြာသန့်သန့်ဖြင့် မစစ်ဆေးမမေးမြန်းဘဲ စားကြလော့။ 28 အကယ်၍ တစ်စုံတစ်ယောက်က ဤအစားအစာသည် ရုပ်တုကို ပူဇော်ထားသောအရာဖြစ်၏ဟု ပြောလျှင် ထိုသို့ပြောသောသူအတွက်လည်းကောင်း၊ အသိစိတ်ကိုလည်းကောင်း ငဲ့ရမည်ဖြစ်သောကြောင့် မစားကြနှင့်။ 29 အသိစိတ်ဟု ဆိုရာတွင် သင်တို့၏ အသိစိတ်ကို မဆိုလို။ အခြားသူ၏ အသိစိတ်ကို ဆိုလို၏။ ကျွန်ုပ်၏ လွတ်လပ်ခွင့်သည် အခြားသူတစ်ယောက်၏ အသိစိတ်အားဖြင့် အဘယ်ကြောင့် အပြစ်တင်ခံရမည်နည်း။ 30 အကယ်၍ ကျွန်ုပ်သည် စားသုံးရသောအစာအတွက် ဘုရားသခင်ကို ကျေးဇူးတင်လျှင် ထိုသို့ကျေးဇူးတင်၍ စားသုံးရသောအစာအတွက် အဘယ်ကြောင့် ရှုတ်ချပြောဆိုခံရမည်နည်း။ 31 ထို့ကြောင့် သင်တို့သည် စားသည်ဖြစ်စေ၊ သောက်သည်ဖြစ်စေ၊ တစ်စုံတစ်ရာကို ပြုလုပ်သည်ဖြစ်စေ အရာအားလုံးကို ဘုရားသခင်၏ ဘုန်းတော်အတွက် ပြုကြလော့။ 32-33 ကျွန်ုပ်သည် လူများစွာ ကယ်တင်ခံရစေလိုသောကြောင့် ကိုယ်ကျိုးကိုမရှာဘဲ အများအကျိုးကိုသာ ရှာလျက် လုပ်ဆောင်လေရာရာတွင် လူတိုင်း၏ ကျေနပ်နှစ်သက်မှုကို ရစေရန် ကြိုးစား၏။ သင်တို့သည်လည်း ကျွန်ုပ်ကဲ့သို့ ပြုကြလော့။ ဂျူးလူမျိုး၊ လူမျိုးခြား၊ ဘုရားသခင်၏အသင်းတော် စသည်တို့ကို ထိမိ၍ လဲစရာ မဖြစ်စေရန် ကြိုးစားကြလော့။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.