ဧဖက် 6 - ခေတ်သစ်မြန်မာ သမ္မာကျမ်းသားသမီးများနှင့် မိဘများ 1 သားသမီးတို့… သခင်ဘုရား၏ အလိုတော်နှင့်အညီ မိဘစကားကို နားထောင်ကြလော့။ မိဘစကားကို နားထောင်ခြင်းသည် ပြုအပ်သောဝတ် ဖြစ်၏။ 2-3 ကျမ်းစာ၌ “မိဘကို ရိုသေလော့။ ထိုသို့ ပြုလျှင် သင်သည် ကမ္ဘာမြေပေါ်၌ ကောင်းစား၍ အသက်ရှည်လိမ့်မည်” ဟု ဖော်ပြထားပြီး ဤပညတ်သည် ကတိတော် ပါသော ပထမ ပညတ်တော် ဖြစ်၏။ 4 ဖခင်တို့… သင်တို့၏ သားသမီးများကို စိတ်မဆိုးစေကြနှင့်။ သခင်ဘုရား၏ အလိုတော်နှင့် ညီသော ဆုံးမသွန်သင်ခြင်းဖြင့် ပြုစုပျိုးထောင်ကြလော့။ ကျွန်များနှင့် သခင်များ 5 ကျွန်ဖြစ်သူတို့… သင်တို့သည် ခရစ်တော်ကို နာခံသကဲ့သို့ သင်တို့၏ လောကီသခင်တို့ကို ကြောက်ရွံ့ရိုသေလျက် ရိုးသားသောစိတ်နှင့် နာခံကြလော့။ 6 မျက်နှာသာရရန်အတွက် သူတို့ရှေ့၌သာ နာခံသည် မဟုတ်ဘဲ ခရစ်တော်၏ ကျွန်များကဲ့သို့ ဘုရားသခင်၏ အလိုတော်အတိုင်း စိတ်ရောကိုယ်ပါ နာခံကြလော့။ 7 လူတို့ကို အစေခံသကဲ့သို့ မဟုတ်ဘဲ သခင်ဘုရားကို အစေခံသကဲ့သို့ စိတ်ပါလက်ပါ အစေခံကြလော့။ 8 ကျွန်ဖြစ်စေ၊ လွတ်လပ်သူဖြစ်စေ ကောင်းမှု ပြုသောသူတိုင်းသည် သခင်ဘုရားထံမှ အကျိုးခံစားရမည် ဖြစ်ကြောင်း သိမှတ်ကြလော့။ 9 သခင်ဖြစ်သူတို့… သင်တို့သည်လည်း ကျွန်များကို ထိုနည်းတူ ကောင်းမွန်စွာ ဆက်ဆံကြလော့။ သူတို့ကို မခြိမ်းခြောက်ကြနှင့်။ သင်တို့နှင့် သင်တို့ကျွန်များ၏ သခင်သည် ကောင်းကင်ဘုံတွင် ရှိတော်မူကြောင်းနှင့် ထိုသခင်သည် မျက်နှာမလိုက်တတ်ကြောင်းကို သိမှတ်ကြလော့။ ဘုရားသခင်၏ လက်နက်စုံ 10 နိဂုံးချုပ်အားဖြင့် ဆိုရလျှင် သင်တို့သည် သခင်ဘုရားအားဖြင့်လည်းကောင်း၊ ကိုယ်တော်၏ သာလွန်ထူးကဲသောတန်ခိုးတော်အားဖြင့်လည်းကောင်း ကြံ့ခိုင်ကြလော့။ 11 မာရ်နတ်၏ စစ်ဆင်ခြင်းကို ခုခံကာကွယ်နိုင်ရန် ဘုရားသခင် ပြင်ဆင်တော်မူသော လက်နက်စုံကို ဝတ်ဆင်ကြလော့။ 12 အဘယ်ကြောင့်ဆိုသော် ကျွန်ုပ်တို့သည် အသွေးအသား ရှိသောသူတို့နှင့် ရင်ဆိုင်တိုက်ခိုက်နေကြသည် မဟုတ်။ ကောင်းကင်အရပ်ရှိ ဝိညာဉ်ဆိုးများ၊ အမှောင်လောကကို အစိုးရသောမင်းများ၊ အုပ်ချုပ်သူများ၊ အာဏာရှိသူများနှင့် ရင်ဆိုင်တိုက်ခိုက်နေကြခြင်း ဖြစ်၏။ 13 ထို့ကြောင့် ဘုရားသခင်၏ လက်နက်စုံကို ဝတ်ဆင်ကြလော့။ သို့ပြုလျှင် ထိုဆိုးသော နေ့ရက်ကာလ၌ သင်တို့သည် ခုခံကာကွယ်နိုင်၍ တိုက်ပွဲ ပြီးဆုံးသောအခါ၌လည်း ရပ်တည်နိုင်ဆဲ ဖြစ်လိမ့်မည်။ 14 သို့ဖြစ်၍ သမ္မာတရားဟူသော ခါးစည်းကို စည်းလျက်၊ ဖြောင့်မတ်ခြင်းဟူသော ရင်အုပ်ကာချပ်ဝတ်ကို ဝတ်ဆင်လျက်၊ 15 ငြိမ်းချမ်းခြင်းသတင်းကောင်းကို ဟောပြောရန် အသင့်ရှိခြင်း ဟူသော ဖိနပ်ကို စီးလျက် ရပ်တည်ကြလော့။ 16 ဤအရာအားလုံးအပြင် ယုံကြည်ခြင်းဒိုင်းလွှားကိုလည်း ကိုင်ဆောင်ကြလော့။ ထိုဒိုင်းလွှားဖြင့် မာရ်နတ်၏ မီးမြားအားလုံးကို ငြှိမ်းသတ်နိုင်၏။ 17 ကယ်တင်ခြင်း သံခမောက်ကို ဆောင်းကြလော့။ ဘုရားသခင်၏ နှုတ်ကပတ်တော် ဖြစ်သော ဝိညာဉ်တော်၏ ဓားကိုလည်း ကိုင်ဆောင်ကြလော့။ 18 အမျိုးမျိုးသော ဆုတောင်းခြင်းနှင့် အသနားခံခြင်းတို့ဖြင့် ဝိညာဉ်တော် ညွှန်ကြားတော်မူသည့်အတိုင်း အချိန်အခါတိုင်းတွင် ဆုတောင်းကြလော့။ ထိုသို့ ဆုတောင်းနိုင်ရန် နိုးနိုးကြားကြား နေ၍ ယုံကြည်သူအပေါင်းတို့အတွက် ဇွဲမလျှော့ဘဲ ဆုတောင်းကြလော့။ 19 ဘုရားသခင်သည် ကျွန်ုပ် ပြောဆိုသည့်အခါတိုင်း ပြောရမည့်စကားကို ကျွန်ုပ်အား ပေးတော်မူ၍ ကျွန်ုပ်က သတင်းကောင်း၏ နက်နဲသောအရာကို ရဲဝံ့စွာ ပြောပြနိုင်ရန် ကျွန်ုပ်အတွက်လည်း ဆုတောင်းပေးကြလော့။ 20 ကျွန်ုပ်သည် ထိုသတင်းကောင်းအတွက် အကျဉ်းချခံရသော သံတမန် ဖြစ်၏။ သို့သော်လည်း ကျွန်ုပ် ဟောပြောသင့်သည့်အတိုင်း ရဲဝံ့စွာ ဟောပြောနိုင်ရန် ဆုတောင်းကြလော့။ ရှင်ပေါလု၏ နှုတ်ဆက်စကား 21 သခင်ဘုရားအတွက် သစ္စာရှိစွာ အမှုဆောင်သော အစေခံ ဖြစ်သူ၊ ကျွန်ုပ်၏ ချစ်ခင်ရသောညီ တုခိတ်က ကျွန်ုပ် မည်သို့ ဖြစ်ပြီး မည်သည့်အရာများ လုပ်ဆောင်နေသည်ကို သင်တို့ သိနိုင်ရန် သင်တို့ကို အရာအားလုံး ပြောပြလိမ့်မည်။ 22 ထိုသို့ ကျွန်ုပ်တို့၏ အခြေအနေကို သင်တို့ သိစေရန်နှင့် သူသည် သင်တို့ကို စိတ်ခွန်အားပေးရန် သူ့ကို သင်တို့ထံ ကျွန်ုပ် စေလွှတ်လိုက်ပါ၏။ 23 ခမည်းတော်ဘုရားသခင်နှင့် သခင်ယေရှုခရစ်တော်ထံမှ ငြိမ်းချမ်းခြင်း၊ ချစ်ခြင်း၊ ယုံကြည်ခြင်းတို့သည် ညီအစ်ကိုမောင်နှမတို့အပေါ် သက်ရောက်ပါစေသော။ 24 ကျွန်ုပ်တို့၏သခင် ယေရှုခရစ်တော်ကို မပျက်ပြယ်သော ချစ်ခြင်းဖြင့် ချစ်သောသူအပေါင်းတို့သည် ဘုရားသခင်၏ကျေးဇူးတော်ကို ခံစားရပါစေသော။ ဧဖက်ဩဝါဒစာ ပြီးပါပြီ။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.