ဟေဗြဲ 9 - ခေတ်သစ်မြန်မာ သမ္မာကျမ်းဝတ်ပြုခြင်းဆိုင်ရာ စည်းမျဉ်းဟောင်းများ 1 ဘုရားသခင်၏ ပထမပဋိညာဉ်၌ ဝတ်ပြုခြင်းနှင့်ဆိုင်သော စည်းမျဉ်းများနှင့် လောကနှင့်ဆိုင်သော သန့်ရှင်းရာဌာနတော် ပါရှိ၏။ 2 တဲတော်တွင် အခန်းနှစ်ခန်း ပါရှိပြီး ပထမအခန်းတွင် ဆီမီးတိုင်နှင့် သန့်ရှင်းသောမုန့်များတင်ထားသည့် စားပွဲရှိ၏။ ဤအခန်းကို သန့်ရှင်းသောဌာနတော်ဟု ခေါ်၏။ 3 ထို့နောက် ကန့်လန့်ကာ တစ်ခုရှိပြီး ထိုကန့်လန့်ကာနောက်တွင် အသန့်ရှင်းဆုံးဌာနတော် ဟု ခေါ်သော ဒုတိယအခန်းရှိ၏။ 4 ထိုအခန်းအတွင်း၌ နံ့သာပေါင်းကို မီးရှို့ရာ ရွှေယဇ်ပလ္လင်နှင့် ရွှေဖြင့်မွမ်းမံထားသော ပဋိညာဉ်သေတ္တာရှိ၏။ ထိုသေတ္တာအတွင်း၌ မန္နမုန့်ထည့်ထားသော ရွှေအိုး၊ အဖူးအညွှန့်ထွက်နေသော အာရုန်၏တောင်ဝှေးနှင့် ပဋိညာဉ်ကျောက်ပြားနှစ်ပြား ပါရှိ၏။ 5 ထိုသေတ္တာပေါ်တွင် ဘုန်းအသရေရှိသောခေရုဗိမ်တို့သည် တောင်ပံများဖြန့်လျက် အပြစ်ဖြေရာပလ္လင်ကို အုပ်မိုးထား၏။ သို့သော် ယခုအခါတွင် ဤအရာများကို အသေးစိတ် ပြော၍ မရပေ။ 6 ဤအရာများကို ပြင်ဆင်ပြီးသောအခါ ယဇ်ပုရောဟိတ်တို့သည် ဝတ်ပြုခြင်းအမှုများကို ဆောင်ရွက်ရန် ပထမအခန်းထဲသို့ အစဉ်ဝင်ကြရ၏။ 7 ဒုတိယအခန်းထဲသို့မူ ယဇ်ပုရောဟိတ်မင်းကြီး တစ်ပါးတည်းကသာ တစ်နှစ်လျှင် တစ်ကြိမ်တည်းဝင်ရ၏။ ထိုသို့ဝင်သောအခါ မိမိ၏အပြစ်များနှင့် လူတို့၏ မသိနားမလည်ဘဲကျူးလွန်မိသောအပြစ်များအတွက် သွေးကို ယူဆောင်၍ ပူဇော်ရ၏။ 8 ဤစည်းမျဉ်းအရ တဲတော်၏ ပထမအခန်း တည်ရှိနေသရွေ့ အသန့်ရှင်းဆုံးဌာနတော်ဖြစ်သည့် ဒုတိယအခန်းသို့ ဝင်သည့်လမ်း မပွင့်သေးကြောင်းကို သန့်ရှင်းသောဝိညာဉ်တော်က ဖော်ပြတော်မူ၏။ 9 ဤအခြင်းအရာတို့သည် မျက်မှောက်ခေတ်ကို ဖော်ညွှန်းသည့် ပုံဥပမာဖြစ်၏။ ယဇ်ပုရောဟိတ်များ ပူဇော်သည့် ထိုအပြစ်ဖြေရာယဇ်များနှင့် ပူဇော်စရာများက ဝတ်ပြုသူတို့အား မိမိတို့ ပြီးပြည့်စုံပြီဟူ၍ လိပ်ပြာသန့်သန့်ခံယူစေနိုင်စွမ်းမရှိကြပေ။ 10 ထိုအရာတို့သည် အစားအသောက်များ၊ အမျိုးမျိုးသော စင်ကြယ်စေခြင်းဝတ်များဖြစ်၍ အပြင်ပိုင်းနှင့်ဆိုင်သော စည်းမျဉ်းများသာ ဖြစ်ကြ၏။ ၎င်းတို့သည် အသစ်ပြုပြင်တော်မူမည့်အချိန်အထိသာ တည်ရှိကြရ၏။ ပြီးပြည့်စုံသော ယဇ်ဖြစ်သည့် ခရစ်တော် 11 ခရစ်တော်သည် ယခု ကျွန်ုပ်တို့ခံစားရသည့် ကောင်းကျိုးများနှင့်သက်ဆိုင်သော ယဇ်ပုရောဟိတ်မင်းအဖြစ် ကြွလာတော်မူပြီ။ ကိုယ်တော်သည် ဤကမ္ဘာလောကရှိ လူတို့လက်ဖြင့် ပြုလုပ်သော တဲတော်ထက် ပို၍ ကြီးမြတ်ပြည့်စုံသည့် ကောင်းကင်ဘုံရှိ တဲတော်သို့ ဝင်တော်မူ၏။ 12 ထိုအသန့်ရှင်းဆုံးဌာနတော်သို့ ဝင်ရာတွင် ကိုယ်တော်သည် ဆိတ်နှင့် နွားသငယ်တို့၏ အသွေးဖြင့် မဟုတ်ဘဲ မိမိကိုယ်တိုင်၏ အသွေးတော်ဖြင့် တစ်ကြိမ်တည်းနှင့် အပြီးပူဇော်၍ ကျွန်ုပ်တို့အား ထာဝရရွေးနုတ်ခြင်းအကျိုးကို ခံစားစေခဲ့၏။ 13 လူတို့၏ ခန္ဓာအပြင်ပန်းကို စင်ကြယ်စေရန် ဆိတ်သွေး၊ နွားထီး၏သွေးနှင့် နွားမတမ်း၏ပြာတို့ကို ညစ်ညမ်းသောသူတို့အပေါ် ဖျန်းကြ၏။ 14 ထိုသို့ဆိုလျှင် အသက်ရှင်တော်မူသော ဘုရားသခင်ကို ဝတ်ပြုနိုင်စေရန် ကျွန်ုပ်တို့၏အသိစိတ်ကို သေခြင်းသို့ ပို့ဆောင်ပေးသောအပြစ်မှ စင်ကြယ်စေရန်အတွက် ထာဝရဝိညာဉ်တော်အားဖြင့် အပြစ်အနာအဆာကင်းသော မိမိကိုယ်ကိုယ် ဘုရားသခင်ထံ ပူဇော်သည့် ခရစ်တော်၏အသွေးတော်သည် ပို၍သာလွန်သည် မဟုတ်ပါလော။ 15 ဤသို့ဖြင့် ရွေးချယ်ခြင်းခံရသူများသည် ဘုရားသခင် ကတိပြုတော်မူသော ထာဝရအမွေကို ရရှိနိုင်ရန် ခရစ်တော်သည် ပဋိညာဉ်သစ်၏ ကြားဝင်စေ့စပ်သူဖြစ်တော်မူ၏။ အကြောင်းမှာ ခရစ်တော်သည် ထိုပထမပဋိညာဉ်အောက်တွင် လူတို့ကျူးလွန်ခဲ့သော အပြစ်များကို လွတ်မြောက်စေရန် အသေခံတော်မူခဲ့သောကြောင့်ဖြစ်၏။ 16 သေတမ်းစာကို အတည်ပြုရာတွင် ထိုသေတမ်းစာကို ရေးခဲ့သူ သေဆုံးကြောင်း သက်သေပြရန် လိုအပ်၏။ 17 အဘယ်ကြောင့်ဆိုသော် သေတမ်းစာရေးသူအသက်ရှင်စဉ် သူ၏ သေတမ်းစာသည်အတည်မဖြစ်။ ထိုသူ သေဆုံးပြီးမှသာ အတည်ဖြစ်၏။ 18 ထို့ကြောင့် ပထမပဋိညာဉ်ကို တိရစ္ဆာန်တို့၏ သွေးနှင့်ပင် အတည်ဖြစ်စေခဲ့၏။ 19 မောရှေသည် လူအပေါင်းတို့အား ဘုရားသခင်၏ ပညတ်ချက်တစ်ခုစီတိုင်းကို ကြေညာပြီးလျှင် နွားသငယ်တို့၏ အသွေး၊ ဆိတ်သွေးကို ရေနှင့်ရောကာ ဟုဿုပ်ပင်၏ အညွန့်နှင့် နီသောသိုးမွေးကို အသုံးပြု၍ ကျမ်းစာလိပ်နှင့်တကွ လူအပေါင်းတို့ကို ဖျန်းလေ၏။ 20 ထို့နောက် မောရှေက “ဤသွေးသည် ဘုရားသခင်နှင့် သင်တို့ ပဋိညာဉ်ဖွဲ့ထားသည်ကို အတည်ဖြစ်စေ၏” ဟု ဆို၏။ 21 ထိုနည်းအတိုင်း တဲတော်နှင့် ဝတ်ပြုရာအသုံးအဆောင်အားလုံးကိုလည်း သွေးဖြင့် ဖျန်းလေ၏။ 22 ပညတ်တရားအရ အရာအားလုံးနီးပါးကို သွေးဖြင့် စင်ကြယ်စေရ၏။ သွေးကို သွန်းလောင်းခြင်းမရှိလျှင် အပြစ်ခွင့်လွှတ်ခြင်းမရှိ။ 23 ထိုတိရစ္ဆာန်တို့၏ သွေးဖြင့် ကောင်းကင်ဘုံ၌ ရှိသောအရာတို့၏ ပုံတူဖြစ်သည့် တဲတော်ရှိ အရာအားလုံးကို စင်ကြယ်စေရ၏။ သို့ရာတွင် ကောင်းကင်ဘုံ၌ ရှိသောအရာ အစစ်အမှန်တို့ကိုမူ ထိုနည်းထက် ပို၍ မြတ်သောယဇ်ပူဇော်ခြင်းဖြင့် စင်ကြယ်စေရ၏။ 24 ခရစ်တော်သည် စစ်မှန်သောအရာ၏ ပုံတူသာဖြစ်သည့် လူတို့လက်ဖြင့် ပြုလုပ်ထားသော သန့်ရှင်းရာဌာနတော်ထဲသို့ ဝင်တော်မမူဘဲ ကျွန်ုပ်တို့ကိုယ်စား ဘုရားသခင်ရှေ့တော်၌ ထင်ရှားရန် ကောင်းကင်ဘုံသို့ ဝင်တော်မူ၏။ 25 သို့သော် ယဇ်ပုရောဟိတ်မင်းသည် မိမိ၏သွေးမဟုတ်ဘဲ တိရစ္ဆာန်၏ သွေးကို ယူ၍ အသန့်ရှင်းဆုံးဌာနတော်သို့ နှစ်စဉ် ဝင်ရသကဲ့သို့ ကိုယ်တော်သည် ကောင်းကင်ဘုံသို့ ဝင်ရောက်၍ မိမိကိုယ်ကိုယ် အကြိမ်ကြိမ် ပူဇော်ရန် မလိုအပ်ပေ။ 26 ထိုသို့ပူဇော်ရန် လိုအပ်လျှင် ကိုယ်တော်သည် ကမ္ဘာတည်ချိန်ကတည်းက အကြိမ်ကြိမ် ဒုက္ခခံရလိမ့်မည်။ ယခုတွင်မူ ကိုယ်တော်သည် မိမိကိုယ်မိမိ ယဇ်ပူဇော်၍ အပြစ်များကို ပယ်ရှင်းရန် ကမ္ဘာကုန်ဆုံးချိန်၌ တစ်ကြိမ်တည်းနှင့်အပြီး ပေါ်ထွန်းတော်မူ၏။ 27 လူတို့သည် တစ်ကြိမ်တည်းသာ သေရပြီးနောက် တရားစီရင်တော်မူခြင်းကို ရင်ဆိုင်ရသကဲ့သို့ 28 ခရစ်တော်သည် လူများစွာတို့၏ အပြစ်များကို ဖြေလွှတ်ရန် မိမိကိုယ်ကိုယ် တစ်ကြိမ်တည်းသာ ပူဇော်တော်မူ၏။ ထို့နောက် အပြစ်များကို ဖယ်ရှားရန် မဟုတ်ဘဲ ကိုယ်တော်ကို စောင့်မျှော်နေသူတို့အား ကယ်တင်ရန် ဒုတိယအကြိမ်ပေါ်ထွန်းတော်မူလိမ့်မည်။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.